ممكن نتعرف, و نبقى أصحاب ؟؟

إسمحولي أتشعبط معاكم شوية عليكم كده في مشوار صغير بالمركب. و بطلب من الستة و القراء إنهم يسامحوني على تطفلي بالشكل ده بس انا كان نفسي أقول حاجة و قررت أعملها مفاجأة و أقولها هنا, بعد إذن الجميع طبعا.

إيه؟؟ أنا مين أصلا؟!!, اه... معلش أنا أحمد نجيب. أخو سخسخوتي -بكل فخر-. خلاص؟؟ ممكن أتكلم بقى؟؟ شكرا.

إمبارح و أنا قاعد على البوابة (كنت كنجي بوابة) مش عارف إيه اللي فرقعها في دماغي إني أبص على البلوج بتاع مركب ورق في البحر, طلعت كده في دماغي من النو وير. أنا عارف إن سارة أختي تبقى أحد الستة متمركبي البلوج, بس عمري ما فتحته قبل كده. مع ان البلوج ابتدى رحلته من منتصف سنة 2007.

قصره فتحت البلوج نزلته عندي على الجهاز (شكرا لنوكيا و خدمات الـ 3G) و قعدت أتتبع رحلة المركب من أولها. حقيقي بلوج في قمة خفة الدم ده غير إنه بيظهر بشدة إن المجموعة دي عندها موهبة كتابة هايلة (صراحة مكونتش أتخيل إن سارة عندها الموهبة دي).

الأهم من كدة إني إكتشفت إني معرفش حاجة عن سارة أختي... و بجد إتصدمت و زعلت جدا جدا لما إكتشفت برضه إني نادر جدا ما بقعد اخد و أدي معاها في الكلام, اتواصل مع أختي العزيزة.

صحيح إني فكرت في الموضوع ده قبل كده كذا مرة, ويمكن حاولت كام مرة كدة أروح افتح معاها سِكّة كلام, خط حواري علشان أتواصل معاها, بس عمري ما أصريت أو كان عندي الـ commitment اللازم علشان فعلا أقدر أصل لأن تصبح سارة أختي سارة صاحبتي.

ف من مكاني هذا –دشمة بوابة الكتيبة- إسمحيلي يا سوسو أعتذر لك, و أوعدك إني ح أحاول تاني -و بشدة لحد ما أنجح- إني أكون أحمد صاحبك و صديقك... بجانب كوني على الأقل بيولوجيا أحمد أخوكي الذي أكونه الان.

و بناءاً عليه, إسمحيلي أطلب منك... لأ إستني لما أنزل على ركبتي كدة و أضم لك كفاي في رجاء... أيوة كدة, إسمحيلي أطلب منك: ممكن نتعرف, و نبقى أصحاب ؟؟

أحمد نجيب
دشمة بوابة الكتيبة
2008/11/18

هناك 11 تعليقًا:

حسن حنفى يقول...

ان شاء الله تبقوا اصحاب واحسن اخوات والله انا اما بحكي مشاكلي لاحتي الكبيره بحس انها شالت كتير من فوقي
دمتم بخير

sa'7so'7te يقول...

oh my god
i didn't believe it untill i've seen it with my own eyes
n it was a shock to me..a big one in the fact

i can't found the words for the 1st time..but i'll try ..
begad merse le kalamak ya7mad..we merse 2aktar 3ala mo7awletak le fat7 klam..bs 3ala fekra el3eb beyeb2a feya ana msh fek ,ana msh ba3raf 2atkalem bera7te m3 ay 7ad '3er ketabatan..matefhamsh leh..bs 2aw3edak 2awel matege melgesh hangarab sawa..belmara 2al7a2ak 2abl ma tetgawez :D:D
begad ana msh 3arfa 2arod 2a2ol eh..kefaya enak 2ehtamet enak tefta7 sekket kalam..we begad wa7eshne (msh 3ashan elpost walahe):D:D
5od balak mn nafsak plz

Zika يقول...

ايه يا جدعان
هو انتوا مش ساكنين مع بعض ولا ايه
ولا انتي قاعده في اوضه وهو قاعد في اوضه
:D

عموما انا واخويا صحاب جدا لكن عمري ما فكرت اني اتكلم معاه الكلام اللي يقصده احمد نجيب بيه ( اللي منور الفرح ) ولا عمره فكر يكلمني
الموضوع مالوش علاقه بالصحوبيه
خليكوا اعداء احسن
اضربوا بعض
تلاقيها قاعده علي الكمبيوتر شد الفيشه واطلع اجري
بما انك معاك الباسوورد ( ادخل علي مدونتها وامسح كل حاجه )
معلش اصل انا بحب الحاجات دي اوي
انا الشيطان معلق بوستراتي في اوضته وبيعتبرني مثله الاعلي
:D
ربنا يخليكوا لبعض

ghoneem يقول...

بس يا جماعة أحسن أنا كدة هعيط

موضوع جميل بجد ومشاعر راقية جدا منك ياأحمد تتحسد عليها

انتو بجد حاجة جميلة جدا وأكيد سارة هتسمحلك وأكيد هية حظها حلو ان ليها أخ زيك

وانت كمان ليك أخت فعلا مثقفة ومهذبة ويكفي انها عضو من أعضاء الستة بتوع صيدلة

فرحت جدا جدا جدا بالبوست ده
ربنا يارب يوفقكم وتبقي صفحة جديدة

أحمد يدور فيها علي سارة دايما
وسارة تفتح قلبها وعقلها لأحمد أخوها اللي بيحبها

دعواتي ليكم ويارب نسمع عنكم كل خير
مستني دايما أعرف أخبار حلوة زي دي

علي فكرة
ده وبلا منافس أحلي بوست شهدته مدونة المركب ..مركب الستة بتوع صيدلة

تحياتي

بالتوفيق........................

أحمد يقول...

اتفق مع د.أحمد غنيم في أن هذا أكثر موضوع مؤثر قرأته على مدونتكن + رد سارة عليه أيضًا

ربنا يخليكوا لبعض :)

شاب مصري مفروس يقول...

جميل اوي ان الاخوات يبقو اصحاب
للأسف دلوقت كل واحد في سكته
والحوار في البيت بقي نادر بين الاب والام والاولاد مع بعضهم
ربنا يخليكو لبعض يا رب

AmR يقول...

الله .. البوست جامد يازميل ..

وفعلاً عندك حق في كلامك :)

ورد سارة هيخلي الدمعة تفر من عيني

:(

Bongo يقول...

بوست جميل جدااا
و واضح انه طالع من قلبك فعلا ..
ربنا يخليكوا لبعض و تبقوا سند لبعض في الدنيا و الآخرة

بجد بوست جميل :)

الفراغ يقول...

انت احسن احمد فى العالم
جميل جدا انك تاخد بالك لوحدك ان مش صاحب اختك وتبدأ تبحث عنها وتترجاها انها تبقى صاحبتك
اتمنى ان تدوم صداقتكم طول العمر

الدرعمي يقول...

والله انت جدع يا أحمد ،، سنين طويلة بتعدي علينا من غير ماناخد بالنا إن اللي ساكنين معانا في البيت ،، أهلنا واخواتنا ،، ممكن يبقوا أهم أصحاب في حياتنا والفرق اللي هنلاقيه كبير جدا ، أخويا بادر بضمي لقائمة أصدقائه مؤخرا وأنا فرحت جدا بقراره ده وحاسس إنه هو كمان فرحان بي .. ربنا يوفقكم جميعا ويبعد الشياطين عن بيوتنا عشان ماتبعدناش عن أهلنا واخواتنا حبايبنا @ تحياتي @

myegy يقول...

ان شاء الله تبقوا اصحاب واحسن اخوات
اتمني ان تزوني
WWW.MYEGYTUBE.COM