انا عارفه انى بحلم
"كالعاده..السكشن 4 ساعات متواصله.و قبله سكشنين اصلا...بقالنا منه 3 ساعات مميته من الشرح النظرى "مع انه اساسا عملى"..و كالعادة يعيد الدكتور نفس القفشات ال"مضحكة" بتاعه كل سكشن..و كالعاده اول صف من البنات يضحكوا بشدة من خفه دم المعيد..واحنا مغلوبين على امرنا ..واحده عينيها ماشيه تاتا تاتا مع عقارب الساعه..و التانيه مستغرقه فى النوم..و التالته فقدت الامل و قعدت مربعه على الارض تندب حظها..و الرابعه عرفت الحل فوقفت فاتجاه القبله و قعدت تبتهل لربنا ان الدكتور صوته يروح.و الخامسه..ايه ده!! البت راحت فين؟؟الشباك مفتووووح..برييك..الحمد لله مانطتش..انتى يابت نزلى الازازة دى من على بؤك..السكشن قرب يخلص..يادوبك فاضله سنتين تلاته بس على ماالشرح يخلص..استهدى بالله يا حبيبتى
و بعد مرور السنين"هدر" .. نسمع احلى جمله تسمعها الواحده فينا فى حياتها .."و نيجى لآخر حاجة فى السكشن النهارده و هى ..."فيحس الدكتور بنفحه هوا قويه جايه من ناحيتنا و كالعاده يستغرب ..و فجأة كل واحدة تبص فينا للتانيه و تهز راسها انه "لا ان شاء الله مش هيحصل
" و لكن هيهات..نسمع نفس الصوت من اول صف بنات..لكن لأ المرة دى مش هنخاف..و ينهار السد..و و تنطلق نظراتنا لاول صف بنات و "اذن فالحرب"..اطير انا من على البنش وانزل من ارتفاع السقف على بطن اول بنت ..و كهرمانه جايه من بعيد بتجرى بسنجه فى ايديها و بتصرخ "لأاااااااااااااه" و بريك بتخلع حنفيه من المعمل و بتنزل بيها على رقبه البنت التالته و سنفوره تفتح البالطوا بتاعها و تطلع ال ار بى جى ..و لوزة جايه و فى ايدها .مسطرة..مسطرة!!!..بت فين الكرباج اللى اديتهولك!!...و فى خمس دقايق يكونوا العيال خلصوا على الاربع بنات و بيحاولوا يشيلونى من على البنت اللى وقعت تحت ايدى...ونطلع احنا الخمسه من المعمل بلاطينا بتطير ورانا و الدخان فى الخلفيه
"بعد 5 ايام..اثناء اخذ اقوال الضحايا بعد انعاشهم بالمستشفى العام..اجمعوا على عدم معرفتهم بسبب هذا الاعتداء المشين..و عن سؤالهم عن توقيت الحادث, اجابوا"اول ما بدأنا وصله الاسئله اللى عارفين اجابتها بعد الشرح..و اللى مبتاخدش اكتر من ساعة و نص!!!!"
هناك ١٤ تعليقًا:
إيه ده بلطجة ؟ :D
الأسلوب حلو أوي وخصوصا المفاجائتين دول:
---
و الخامسه..ايه ده!! البت راحت فين؟؟الشباك مفتووووح..برييك..الحمد لله مانطتش
---
و لوزة جايه و فى ايدها .مسطرة..مسطرة!!!..بت فين الكرباج اللى اديتهولك!!.
---
:D
حاجات غير متوقعة والنهاية أجمل :D
هههههههههههه
يستاهلوا بس مش اوووي كده يعني :)
ده انا بكون في درس ساعه ونص او ساعتين وبموت :)
بس مش رفعوا عليكم قضيه :)
ده حقهم القانوني :p
هههههههه
دا انتي طلعتي فقريه اهو
افقر مني شخصيا
اعترف اني ضحكت جامد جدا جدا
فكرتوني بالنينجا تيرتلز
بس اسلوبكم مش احترافي
عايزين كوتش بدل المعلم رشدان
انا ممكن افضي نفسي يوم الجمعة واجي ادربكم
مش قتال بس
كمان هاعلمك الرخامة
هههههههههههههههه
هههههههههههههههههه
ايه البلطجه دى؟؟؟؟
انتوا دكاترة ولا فتوات انا عايز افهم؟؟؟؟
بس برافو تسلم ايديكم
حكم العيال دول مايطاقوش واسألينى انا على الصنف دا:)))
تمام اوي ليكي مستقبل في كتابة حاجات كوميدي
وعارفه تستغلي مواقف كليتك المريره في انك تعملي مغامرات من دي
تحياتي
علاء عارفين
بعد 5 ايام..اثناء اخذ اقوال الضحايا بعد انعاشهم بالمستشفى العام..اجمعوا على عدم معرفتهم بسبب هذا الاعتداء المشين..و عن سؤالهم عن توقيت الحادث, اجابوا"اول ما بدأنا وصله الاسئله اللى عارفين اجابتها بعد الشرح..و اللى مبتاخدش اكتر من ساعة و نص!!!!"
--------------------------------
ههههههههههههههههههههههههه
انا قريتها من الاول الاسلوب جميل اوى بجد موتتنى من الضحك
هوة مش انتوا في صيدلة
يا جماعة دة حال كل صيدلي
ههههههههههههههههه
ربنا معاكوا ومعانا
تحياتي
شارك في الحملة الشعبية للقيد بالجداول الانتخابية وادعو غيرك.
ضع بنر الحمله علي مدونتك.
البنر موجود علي مدونتي
تسلم ايديكم
فعلا بيبقى نفسى أقتل الناس ده
باحس انهم قاصدين يخنقونا
معلش انا بعتذر عن تأخيرى
بس ادعولنا احنا هنبدأ الامتحانات
و ميرسى اوى اوى اوى على ردودكم بجد
هههههههههههههههههههههههههههههههههههه
دمك خفيف موت انا حسيت اني قاعده معاكو ومن كتر الزهق هقتل البنات بتوع الصف الاول بردوا
كاس داير علي كل الناس يا حبيبتي عندنا كده بردوا فبئنا نقعد احنا في الصف الاول عشان نجيب للدكتور اكتئاب:))
مين دول انتوا حايين مع مين ياأفندية:)
د/هيما
ياااه
والله رجعتوني لجو المحاضرات
كانت ايام
:D:D:D:D:D
علي فكرة انتي وصفتي في البداية كل اللي بيحصل في كليه الصيدلةخصوصا موضوع الهزار بتاع المعيد
تمني ان تزورني
www.myegytube.com
إرسال تعليق