ممكن نتعرف, و نبقى أصحاب ؟؟

إسمحولي أتشعبط معاكم شوية عليكم كده في مشوار صغير بالمركب. و بطلب من الستة و القراء إنهم يسامحوني على تطفلي بالشكل ده بس انا كان نفسي أقول حاجة و قررت أعملها مفاجأة و أقولها هنا, بعد إذن الجميع طبعا.

إيه؟؟ أنا مين أصلا؟!!, اه... معلش أنا أحمد نجيب. أخو سخسخوتي -بكل فخر-. خلاص؟؟ ممكن أتكلم بقى؟؟ شكرا.

إمبارح و أنا قاعد على البوابة (كنت كنجي بوابة) مش عارف إيه اللي فرقعها في دماغي إني أبص على البلوج بتاع مركب ورق في البحر, طلعت كده في دماغي من النو وير. أنا عارف إن سارة أختي تبقى أحد الستة متمركبي البلوج, بس عمري ما فتحته قبل كده. مع ان البلوج ابتدى رحلته من منتصف سنة 2007.

قصره فتحت البلوج نزلته عندي على الجهاز (شكرا لنوكيا و خدمات الـ 3G) و قعدت أتتبع رحلة المركب من أولها. حقيقي بلوج في قمة خفة الدم ده غير إنه بيظهر بشدة إن المجموعة دي عندها موهبة كتابة هايلة (صراحة مكونتش أتخيل إن سارة عندها الموهبة دي).

الأهم من كدة إني إكتشفت إني معرفش حاجة عن سارة أختي... و بجد إتصدمت و زعلت جدا جدا لما إكتشفت برضه إني نادر جدا ما بقعد اخد و أدي معاها في الكلام, اتواصل مع أختي العزيزة.

صحيح إني فكرت في الموضوع ده قبل كده كذا مرة, ويمكن حاولت كام مرة كدة أروح افتح معاها سِكّة كلام, خط حواري علشان أتواصل معاها, بس عمري ما أصريت أو كان عندي الـ commitment اللازم علشان فعلا أقدر أصل لأن تصبح سارة أختي سارة صاحبتي.

ف من مكاني هذا –دشمة بوابة الكتيبة- إسمحيلي يا سوسو أعتذر لك, و أوعدك إني ح أحاول تاني -و بشدة لحد ما أنجح- إني أكون أحمد صاحبك و صديقك... بجانب كوني على الأقل بيولوجيا أحمد أخوكي الذي أكونه الان.

و بناءاً عليه, إسمحيلي أطلب منك... لأ إستني لما أنزل على ركبتي كدة و أضم لك كفاي في رجاء... أيوة كدة, إسمحيلي أطلب منك: ممكن نتعرف, و نبقى أصحاب ؟؟

أحمد نجيب
دشمة بوابة الكتيبة
2008/11/18

غموض..قصه قصيرة

أراه كل يوم من شرفتى..نفس الموعد..يسير بخطواته المتمهله ..اراها رزينه هى خطواته..يعبر الطريق دون ان يكلف نفسه بالنظر للسيارات المندفعه من حوله ..حتى لتكاد تدهسه..ملابسه غير المتناسقه الداله على عدم اهتمام برأى الاخرين به..سيجارته الراقيه و التى يجذب دخانها ببطء شديييد يتلائم مع رزانته.. ثم ينزل يده الى جانبه ببطء و هدوء يساعد خطواته البطيئه بأيصال ذلك الشعور بزهده فى الوقت و الحياه الى فكرى..و يزيد على ذلك نظرته غير المتنبهة لما حوله و التى تؤكد ازدحام عقله بأفكار اراد ان يصفيها بتلك الرحله الهادئه من السير اللا هادف..و يختفى فى الافق لمده ساعتين ثم ارى أيابه..لا يختلف عن ذهابه سوى فى اتجاه السير..كم شغل تفكيرى بتساؤلات عدة عن ماهيته؟؟جذبنى بغموضه ..ببطئ خطواته..بلا مبالاته .. بتصفيته لافكاره..من هو!!..
حتى فى يوم ..و انا انزل من سيارتى متسرعه و اغلق بابها ..اذا بظهرى يصطدم بجسد آخر..وقبل ان ادير نظرى لاعتذر.. اذا بيد تتحسسنى بوقاحة فانتفضت مبتعده و قبل ان ينطلق لسانى..اتسعت عيناى..انه هو..او ليس هو..ما ذلك الانتفاخ الاسود تحت عينيه.. تلك التى تعجبت من نظراتها غير المتنبهة.. ملابسه الداله عن ترففعه عن تفاهات الاخرين وجدتها مجرد ملابس ممزقه..رائحته الكريهة افهمتنى غرابه سيجارته..

و تبدل ذلك السؤال فى عقلى عن من هو الى ماهو..ثم اختفى الاخير ليحل محله صرخة صدمه فاستهجان..انه مدمن..فقط مدمن ..تلف عقله و حلت محله شهوته..شهوة حيوان يحاول ان يثبت انه مازال انسان

الجزء التالت "انا عارفه انى بحلم"(اكشن)

انا عارفه انى بحلم

"كالعاده..السكشن 4 ساعات متواصله.و قبله سكشنين اصلا...بقالنا منه 3 ساعات مميته من الشرح النظرى "مع انه اساسا عملى"..و كالعادة يعيد الدكتور نفس القفشات ال"مضحكة" بتاعه كل سكشن..و كالعاده اول صف من البنات يضحكوا بشدة من خفه دم المعيد..واحنا مغلوبين على امرنا ..واحده عينيها ماشيه تاتا تاتا مع عقارب الساعه..و التانيه مستغرقه فى النوم..و التالته فقدت الامل و قعدت مربعه على الارض تندب حظها..و الرابعه عرفت الحل فوقفت فاتجاه القبله و قعدت تبتهل لربنا ان الدكتور صوته يروح.و الخامسه..ايه ده!! البت راحت فين؟؟الشباك مفتووووح..برييك..الحمد لله مانطتش..انتى يابت نزلى الازازة دى من على بؤك..السكشن قرب يخلص..يادوبك فاضله سنتين تلاته بس على ماالشرح يخلص..استهدى بالله يا حبيبتى
و بعد مرور السنين"هدر" .. نسمع احلى جمله تسمعها الواحده فينا فى حياتها .."و نيجى لآخر حاجة فى السكشن النهارده و هى ..."فيحس الدكتور بنفحه هوا قويه جايه من ناحيتنا و كالعاده يستغرب ..و فجأة كل واحدة تبص فينا للتانيه و تهز راسها انه "لا ان شاء الله مش هيحصل
" و لكن هيهات..نسمع نفس الصوت من اول صف بنات..لكن لأ المرة دى مش هنخاف..و ينهار السد..و و تنطلق نظراتنا لاول صف بنات و "اذن فالحرب"..اطير انا من على البنش وانزل من ارتفاع السقف على بطن اول بنت ..و كهرمانه جايه من بعيد بتجرى بسنجه فى ايديها و بتصرخ "لأاااااااااااااه" و بريك بتخلع حنفيه من المعمل و بتنزل بيها على رقبه البنت التالته و سنفوره تفتح البالطوا بتاعها و تطلع ال ار بى جى ..و لوزة جايه و فى ايدها .مسطرة..مسطرة!!!..بت فين الكرباج اللى اديتهولك!!...و فى خمس دقايق يكونوا العيال خلصوا على الاربع بنات و بيحاولوا يشيلونى من على البنت اللى وقعت تحت ايدى...ونطلع احنا الخمسه من المعمل بلاطينا بتطير ورانا و الدخان فى الخلفيه

"بعد 5 ايام..اثناء اخذ اقوال الضحايا بعد انعاشهم بالمستشفى العام..اجمعوا على عدم معرفتهم بسبب هذا الاعتداء المشين..و عن سؤالهم عن توقيت الحادث, اجابوا"اول ما بدأنا وصله الاسئله اللى عارفين اجابتها بعد الشرح..و اللى مبتاخدش اكتر من ساعة و نص!!!!"

الجزء التانى"انا عارفه انى بحلم"

ارجع بيتنا
"كنتى فين يا به ده كله"
"يوه يامه..انا مش جلتلك هروح عند الترعه اللى حدانا اخد مالبت "ايمان" توب القماش اللى عندها"
تزغدنى ماما "امه" فى جنبى و تقولى "البت ايمان بت الحاج محمود" .. "اى يامه بت الحاج محمود"
"الحاج محمود اللى داره حدا المدرسة".. "اى يامه فيه اييه؟..عماله تعيدى و تزيدى..مالك؟" تضحك ماما بخبث و تلفنى وتقولى"بس والله و كبرتى واتدورتى واحلويتى يا بت " "!!!" "اصل الحاج محمود جيه الضهريه حدانا..و طلبك من ابوكى لابنه" نظرة استعباط منى"ابنه..ابنه مين" "هو فيه غيره يا بت!" اتدير انا اخبى الضحكه"بس بامه..يامه انا لسه صغيرة" تشخط ماما "هو انا جلت الحاج محمود طلبك لنفسه..و بعدين ده الواد اسمر و حليوة و متعلم..ده فالجامعه يابه..عارفه يعنى ايه جامعه..دى بتاعة الناس الاكابر" اتبغدد انا باستعباط"بس يامه.." "مافيش بس..كتب كتابك الجمعه الجايه..و كلمه ابوكى هتمشى" ادمع انا واترمى عالسرير وان بقول "فعقل بالى" اخيرا فهمت ابتسامته الغريبه النهارده واحنا عالترعه :):)..و قال البت ميرفت بتاعة المدارس دى تقولى الجواز المبكر غلط و ان قاسم امين بيقول كده..يا شيخه اتلهى على عينكD:D:

انا عارف

انا عارف انى بحلم و الحلم جميل و بيحلالى
قال ايه قاعده جنبى و الناس شايفاكى و حسدانى
ماهو طبعا مانتى قمرى و نورى و ضلى و آمالى
و انا نفسى اقولك كده من زماان
انا كل ماغمض عينى الاقيكى جايه من بعيد
لابسه الفستان الابيض و المزيكا تقول و تعيد
و الاقيكى بتضحكيلى و بتقوليلى بقينا لبعض
و الاقى دقات قلبى من كتر الفرحة ثزيد
والاقى لمه واحلى دمعه من عيون فرحانه
ما خلاص العين هتنام بعد ليالى كتير سهرانه
و الف اورى الشبكة و دى ربكة ماكنت على بالى
و الاقى الناس بتغنى بصوت عاالي
اسم الله عليهم عينى عليهم ربنا يحميهم
و تملى دسته عيال بيتهم و تطلع عينيهم
و تيجى الناس تطل عليهم و يقولوا عقبالنا
مين يطول يعيش حقيقه فى زيها فى الجنه

دوّر كويس

خلاااص
رمضان بيلملم حسناته و ماشى

على وعد بزيارة تانيه بعد سنه

سنه ممكن تخليك مستنييه

سنه ممكن تخليك ناسييه

سنه ممكن تخليك متكونش معانا فييه

طب اقعد فكر كده
ايه اللى رمضان غيره فيك
ممكن يكون غير نظرتك للقرآن..بدل ما كانت الختمه واجب لازم يتعمل..بأت لحظات استمتاع ما بتشبعش منها

ممكن يكون غير نظرتك لذنب عملته و انت مقتنع انك صح..و خلاك تحس معنى "استغفرك ربى و اتوب اليك"

ممكن يكون غير نظرتك للحاجات اللى ممكن تشغل بيها وقت فراغك..فقمت تستمتع بفقه السنه او برياض الصالحين

ممكن يكون غير نظرتك فى اللى جاى..خلاك مقتنع ان ربنا معاك..سمع دعاءك و هيلبيه

ممكن يكون غير نظرتك لنفسك..انا اقدر اعمل كتير

ممكن يكون حتى هيئك انك تغير نظرتك للحاجات دى..و ساب الباقى عليك

بس اكيد رمضان غيرك..دوّر كويس و هتعرف

الله اكرم

أذن الفجر معلنا عن نهايه الملذات الدنيويه من طعام شهى او شراب منعش او شهوات اخرى..و هتف اخى بنا لنسرع فى أداء السنة و لنكمل احاديثنا بعد ان يتلقفه سريره الوثير و أقام أخى الصلاه بصوت يغلبه النعاس حتى لأصبحت كلماته مبهمة و تفهم من مضمونها العام..و بدأ ابى الصلاة و نحن من وراءه فى تلك الغرفه الضيقه التى لم تعد تحتمل اجسادنا السته..و فى آخر سجدة اخذ كل فرد منا يطيل الدعاء..و دعوت الدعاء الذى سيمتع لسانى طوال شهر كامل..سلم ابى على ملكيه عن اليمين و الشمال و اتبعناه..اخذت افكر..ماذا أفعل حتى اشعر بروحانيه رمضان هذا العام..كيف انهى رمضان و انا راضيه عن نفسى..و انا موقنه ان هذا الشهر غير فى و ليس كزملائه من الاشهر..سأحاول الالتزام فى صلاه التراويح..سأشترى عباءه حتى لا يقعدنى تساؤلى عم سألبس لأفاجأ بالعشاء تؤذن..سأختم القرآن مرتان..سأزور تلك القنوات الدينيه التى كانت تثقل على نفسى فتحها..سأكثر من الدعاء..حتى غلبنى النعاس..و مر يوم يليه اخيه يعقبه شبيهه..لأفاجأ بأن الشهر "الكريم" بخل علينا بسعه الوقت..و أعلن عن قرب العشر الاواخر منه..ياللهول..لم اصلى التراويح فى المسجد يوم واحد..لا تجزعى لقد صليتها فى بيتك..لكننى لم ألتزم بها يوميا فكيف لا اجزع..ياللهول مازلت فى اول ختمه للقرآن؟؟..لا تجزعى انتى فى ثلثه الاخير..ثلثه الاخير!!اذن لم اجتهد عن العام السابق..و لكنك تعرفتى على قصص القرآن .. نعم .. ولكنى لم أكثر الدعاء..كانت فى نفسى غصه منعتنى من ذلك....و ينتهى الشهر الكريم و انا اردد فى نفسى " رمضان كريم ..لن يبخل عليك بزيارة اخرى بعد عام ..و ان طال .. " و تترد امنيه خافته فى نفسى ان الله أكرم سيجازينى على نيتى..الله اكرم

حبيت اقول

حبيت اقول
حبيت اقول وحشتينى يا مى اوى
حبيت اقول وحشتنى يا مركب اوى
حبيت اقول وحشتونى يا بلوجراتيه اوى
حبيت اقول وحشتنى نفسى القديمة اوى
حبيت اقول وده الاهم
"كل سنه و انتوا كلكوا طيبين....رمضان كريم"
sara

هى

هى جميلة ..بل رائعة الجمال..بكل المقاييس حتى التى لم تعرف بعد

كم فكرت بها ..و تمنيت لو فقط اقترب منها..اتحدث اليها...تنظر الي و لو مرة واحدة فى حياتى...سأكون محظوظا حقا حينها ..فهى لا تسمح لأحد بالاقتراب منها..دائما هناك مسافات ..أشعر ان الجميع يهتم بها مثلى ..ولكنهم يكتفون بالحدود التى وضعتها ..أما أنا فلا

وضعت خطتى ..و قررت أن اتحدث اليها..مهما كلف الأمر..لم أتردد قط

فكرت بأن أضيف حديثى الذى سأجريه معها على ال -سى فى- فأنا على يقين ان هذا الحوار يهم الجميع

و جاءت اللحظة

اقتربت منها

اقتربت أكثر

خاب أملى

الاقتراب الشديد جعلنى أرى الندوب فى وجهها

أدركت سبب ابتعادها عن الناس

لتبقى هى هى بنظرهم

break

سبع سبعات سخسوختى

ايه ده ايه ده
البلوج نور كده ليه..اكيد عشان دخلته..يا جماعه كفايه تسقيف اخجلتم تواضعنا..:) :)
انا بقالى سنة بحاول ادخل البلوج..و زى ما يكون معمولى عمل..كل ما اقعد على الكمبيوتر يا يبوظ يا النت يفصل
و ادخل الاقى عليا تاج
حسبى الله و نعم الوكيل
يلا استعنا على الشقا بالله على راى ياسمين
سبع حاجات نفسى اعملهم
1-رمضان اللى جاى ده اطلع منه ربنا غفرلى..يارب
2-أتخطب..و مش عاوزة تعليق
3-طولى يزيد عشرة سم بس..انا مش طماعه
4-ابقى فى جسم نيللى كريم..لا لا مش باربى
5-الكليه بتاعتنا دى تطلع بفايده
6-ماما ترضى عنى حبه
7-نفسى ابقى هاديه و رقيقه..اعرف افكر فى الكلام قبل ما أفوله..يعنى

سبع حاجات معرفتش اعملهم
السبع حاجات الى فوق :) :)

سبع حاجات بقولهم دايما
1- بجد
2-اصلا
3-اتهيالى
4-ماشى؟..او فاهمه؟
5-يخرب بيتك
6-what ever
7- even

سبع مشاكل الفلوس تحلها
نجيب انا و العيال عربيه لينا نخرج بيها و نروح الكليه بيها
نغير الشقه بتاعتنا
الباقى مش مشاكل الباقى رفاهيات :) :)

سبع اماكن بحب اروحها
همممممم
بحب اروح اسكندريه..فيه لسان هناك كنا بنقعد عليه احنا و العيال و ماحدش شايفنا..بجد ده احلى مكان
بحب اروح مطرووح مووت
بحب اروح الكليه ..بس من غير مذاكرة
بحب اروح السينما مع العيال
بحب اروح سفارى
بحب البيت جدا..فيه ايام ببقى عاوزة بس اقعد فى البيت منعزله عن اى حد
بحب اروح بلوجات ناس معينه

سبع اشخاص بحبهم غير بابا و ماما و اخواتى اللى بحبهم جدا
سمسم
يمنى بنت خالتى
ياسين ابن خالتى
ريم صاحبتى
ابو العيال
جدو الله يرحمه..و احمد الله يرحمه

اما عن سمر و ياسمبن و مى و نورا و هند..ف.همممممم..انتوا قلتوا ما اقولش اخواتى

سبع حاجات بحبهم اوى
1-ميكس بالشكولاته
2-الشيكولاته..خصوصا سنيكرز
3-اسمع انغام او سعاد ماسى
4-انام فى السرير فى الضلمه و اغمض عينى و اتخيل اى حاجة
5-حبيبه..و دى عروسه بحبها اوى
6-اقعد قدام فيلم اجنبى كويس
7-ارغى مع اى حد بحبه

سبع بلوجات بفتحها اول ما ابقى اونلاين
غنيم
ايمان بين ااسطور
بيتنا القديم
no use
واحدة مفروسه
كده الاسكندرانى
سفاح كرموز
المخرج
me talking to my sweet noteلما كان لسه ياسين بيكتب فيه

يا خراشى..كل ده تااج..انا ايدى هتتخلع :'(

rara

الحق بأه اقرا ردود كهرمانة و سنفورة

سبع سبعات بريك

و تالت فرد معانا من الستة هو بريك



سبع حاجات نفسى أعملهم

1-أرضى ربنا

2-اطلع ماما تحج

3-أعدى فى الكلية دى فى 5 سنين و صافى ان شاء الله

4- نعمل 10000 شنطة رمضان السنة دى و اجيب اعلى تارجت فيها حاجة اقولها لما اقابل ربنا بقلب جامد

5-ربنا يرزقنى الزوج الصالح و الذرية الصالحة

6-أمشى على كوبرى استانلى بالليل لوحدى

7-نفسى اى حلم احلمه اقدر احققه بالتالى الموضوع ميقتصرش على 7 بس



سبع حاجات معرفتش أعملهم



1- معرفتش ابطل اسمع أغانى

2- مبعرفش يبقى معايا فلوس و مصرفهاش لا انا و لا ماما بعد قبضها بيومين الحمد لله بنكون مفلسين

3- مبعرفش اكل السمك لوحدى ولا البطيخ

4-مبعرفش امسك نفسى انى اصوت لو حد خضنى فى وسط الشارع

5- مبعرفش امسك نفسى من العياط كمان فى اى موقف بكون ضعيفة فيه و بيكون شكلى وحش

6-معرفتش اخد قرارت فى حاجات معينة و انفذها دايما بأجل

7-معرفتش ان المانجا طلعت غير من اسبوع



سبع حاجات بقولهم دايما



1-أهم حاجة الثقة بالنفس

2-يالهلى-- يالهوى و ياللهول

3-ما شاء الله

4-اما اكون انا اللى متصلة بحد من العيال لازم اقوله متصل عندنا ليه

5-العيال على اصحابى

6-برزيدون__مصطلح من مصطلحات الستة

7-اممممممممم



سبع مشكلات فى حياتك ممكن تحلهم الفلوس



1- عربية لينا نروح بيها الكلية

2- اطلع ماما تحج و لو الفلوس كتير اطلع خالتو و كمان و اطلع انا كمان و اى حد نفسه يطلع مش هبخل عليه

3-نجيب عمارة لينا احنا ال 6 نتجوز فيها و تحت هنعمل صيدلية كبيرة لينا

4-عايزة فلوس انا اليومين دول عشان مش معايا و فى حاجات كتير عايزة اجبهاا

5-ندفع نص مليون جنيه لشنطة رمضان و نص مليون لحملة تنمية عشان منزعلش حد

6-هعمل ميزانية لشحن موبايلى انا و العيال

7-نورا عايزة 6000 جنيه عشان تجيب موبايل طالع من عينها و عمرها ما هتجيبه طبعا الا لو نزلت فلوس من السما زى دى و اى حد نفسه فى فلوس هديهاله



سبع أماكن بحبها



1- بيتنا

2-شارع بيتنا

3-اسكندرية خصوصا و اى مكان فيه بحر عموما

4-كاريزما قديما بس قفل ف سفارى بيحل محله بقى

5-الكلية بس مش دايما

6-مسجد الفرقان

7-قرية بالميرا اللى كان فيها عيد ميلاد نودى



سبع أشخاص بحبهم غير ماما

السؤال دا انا جاوبته فى تاج قبل كدة

انا بحب اى حد معمليش حاجة أذتنى او أذت ماما

اخص 7 بقى بس مش بالترتيب

1- الستة طبعا " والترتيب أبجدى ا هو للخمسة "" شاملنى طبعا لانى بحبنى"

سارة

مى

نورا

هند

ياسمين



2-عيلتى كلها فرد فرد

3-مروة صاحبتى من اعدادى والاء و وفاء صحباتى من ابتدائى و امانى صاحبتى من ثانوى


4- هدى صاحبتى من النت
5-جيرانى فرد فرد

6-البلوجارتية - مش عارفة بتتكتب ازاى- نفر نفر

7 - باقى الناس كلها



سبع حاجات بحبهم اوى



1- المج بتاعى

2- سمكاتى

3- عصافيرى و قطتى ميسو الله يرحمهم

4- السلسلة اللى فيها صورة بابا

5-كشكولى اللى بكتب فيه

6-البلوج ده

7- بحب المكرونة بالبفتيك اوى



سبع مدونات بفتحهم اول ما بدخل اون لاين



1-الستة بتوع صيدلة و النور قطع

2-غنيم حتى لا أنسى

3- زيكا المخرج و الأشعاريزم

4-funckydoctor صبح صبح يا عم الحاج

5- elgazaly

6-سفاح كرموز طرطشة أفكار

7-KEDA SPONSER فى اى بلوج بقى لحد ما يستقر نهائى



التاج دا يا جماعة لأى حد يقراه

لازم يجاوبه

BREAK

سبع سبعات سنفورة

و تانى فرد من الستة هيجاوب التاج النهردة هو سنفورة

بنعتذر عن التأخير يومين و دا لأن سخسوختى الكمبيوتر بتاعها ضرب و معرفتش تنزل

ونسكمل مع سنفورة

سبع حاجات نفسى اعملهم

1- اخس 4 ك

2- اكل رز بالخلطة معاه فراخ مشوية وبعدين لقمة القاضى

3- بما انها امنيات يبقى نفسى اشترى عربية بورش و اطلع بيها القمر

4-اعمل شريط كاسيت يكسر الدنيا مع العلم انا اخرى اسمه و بالعافية كمان

5- هموت اوى بقى و ابقى بعرف اعمل رز بالخلطة اقدر اكله كل يوم

7- نفسى اوصل لسر عمايل الرز بالخلطة

سبع حاجات معرفتش اعملهم

1-معرفتش لحد دلوقتى اخس 4 ك

2- معرفتش اتعلم الرز بالخلطة بس اشتريت لقمت القاضى و كلت فراخ

3- معرفتش اوصل للمعرض اللى اشترى منه البورش فاتجهت الى نوع اخر من البورش

4-معرفتش اكمل باقى السبع حاجات عشان انا مجربتش اعمل حاجات عشان محققهاش

سبع حاجات بقولهم دايما

1- ماشى بعد كل كلمة و دى اتعلمتها من سخسوختى

2- it's ok و دى بقى نفسى ابطلها او فهمت

3- فاهمنى و بكون مقلتش حاجة

4- عاوز و الناس كلها طلعت بتقول عايز

5-الو و باى باى

6-مافيش حاجة تانية الباقى كله حركات معرفتش اكتبها

سبع مشكلات فى حياتك تحلهم الفلوس

1- العربية البورش

بيتهيألى معنديش مشكلة تانية لانى اتسم بتمام القناعة و بصراحة كمان ايدى و جعتنى

سبع أماكن بحبها

1- شط البوريفاج فى اسكندرية

2- بيتنا القديم فى البلد

3 بلكونة جيرانا و بلكونة واحدة من قرايبنا

4- اوضتى القديمة

5 بس بحب اكتر اوضة اختى عشان اضايقها

6- حمام كليوباترا فى مطروح (اخر صخرة قبل ما تقع فى البحر)

7- كاريزما قبل ما يقفل

سبع اشخاص بحبهم غير بابا و ماما وا خواتى

1- اصحابى الخمسة اللى انتوا عارفينهم

سمر مى ياسمين سارة نورا

بحب نفسى اوى كمان قد الدنيا كلها

لو فى شخصيات تاريخية يبقى اكيد

سيدنا عمر بن الخطاب سعيد اليد بدير

اخر واحد بقى د/مصطفى محمود

سبع حاجات بحبهم اوى

1- الكرسى الهزاز بتاعى

2- المراية بتاعتى

3 شيكولاتة سنكرس

4 ميجا بالشيكولاتة او اى حاجة كلها شوكولاتة

5 كتاب خطاب الى رجل ميت

6 بروزا كان جايلى هدية من حد بحبه اوى

7 العربيات اوى بكل انواعها

وبلوجنا طبعا اول حاجة

اخر سؤال

اللى هو اول بلوج بتفتحه اول ما بتدخل اون لاين

سنفورة مش هتجاوب عليها دا لانها معندهاش نت و نادرا ما بتدخل ف متعرفش بلوج معين

ان شاء الله عن قريب هتنور النت كله

كان معكم سنفورة

طبعا بنعتذر مقدما ان سنفورة مش هتعرف ترد على حد لانها معندهاش نت فى البيت لحد ما التكنولوجيا توصلهم

وكهرمانة هترد ان شاء الله طبعا على الناس بس كمان يومين ان شاء الله

طبعا مش محتاجين نقول تانى ان التاج دا مبعوت للكل

بمعنى اى حد يقراه ف هو كانه مبعوتله

تاج سبع سبعات

لقينا ملف كنا عاينين فيه شوية تاجات قديمة كدة ..بس مش عارفين من مين ..احنا بندعوا صاحب التاج دا انه يقر بنفسه و يعترف


تانى حاجة احنا اخترنا التاج دا لانه اطول تاج و طبعا معروف عننا الرخامة يعنى مش جديدة


4 مننا بس اللى هيجاوبوا لان مى مسافرة


كل يوم واحدة فينا


فكرنا نقفل الردود على البوست ده.لاننا مش عايزين نشوف ردود هنا ...مش بنطرد حد لا سمح الله...احنا عايزين نشوف الردود عندكوا على بلوجاتكوا ..بمعنى اصح كل واحد دخل و شاف التاج دا لااااااااااااااااااااااازم يجاوبه


يعنى منشوفش رد الا و بيقول انا هجاوبه او جاوبته ..و الا ستصيبه لعنة الستة ..ربنا يحفظكوا منها


لاننا لازم نغمس التاج دا سوا

هنبتدى النهردة مع كهرمانة و بكرة فرد تانى من افراد الستة
سبع حاجات نفسى اعملهم :

1- نفسى ادخل الجنة


2- اجيب تقدير حلو الترم ده بما ان النتيجة بيقولوا انها قربت


3- اتزوج رجل صالح


4- ارزق ذرية صالحة


5- احنا الستة نفضل مع بعض على طول


6- نفسى اشارك فى عمل احس ان له اثر كبير فى نهضة المجتمع يعنى يساعد ناس كتير و ده فى السكة ان شاء الله


7- اكون مخلصة دائما فى اى عمل باعمله عشان اؤجر عليه





سبع حاجات معرفتش اعملهم


1- اطلع من الاوائل كل سنة زى ما بابا عايز و ده طبعا لانى مليش صبر على المذاكرة


2- اراجع القران اللى حفظته و ابتديت انساه و اكمل نصه اللى فاضل .... عمالة اتلكع مش عارفة ليه


3- انتظم فى زيارة مريض اعلم انه يحتاج زيارتى و لكنى مع الاسف لا اجد الوقت و احرزن عندما اعلم انه طلبنى و لم استطع التلبية


4- انتظم فى الرد و كتابة البوستات على البلوج و لكنى عاملة زى الريح اعصف فجأة و بعدها بقول عدولى


5- ابطل اكون موسوسة فى امور الدين و ده بيتعبنى جدا فى اداء الفرائض


6- بأنب نفسى كتير و بافكر دايما فى اللى باعمله و ده بيتعبنى برده نفسى الموضوع ده يقل


7- يبقى عندى وسط فى التعامل مع الناس للاسف لما باحب باحب اوى و لما باركه باكره اوى





سبع حاجات باقولهم دايما( صعبة اوى ده )





1- صباح الخير :)


2- حسبى الله و نعم الوكيل


3- استغفر الله


4- يا ابن الحلال او يا بنت الحلال


5- يا بنى ادم


6- تصبحوا على خير


7- سلامو عليكو





طبعا انا مستهبلة السؤال ده بس المشكلة ان لزمات الواحد فى الكلام لايمكن هو يلاحظها





سبع مشكلات فى حياتك ممكن تحلهم الفلوس





1- عربية الستة بتوع صيدلة


2- حد قريب منى عايزة اعمله مشروع ( الاقيله شغل يعنى )


3- تمويل المشروع الجديد فى صناع الحياة


4- اسافر برا و الف الدنيا و من تواضعى انى ممكن اتنازل عن الحصان الابيض بالفارس اللى عليه يعنى عايزة تذكرة نفر واحد هاه من يسلفنى :)


5- ممكن ادفع لاى حد و يكمل الاسبع حاجات دول ( الاسئلة صعبة اوى )





اعتذر عن الاكمال لان اغلب مشكلات حياتى ان وجدت مش بسبب الفلوس الحمد لله





سبع اماكن بحبها





1- جمعية صناع الحياة و كل ما يرتبط بها


2- بيت بريك


3- شرم الشيخ


4- الاقصر و اوسان


5- اسكندرية


6- الكلية


7- عند خالتو





سبع اشخاص بحبهم غير بابا و ماما و اخواتى (سهلة )


1- بريك


2- سخسوختى


3- لوزا


4- سنفورة


5- نورا


6- رنا


7- محجوز لبعد عمر طويل ( قولوا يارب )








سبع حاجات بحبهم اوى





1- تجمعنا عند بريك


2- العمل فى صناع الحياة


3- تهييسنا فى الكلية


4- المصيف لما يبقى معانا اغلب العائلة


5- الخروج مع اسرة خالو محمد


6- القعاد على الكمبيوتر و ان قل


7- الفضفضة مع نفسة و ان طالت








سبع مدونات بحبهم و بافتحهم اول لما ابقى اون لاين
دول اكتر ناس بتابعهم

1- ghoneem

2- دكتور بهدوء

3- سفاح كرموز
4- keda sponser
5-شيكساوى

6- بيتنا القديم
7- اللهو الخفى

كهرمانة

فاصل اعلانى

أكتشفت أنى لأجد نفسى .. على أن أكون مع نفسى

و أكتشفت أن قرارى بيدى
أما مشاعرى فهى ملك قلبى
و كم أهوى إيقاع حياتى

أكتشفت أن سكونى يسعدنى



و أكتشفت كيف تختفى أكبر متاعبى عندما أجد ما أبحث عنه

شايفين الكلام اللى فوق ده..دا كان اعلان جالاكسى سينزى لو حد شافه قبل كدة...ممكن مثلا تكون قاعد بتتفرج على مسلسل و لا حاجة و جه فى النص فاصل اعلانى طويل عريض متفكرش تتفرج على الاعلانات دى و فى ناس تانية تحب الاعلانات اكتر من المسلسل نفسه

مش عارفة ليه بحس فى اعلانات الشيكولاتة و خصوصا جالاكسى بالمتعة..يمكن اعلاناتهم فعلا بتكون حلوة و تمتعك كدة و تعيشك جو تانى

بالمناسبة سينزى اللى فى الاعلان ده اانا من كتر ما الاعلان ما اثر فيا فضلت ادور عليها شهوووور لحد ما سخسوختى -ظوظو- لقتها فى محل مرة و جابتهالى

كانت مفاجأة جميلة جدا جدا جدا جدا ليا .. ورغم يعنى انها مطلعتش قد كدة..بس تحس انك عايز تاخدها و تعمل زى الاعلان بالظبط تحس الاحاسيس دى

انا بحب كل الاعلانات اللى على نفس الاسلوب يعنى مثلا بحب اعلانات زين عالم جميل بجد الاعلانات دى هادفة جدا جدا

فى اعلان تانى ممكن يلفت نظرى مثلا زى اعلان بيبسى ماكس ..اللى هو الولد اللى بيجى معاه لستة حاجات و عايز و يعملها و يفضل يشطب ..الاعلان دا قد ايه هو جميل بس ميوصلكش لمرحلة انك عايز تشرب بيبسى ماكس دا..لا هو يخليك عايز تشوف هيعمل ايه فى اللى بعدها هياخد جايزة اوسكار ازاى هيبقى مدير قبل ال 30 ازاى و و و

و فى اعلانات تانية ممكن تستفزنى و ابقى عايزة اقفل التلفزيون و اضرب اللى فكر فيها و دى بتكون الاعلانات المصرية طبعا ..و خصوصا بتوع بانوراما دراما و اتصل على مش عارفة كام و اشترى الساعة تاخد عليها عربية هدية

مستنية اعرف رأيكم فى حوار الاعلانات ده؟

بتلفت نظركوا؟ فى اعلان معين بتحبوه؟

ولا بتزهقوا منها و مش بتحبوها اصلا؟

break

العدد ال 11 من مجلة الستة بتوع صيدلة

حبينا ننبه على حاجة بس فى الاول فى ال label احنا حاطين المجلة فى اعياد ميلادنا كمان عشان فيها عيد ميلاد سنفورة بالتفصيل فى صفحة التناحة

الصفحة الدينية

عن عبادة بن الصامت رضي الله عنه قال سمعت رسول الله صلى الله عليه وسلم يقول(من استغفر للمؤمنين والمؤمنات كتب الله له بكل مؤمن ومؤمنه حسنة ) رواه الطبراني

حد يعرف عدد المؤمنين فى العالم كام؟؟ :)

_______________________________

صفحة الاهداءات

الشهر ده فى عيد ميلادين هنقولهم بالترتيب طبعا.... احنا مرتبينهم حسب مين اتولد الاول فى الشهر

د/غنيم صاحب بلوج حتى لا أنسى واللى احنا مسمينه ابو العيال

كل سنة وانت طيب و عقبال 27000000000000 مليون سنة

دى مش تسييحة ولا حاجة

لما سألت عن امتى هنزل بوست جديد

قلنا مش عارفين و مفيش

عشان نعملك مفاجأة عندنا على البلوج

انت مش محتاج نقولك تانى ان البلوج من غيرك ميسواش حاجة و ان وجودك بجد بيفرق معانا

ونورا صاحبتنا وعيد ميلادها النهردة

كل سنة وانتى طيبة يا نورا و عقبال 19000000000000 مليون سنة

ونفضل اصحاب طول العمر ان شاء الله

وتمسكلنا الصيدلية زى ما اتفقنا

و نسكن فى بيت واحد زى ما اتفقنا بردوا

و الشهر ده فى بلوجين كمان بيحتفلوا بعيد ميلاد بلوجهم>>>>و هما حسب الترتيب مين الاول..كاتروز صاحبة بلوج I'M UR MIND ...كل سنة وانتى طيبة و بلوجك طيب
http://catroz.blogspot.com/


و البلوج التانى هو سفاح كرموز..صاحب بلوج طرطشة أفكار..تم سنتين بسم الله ما شاء الله..ربنا يزيد و يبارك و يقدر يمشى على رجليه ..بجد كل سنة وانت طيب و الف مبروك وان شاء الله من نجاح لنجاح فى بلوجك , و مانقدرش ننسى انك معانا برضه من اول ما فتحنا المركب..بجد بأه عيش و ملح
http://meshmesh5000.blogspot.com/

________________

صفحة التناحة

طبعا احنا منتوصاش فى موضوع التناحة ده

ومن التناحة بتاعتنا اننا مبنحتفلش بعيد ميلاد اى واحدة فينا فى وقته

يعنى مثلا عيد ميلاد بريك كان فى شهر 2 احتفلنا بيه فى شهر 6

وعيد ميلاد سنفورة كان فى شهر 4 احتفلنا بيه فى شهر 7

مع العلم ان هدية سنفورة لسة مجبنهاش اصلا

المهم كنا راجعين من الكلية فى اليوم ده..طبعا هتسألوا رايحين الكلية ليه فى الاجازة؟!..نقولكوا كدة وخلاص..المهم لعبنا هناك وحكمنا على هند انها تفضل طول الطريق و احنا مروحين مخبية وشها كدهوة

عشان طبعا عاملين حسابنا ننزلها عند قرية بالميرا ..دى قرية على طريق جنزور شبين بنعدى عليها وا حنا جايين فى الطريق يعنى و دى صورة القرية

المهم ان سنفورة كانت فاهمة انها فندق ف احنا استغلينا الموضوع ده

المهم جينا عند القرية و قلنا للسواق نزلنا هنا ..السواق و الركاب استغربوا؟! انتوا متأكدين..ايوة متأكدين احنا خاطفينها و نزلنا من العربية بكل ثقة وسنفورة عمالة انتوا واخدنى فين انتوا بتهرجوا

المهم دخلنا جوا القرية وهيا فاهمة اننا ماشيين فى الشارع وا للى اكد الموضوع ده واحد عدى بعجلة جنبها

المهم طلعنا نجرى فجأة وسبناها ففكت الطرحة عن وشها بقى مبقتش عارفة هيا فين!!

جت على الترابيزات اللى كنا محضرنها دى

و غنينالها هابى برث داى..الراجل جه قالتلوا احنا فين يا عمو؟؟قالها احنا فى ايطاليا

طلبنا ايس كريم و بصراحة طلع ايس كريم معفرت كلنا المعالق بتاعتنا وقعت

بعد كدة قمنا لعبنا فى المراجيح واتصاحبنا على بنت صغيرة اسمها سارة و دعينا باباها و مامتها يزوروا البلوج ويشوفوا الفيديوا بتاعها علي بس للأسف الفيديوا مش راضى يترفع هنحاول نرفعه تانى ان شاء الله

كان يوم جميل جدا جدا جدا جدا جدا جدا جدا يا سنفورة و كل سنة وانتى طيبة

طبعا احنا من تناحتنا الزايدة اننا طولنا فى الصفحة دى جدا

_________________________

صفحة أخبار اليوم

فاز موضوع سخسوختى أنا بغير منك بالتوب بوست

وعلى فكرة لو مكنش فاز بالتوب بوست احنا كنا هنزعل جدا لاننا كلنا اجمعنا عليه

وان شاء الله هنفكرلها فى هدية على المجلة الجاية كدة نكون اتفقنا

سافرت لوزة السعودية و هتيجى ان شاء الله فى اخر شهر 8

اى حد عايز دعوة معينة وهيا بتعمل عمرة يقولنا واحنا نوصلها ان شاء الله

و هيا بتعتذر عن انها مش هتقدر ترد على الناس فى البوست اللى فات

سخسوختى بتدرب فى صيدلية وبكدة تكون اول واحدة فى جروبنا حصلت على لقب دكتورة

اما سنفورة و بريك فبيتدربوا فى الجيم و المدربة بتقول عليهم جايين يلعبوا هنا

اما كهرمانة فبتدرب فى القاهرة على حاجات تبع الجمعية و بكدة تكون اول واحدة خرجت برا حدود شبين طنطا فينا

كدة اتراكم علينا هديتين هدية سنفورة وهدية نورا و الفجأة بقى اننا مجبناش هدية بريك كلها

____________________

صفحة التسالى

مش محضرين حاجة معينة للصفحة

لاننا حاسين ان المجلة دى مليانة حاجات

ان شاء الله صفحة التسالى المجلة الجاية تكون مسلية جدا

بس نحب نقولكوا ان فيلم مسجون ترانزيت جميل جدا

و شريط تامر هابط جدا مجرد الحان حلوة

___________________

صفحة الهوم ورك

التصويت الجديد نزل

ياريت يا جماعة دا رجاء متصوتوش عشان بتحبوا حدا

صوتوا لافضل بوست فعلا

اللى عايز دعوة معينة لوزة تدعيهاله فى العمرة يقولنا وان شاء الله نوصلها

ادعولنا عشان النتيجة

هدايا لكل الناس اللى قلنا عليها دى ردك لوحده مش كفاية اتبرع و لو بجنيه

اى اقتراحات بالنسبة للبلوج او لينا

و بنعتذر عن قلة المواضيع الجماعية الفترة دى لاننا بنكون مع بعض فى الدراسة 24/24 فى الاجازة طبعا الموضوع يختلف

الستة بتوع صيدلة