تانى حاجة احنا اخترنا التاج دا لانه اطول تاج و طبعا معروف عننا الرخامة يعنى مش جديدة
4 مننا بس اللى هيجاوبوا لان مى مسافرة
كل يوم واحدة فينا
فكرنا نقفل الردود على البوست ده.لاننا مش عايزين نشوف ردود هنا ...مش بنطرد حد لا سمح الله...احنا عايزين نشوف الردود عندكوا على بلوجاتكوا ..بمعنى اصح كل واحد دخل و شاف التاج دا لااااااااااااااااااااااازم يجاوبه
يعنى منشوفش رد الا و بيقول انا هجاوبه او جاوبته ..و الا ستصيبه لعنة الستة ..ربنا يحفظكوا منها
لاننا لازم نغمس التاج دا سوا
هنبتدى النهردة مع كهرمانة و بكرة فرد تانى من افراد الستة
سبع حاجات نفسى اعملهم :
1- نفسى ادخل الجنة
2- اجيب تقدير حلو الترم ده بما ان النتيجة بيقولوا انها قربت
3- اتزوج رجل صالح
4- ارزق ذرية صالحة
5- احنا الستة نفضل مع بعض على طول
6- نفسى اشارك فى عمل احس ان له اثر كبير فى نهضة المجتمع يعنى يساعد ناس كتير و ده فى السكة ان شاء الله
7- اكون مخلصة دائما فى اى عمل باعمله عشان اؤجر عليه
سبع حاجات معرفتش اعملهم
1- اطلع من الاوائل كل سنة زى ما بابا عايز و ده طبعا لانى مليش صبر على المذاكرة
2- اراجع القران اللى حفظته و ابتديت انساه و اكمل نصه اللى فاضل .... عمالة اتلكع مش عارفة ليه
3- انتظم فى زيارة مريض اعلم انه يحتاج زيارتى و لكنى مع الاسف لا اجد الوقت و احرزن عندما اعلم انه طلبنى و لم استطع التلبية
4- انتظم فى الرد و كتابة البوستات على البلوج و لكنى عاملة زى الريح اعصف فجأة و بعدها بقول عدولى
5- ابطل اكون موسوسة فى امور الدين و ده بيتعبنى جدا فى اداء الفرائض
6- بأنب نفسى كتير و بافكر دايما فى اللى باعمله و ده بيتعبنى برده نفسى الموضوع ده يقل
7- يبقى عندى وسط فى التعامل مع الناس للاسف لما باحب باحب اوى و لما باركه باكره اوى
سبع حاجات باقولهم دايما( صعبة اوى ده )
1- صباح الخير :)
2- حسبى الله و نعم الوكيل
3- استغفر الله
4- يا ابن الحلال او يا بنت الحلال
5- يا بنى ادم
6- تصبحوا على خير
7- سلامو عليكو
طبعا انا مستهبلة السؤال ده بس المشكلة ان لزمات الواحد فى الكلام لايمكن هو يلاحظها
سبع مشكلات فى حياتك ممكن تحلهم الفلوس
1- عربية الستة بتوع صيدلة
2- حد قريب منى عايزة اعمله مشروع ( الاقيله شغل يعنى )
3- تمويل المشروع الجديد فى صناع الحياة
4- اسافر برا و الف الدنيا و من تواضعى انى ممكن اتنازل عن الحصان الابيض بالفارس اللى عليه يعنى عايزة تذكرة نفر واحد هاه من يسلفنى :)
5- ممكن ادفع لاى حد و يكمل الاسبع حاجات دول ( الاسئلة صعبة اوى )
اعتذر عن الاكمال لان اغلب مشكلات حياتى ان وجدت مش بسبب الفلوس الحمد لله
سبع اماكن بحبها
1- جمعية صناع الحياة و كل ما يرتبط بها
2- بيت بريك
3- شرم الشيخ
4- الاقصر و اوسان
5- اسكندرية
6- الكلية
7- عند خالتو
سبع اشخاص بحبهم غير بابا و ماما و اخواتى (سهلة )
1- بريك
2- سخسوختى
3- لوزا
4- سنفورة
5- نورا
6- رنا
7- محجوز لبعد عمر طويل ( قولوا يارب )
سبع حاجات بحبهم اوى
1- تجمعنا عند بريك
2- العمل فى صناع الحياة
3- تهييسنا فى الكلية
4- المصيف لما يبقى معانا اغلب العائلة
5- الخروج مع اسرة خالو محمد
6- القعاد على الكمبيوتر و ان قل
7- الفضفضة مع نفسة و ان طالت
سبع مدونات بحبهم و بافتحهم اول لما ابقى اون لاين
دول اكتر ناس بتابعهم
1- ghoneem
2- دكتور بهدوء
3- سفاح كرموز
4- keda sponser
5-شيكساوى
6- بيتنا القديم
7- اللهو الخفى
كهرمانة
هناك ٢٥ تعليقًا:
ربنا ينولك كل احلامك ويكتبلك اللي فيه الخير ويرضيكي بيه
انا حسيت بفرحة بجد لما قريت اجاباتك..
وسعيد ان لسا فيه ناس لها احلام جميلة زي دي
ربنا يحفظك..
تحياتي :)
كهرمانة
انا اول تعليق
هههههههههههههههه
اية النشاط دة
علي فكرة اول مرة اكون اول تعليق في مدونة الستة
وحظك بقي يا كهرمانة ان انتي الي هرد عليكي
بصراحة يا جماعة كهرمانة وسخسوختي
هما اكتر اتنين بيجوا عندي المدونة
المهم اجاباتك بجد تموت من الضحك
وخصوصا حاجات بتقوليها دايما
ربنا ينولك كل الي بتتمنيه
ويحقق لك كل الي بتحلمي بيه
اهم حاجة لما النتيجة تبان تطمنونا
وربنا معاكم
ايه التاج اللى كله سبعات دى
لاء المفروض كنتوا ترفضوه لانكم ستة..ههههههههههه
طب بما انى لبست التاج كده كده...فقلت اصبح عليكى الاول يا كهرمانه...ياريت كوباية شاى معاكى (",) وهرجع ارد تانى..:)
أحلامك بسيطة وبريئة أوي وبجد جميلة
ربنا يخليلكوك لبعض
وتجيبوا تقديرات حلوة
تحياتي
وحشتووووووووووووووني يا ست بنات
بجد والله مدونتكم من المدونات اللي بحبها جدا .. ليها طابع مميز كدا بيشدني ..
وكهرمانة اجاباتك جميلة أوي .. والتاج دا عجبني .. بس صعب اوي البسه
:D
ايه الاجابات الجامده دي يا كهرمانة :D
ربنا يكرمك و تحققي كل اللي نفسك فيه ان شاء الله
و منتظرين بقية اجابات الستة
سلاااااام
أهلاً بيكي
جميلة جدا ردودك وتعبر عن شخصية طموحة متزنة ننتظر منها الكثير والكثير ان شاء الله
أتنبأ ليكي بمستقبل جميل وحياة موفقة ان شاء الله
وأدعو ليكي بصلاح الزوج والذرية وصلاح الدين وصلاح القلب
عجبني جدا التاج وعجبني أكتر ردودك
استغربت بس اني من المدونات "الأول كمان " اللي بتشوفيهم
بأمارة ايه يعني ؟؟؟؟؟؟؟؟
ماشي يا "أنا شامم ريحة جرجير "مش عارف جاية منين
:)
بهزر طبعاً
تحياتي
بالتوفيق...............
انا حليت الواجب
عايز حاجه حلوه بأه
إجايتك جميله جداً
تحياتى ليكم كلكم
ومستنين إجابات البقيه
:D:D:D . . . mesh 3aref 2a2ol eh . . > So . . el ta3lee2 hwa :
Allaaaaaaah :-|
ههههههههههه
حلو التاج ده
وهبقى ارد عليه بعدين
بس على فكرة مدونتى زعلانه منكم
علشان مقولتلهاش
كل سنه وهى طيبه
صباح الخير يا كهرمانه
ايه التاج التخين ده
ده فيه حاجات كتير اوي
وانا ان شاء الله هبقي اجاوبه لما انزل البوست ان شاء الله
قريته بس ممكن أعمل هندى وما اردش عليه :D
mero
ربنا يخليك
شكرا على ردك الجميل و باحمد ربنا ان فى ناس لسة بتفرح لغيرها
abd-alrahman
احنا اللى نقوللك ايه النشاط ده
اخيرا خدت مركز
ربنا يبسطك كمان وكمان
و لما النتيجة تطلع هتكون اول واحد نزرغط فى البلوج بتاعه
safa7_karmooz
عندك واحد شاى للسفاح هنا عليه معلقتين دم و قلبه بالسكينة
اصل السكى غالى دلوأتى
eman
و الله انتى اللى جميلة و رقيقة
و انا باقرأ ردك حسيت انى اللى كاتباه بسكوتة
نور
احنا شعارنا ان التاج علينا حق و لابساه لابساه و لو واسع عليكة قوليلى و انا اديقه
bongo
اسمك شبه البانجو و شكلنا هنتلم سوا سوا كلنا كده قريب
حصلنا السطل قصدى الشرف
نورت البوست و مرسى على ردك
ghoneem
اولا شكرا على دعواتك الجميلة و ربنا يحققلك انت كمان كل اللى بتتمناه
اما بالنسبة للمدونات اللى بشوفها
انا بادخل قليلا او نادرا لكن مفيش مرة دخلت فيها الا و من الاساسيات المرور على مدونتك
بس انا اللى قعادى على الكمبيوتر قليل
و على فكرة بالنسبة للجرجير كل حاجة بتغلى و هو دلوأتى شاحح فى السوق و بكرة الطلب عليا يبقى بالملايين
oss
عشرة من عشرة برافووووو
مرسى على ردك
shady noga
الله عليك و خلى تامر يكملك الاغنية
الفراشة الصغيرة
عقبال مليون سنة صالحينا انتى بقةعلى المدونة خليكى وسطة خير
zika
صباح النور يا زيكا
لو مش عاجبك نعمله رجيم بس هيتاكل هيتاكل
نورت البوست
funckydoctor
هندى عربى لوندى لا مفر
يارب يكون الاسم السابع عما قريب لعمر طويل مش بعد عمر طويل
معلش علي الانقطاع بس جهازي شاشته ولعت(اتحرقت) كانت شاشه نضيفه و كبيره ربنا يرحمها
نسيت مهما ما تحولوا ترخموا بردوا دمكم زي العسل
يا عسل ده بعد اذن صاحب المدونه انا واخد اذن من كذا وسطه باني اعاكس في المدونه ديه اخرهم اذن من امن الدوله
إرسال تعليق