كنا واقفين البوست الى فات اننا اخر سنه كليه والواحد مش عارف هيعمل ايه بعد ما يتخرج واحساس رهيب بالتوهااان
المهم كل واحده فينا بعد ما اتخرجنا خدت هدنه مع نفسها
بريك اتجوزت و كهرمانه مسكت مشروع محو الاميه وسخسوختى خدت بريك م الكليه وانا روحت حجيت وغيرت جو ف السعوديه
وجه بقى وقت الجد ..
الشغل :S
الدكتوره ظوظو الحمد لله قدرت تشتغل ف صيدليه وقبضت اول مرتب كاى دكتور صيدلى محترم ..رافعه راس الجروب دايما والله يا ظوظو
البشمهندسه كهرمانه ايوووووه بشمهندسه لانها الوحيده الى قدرت متفكرش حتى ف كيونينه انها دكتوره ولا ان المفروض تنزل تشوف اكل عيشها
انا وبريك :بعد احساس رهيييب بتأنيب الضمير وعدم المسئوليه ناحيه الشهاده الى الكليه اتبرعت لنا بيها قررنا ننزل نشتغل ف صيدليه بمرتب صيدلى واحد ..احنا اكبر من الماديات دى المهم نبقى سوا ..كلمتين من عندى على كلمتين من عندها يمكن نعرف نعمل حاجه
روحنا للدكتور ف لقاء الاتفاق
احمممممممممممممممممممممممم
احنا : دكتور احنا عايزين نشتغل مع بعض وممكن نشتغل بمرتب صيدلى واحد عادى يعنى الماديات مش هتفرق
الدكتور :( ضحكه على خفيف )مفيش مشاكل ..اشتغلتوا ف صيدليات قبل كده
احنا : لا دى اول مره
الدكتور :و نزلتوا تدربوا فين بقى
بريك : انا نزلت وقفت ف جمعيه صناع الحياه قبل كده و لوزا نزلت اتدربت اسبوعين
الدكتور : بتعرفوا تقروا روشتات بقى
انا : حسب الدوا الى شوفته قبل كده ممكن اقراه والى مشفتوش مش عارفه لسه
الدكتور :( نظره يأس ) طيب تمام ..تحبوا تيجوا الساعه كام 8 ولا خلوها 9
احنا : احممممم دكتور احنا مبنديش حقن
بريك : احنا عارفين نديها ازاى بس مش بنقدر ندى حقن
الدكتور : متقلقوش هعلمكم
بريك: هى مش اننا مش عارفين بس احنا بنخاف ندى حقن
الدكتور: لا ان شاء الله واحده واحده وهتدربوا تحبوا تيجوا من امتى
احنا : ان شاء الله من التلات الى جاى
التلااااات واول يوووم شغل
بدأناها نشاط وجبنا الروشتات القديمه الى عند الدكتور وقرينا كل الى جربنا نقراه تقريبا وطلعنا الادويه من مكانها كانه شغل عادى وبعد كده رجعناها والدكتور استغرب ان اول مره نقرا روشتات والحمد لله عرفنا نطلع الادويه كلها
وبعد كده قعدنا نستنى زباااين وكل شويه حد يدخل نفرح ونقوم بقى هنستفتح يطلع الدوا ناقص ف السوق اصلا نرجع نقعد محبطين
لحد ما استفتحنا على بامبرز فرط مقاس 3
وحاله ملل تعم الاجواء
وفجأه الضهر ادن ..!!!!
وانا وبريك زى ما يكون جالنا الفرج
استأذنا الدكتور نروح نصلى وطلعنا نجرى من الصيدليه زى العيال الى بتزوغ من حصه ف المدرسه
صلينا واتمشينا شويه لحد سوبر ماركت تبضعنا... ورجعنا :((
شويه ودخل واحد بيقول خلع درسه ولسه متحمسه بقى انه هيسال على دوا ونشتغل OTC
لقيته بيقول ف شفافيه قشفت وعايز لها حاجه ..فجبنا له زبده كاكاو :S
وفين وفين بقى دخلت لنا جروب بناات طالع من المدرسه ونفس الفرحه الى بعشم الى بتجينا مع كل حد يدخل الصيدليه
طلع فيهم واحده ضافرها اتكسر وبتقولى ممكن تقصيهولى :S
قولت لها مش فاهمه يعنى انتى عايزه قصافه ولا عايزه ايه
قالت لى لا انا عايزاكى تقصيهولى عشان خايفه يدخل على اللحم
جرررررررررررررررررررررررررررررررررررررررررررررررررررررررررررررر
لا انتى تروحى تقصيه عادى وان شاء الله مش هيحصلك حاجه
وخلص الشفت بتاعنا كده وروحنا
وبعد تانى يوم قررنا انا وسمر نسيب الشغل بس عشان ميبقاش شكلنا عيال قدام الدكتور هنكمل معاه اسبوع ونجيب حد تانى مكانا
هناك تعليقان (٢):
بعد الاستئذان بدخول المركب
السلام عليكم ..
ازيك يا لوزا وازي بريك وسخسوختي وكهرمانة واستة كلهم عاملين ايه ..؟؟ يارب تكونو بخير وفي أحسن حال
فرحان بجد بالبوست اللي كتبتيه لأنه عرفني أخباركم وطمني عليكم
طبعا ظوظو كالعادة رافعة راس المركب كلها
اما انت وبريك انا مش فاهم يعني ايه مرتب صيدلي واحد ..يعني انتو من الاساس بتقدمو تنازل مع انكم جديرين بالشغل وأي صيدلية محترمة تشرف وتتشرف وتزداداكل يوم شرفا انكم تنتمو اليها ..
موضوع بقي البامبرز والحقن والأظافر المكسورة وزبدة الكاكاو ..فيا سيدتي انه الواقع
يعني انا من خلال معرفتي البسيطة بيكم لا اتصور انكم كنتو فاهمين مثلا انكم هتعملو تركيبات وأدوية أو انكو كنتو فاهمين ان القصة مش بامبرز وشامبو ..
فوقو بقي انتو اتضحك عليكو :)))
طبعا بهزر يعني
مش شماتة والله بس فعلا حاجة تقرف الموازين اللي بتختل حتي عندنا ف الطب بردو بقت شوارع والبيزنس بيحكم أخلافيات كتييييير وانا كمان لما فتحت العيادة وحسيت اني مش هعرف اشغلها الا بالبيزنس بقيت محبط جداا ومش قدامي غير اني أصبر وأحافظ علي مبدأي وأحاول أشغلها من غير البيزنس اللي بيدفع تمنه المريض الغلبان ..الي ان يقضي الله أمرا كان مفعولا
المهم انكو بخير وسعيد جدااااااا بمروري وعايز بس أذكركم بالصبر ومش تيأسو خالص الأيام الجاية بتاعتنا ان شاء الله دورو علي مكان يليق بيكم مش مكان انتو تليقو بيه للأنكم تستحقو الكثيييييير من الخير
تحياتي لأهل المركب
وطبعا دعواتي بالتوفيق
.......................
ايه يا لزلز النشاط ده !!
إرسال تعليق