مغلق للامتحانات

22-1

الستة بتوع صيدلة

البقاء لله وحده

"البقاء لله وحده" جمله بنقولها كتير بس مش كتير بنبقى صادقين فى احساسنا..او بمعنى تانى مش كتير بنبقى راضيين بيها..و كتير بنقولها عشان نمنع شيطان انه يدخلنا من باب حزننا على موت حد فنقول الجملة كذا مرةحتى لو فى دماغنا..اول مرة نبقى بنقولها عشان اتعودنا نقولها اول مايموت حد سواء عزيز علينا او لأ و تانى مرة نقولها نبقى بنقولها عشان نخرس تفكيرنا من انه يقول"ليه مات" و تالت مرة بنقولها بنبقى بندعى ربنا باسلوب غير مباشر انه يرضينا بقدره و يهون علينا الفراق

انا مش بقول ان كل الناس كده بس على الاقل انا حياتى كلها كانت كده

لحد من 3 ايام بالضبط...لما جدى توفى...مش عارفة ليه ماتزلزلتش من جوه زى كل مرة...مش عارفة ليه ماتصدمتش و مابكيتش...انا بكل تلقائية لبست هدومى عادى و نزلت الكليه و عشت يومى عادى..اتصلت ببريك اقولها انى مش هجيلها و اتصلت بكهرمانة طلبت منها تعرف لوزة انى مش رايحة معاها عند بريك..و لما كهرمانة سألتنى ليه قلتلها جدو اتوفى..لقيتها بتقولى "وانتى عادى كده؟!!"السؤال ده رجع فوقنى..انا ليه مش حسة بأى تأثر رغم انى كنت بحب جدو جدا..السؤال ده فضل كل دقيقة و التانية يطلع ادام عينيا مع كل حد ييجى يعزينى..و قلت يمكن انا مصدومة فبنكر حزنى على جدو حتى ادام نفسى..و فضلت خايفة من اللحظة اللى هفوق فيها من صدمتى و من اللحظة اللى هفضل افتكر فيها جدو و كلامه عن انه عاوز يشوفنى من الاوائل على الجمهوريه و كلامه عن الصيدليه اللى هيفتحهالى فى الشقة اللى تحت و كلامه عن اننا نسيب شبين و نرجع نقعد معاه فى البلد و افتكر صوته و هو بيقرا قرآن بالليل فى الايام اللى بات فيه عندنا و استغرابى انه بيختم القرآنكل يومين فى رمضان..وافتكر صوته وهو بيصلى بيا انا وشادى..و افتكر زمان لما كان بياخدنى الارض انا و احمد و مصطفى واحنا صغيرين و لما قعدنا نحاول نشد الجزر من الارض و افتكر و افتكر وافتكر...

و شويه و قلت لنفسى انى الطبيعى مااضايقش من قضاء ربنا..وان الطبيعى انه جدو مات..و انى مش متضايقة لانى عارفة انه راح عالم تانيه احلى كتير من هنا مع صحبة احلى كتير من صحبتنا و لانى عارفة ان ربنا جمعه بناس زعل معانا كتير على فراقهم..و انه ان شاء الله ذنبه مغفور و ان ربنا عفو كريم وفضلت مقتنعة بالكلام ده لحد ما بدأت كتابة البوست ده

ساعتها بس عرفت انى بضحك على نفسى و الا ايه معنى انى مش عارفة ابطل عياط و انا بكتب

البقاء لله وحده..البقاء لله وحده...البقاء لله وحده

sara

حكاية بنت

قضت البنت على نفسها

لما فضلت طول عمرها

تحكى حكاية مش حكايتها

تكتب قصة مش قصتها

خايفة تحب الشاطر حسن

يروح و يسيبها و ميرجعش

خايفة تنادى الفارس الاخضر

يروح وكانه مبيسمعش

خايفة تطير برا القصة

تلقى الحلم الطاير ريش

قضت البنت على نفسها

لما فضلت طول عمرها

خايفة تبص ل صورة لها

تطلع صورة بهتانة

مفيش برواز

مفيش الوان

مفيش تحابيش

قضت البنت على نفسها

لما فضلت طول عمرها

ماسكة الفرش مبترسمش

ماهى خايفة ترسم لوحة

تلقى الزيت ميكفيش

break

فانتازيا سنفورة

تعمل ايه لو كنت نايم و سمعت صوت المنبه ضرب فقمت "رغم انفك"غسلت وشك و لبست هدومك و سرحت شعرك و نزلت جرى لانك كالعادة متأخر فركبت عربيتك او ركبت الاتوبيس و ناهيك عن زحمة المرور و خنقة الاشارات المهم وصلت شغلك او الكلية بتاعتك و اصطحبت بوش المدير بتاعك او دكتور المادة الخنيقة اللى انت مابتحبهاش ده غير وش اصحابك اللى انت لسه سايبهم امبارحززو رحت اشتغلت او حضرت محاضرة و غالبا مافهمتش منها حاجة و بعدين نزلت عشان تفطر "ما انت يا عينى نزلت جرى من غير فطار"و بعد كده رجعت تانى لشغلك او محاضرتك.المهم فى اخر اليوم روحت برده فى الزحمة و رجعت بيتكم زهقان و متضايق فاتخانقت مع مراتك لو متجوز او مع مامتك لو كنت عايش مع اهلك و يدوبك غيرت هدومك و اتغديت و بعد يوم طوييييييل اووىىى و ممل جدا لسه ماحطتش دماغك على المخدة عشان تنام سمعت صوت المنبه بيضرب و و ايد مامتك بتخبط على كتفك و بتقولك اصحى بقى عشان انت اتأخرت و اذ "تفوجأ"و يفاجأك القدر "فى نفس الوقت"بانك كل ده كنت نايم بتحلم ز هيكون رد فعلك ايه؟؟؟طب هيكون جسمك تعبان ولا مرتاح؟

طب تقدر تقولى دلوقتى وبأه انت نايم ولا صاحى...تقدر تأكدلى انك صاحى ما يمكن ده كمان كله حلم و انت مش عارف ... ومش عايزة حد يقولى الحياة حلم كبير و الحاجات دى عشان مابحبهاش

عايز رأى العلم فى الموضوع ده؟!!

انت تقوم تغسل وشك كده فى السريع و لو جنبك حد بس يكونص احى خليه يقرصك عشان ترد عليه و انت فايق

thanks 4 ur patience

فانتازيا

تحديث:معلش يا جماعة سنفورة بتعتذر عن الرد حاليا عشان معندهاش نت وعشان المذاكرة

مش عارفة ليه

مش عارفة ليه كل حاجة حلوة بتحصلى ببقى خايفة اوى من الحاجة الوحشة اللى بعدها ....كتير مش بلحق افرح بالحاجة الحلوة دى لانى بفضل احسب ازاى اتفادى الحاجة الوحشة اللى بعدها

اليومين دول انا فى حاجة حلوة اوى اوى اوى بس رغم كده قاعدة احسبلها ...قاعدة احسب يا ترى انا سيّبتها اوى؟ولا انا بس تجاهلت خوفى من اللى جاى؟...يا ترى يا سارة انتى مش خايفة من اللى بتعمليه؟.. يا ترى انتى واثقة و متأكده؟..يا ترى نهايه الحاجة الحلوة دى ايه؟حلوة و لا وحشة؟.يا ترى يا ترى يا ترى

لحد ماتتقلب فرحتى دى لقلب مقبوض خايف من اجابات الاسئلة دى....ساعتها افضل افكر و اقول يا رب.. يا رب الحاجة الحلوة دى تبقى كويسة ليا .. يارب تكون راضى عنها...يارب لو كزيسه و راضى عنها خلينى اكمل فيها... يا رب لو مش كويسة و مش راضى عنها... خليها كويسة و ارضى عنها بئا :) و لما عقلى يوصل للجمله دى ساعتها بس استريح و اقول ان شاء الله ربنا يبقى راضى عنها

عارفة انى كلامى اهبل و صدعتكم بس انا لما ببقى فرحانة اوى ببقى عايزة اقول للناس كلها

......................................................................................................................................

و ياريت بلاش ردود من اى حد عشان انا قصدت اكتب الكلام ده على البلوج عشان اتكلم انا لما ابقى عايزة اتكلم و مش عايزة اسمع

from sara with love

عصف الهواء

حياتى مليئة بالخبرات ..و كل حياتى لا تتعدى لحظات

مررت بعاشقين يتهامسان.. اصابعهم تتشابك فى حنان .. رايت لهفتهم حين اللقاء و رأيتها حين الفراق

رأيت طفولة بريئة تهيم بحب ام مليئة بالحنين. تحمله بين ذراعيها للأمان فيلامس وجهها صباعيه الواهيان

رايت عراك و شجار و انفصال و حب يضيع و يفقد تحت الركام.

.رايت براءة انهكها الارتباك فتنهار بين حزينة و باك

..رايته ينظر لعصفورين يطيران يلفان حول ابناء صغار

.رأيت نظرة امل فى عينيه اعادت الحياة الى و اليه..جعلنى انتظر و ابغى البقاء لارى لحظة العودة و اللقاء لاثبت ان الحب لا يضيع هباءولكن..........

حياتى فاجأها الفناء .. لأسقط و ارتطم بأرض الجفاء ... فما انا سوى كيس طائر اطاره الحظ و عصف الهواء

from sara with love

العدد الخامس من مجلة الستة بتوع صيدلة

أولا احنا بنعتذر عن التأخير المرة دى ...و دا طبعا ل ظروف الامتحانات

و كمان المجلة مش أد كدة

بس اهو اى حاجة تيجى مننا حلوة :D

جوا العدد المرة دى هتلاقى فجأة فى صفحة التسالى عيد ميلاد احد افراد الستة بتوع صيدلة و الكثير من المفاجات بانتظارك بس اشترى العدد :d

مجلة الستة بتوع صيدلة...و هل يخفى الخبر؟

بنعمل اعلانات اهو

اولا الصفحة الدينية

هيا رسالة لحد معين -مع اننا عارفين ان الحاجات دى مش بتأثر فيه-

قال تعالى { أَوَلَمَّا أَصَابَتْكُم مُّصِيبَةٌ قَدْ أَصَبْتُم مِّثْلَيْهَا قُلْتُمْ أَنَّى هَذَا قُلْ هُوَ مِنْ عِندِ أَنْفُسِكُمْ إِنَّ اللّهَ عَلَى كُلِّ شَيْءٍ قَدِيرٌ } [165: سورة آل عمران]

[[البر لا يبلى والذنب لا ينسى والديان لا يموت, افعل ما شئت فكما تدين تدان]]

__________________________

صفحة خاصة

توفت الى رحمة الله ابنة أسامة- بيتنا القديم-

الموضوع لمن يرغب فى تعزيته

http://osamaislamic.blogspot.com/2007/11/blog-post_29.html

ان شاء الله تكون شفيعة ليك يوم القيامة يا سمسم و تجتمع بيها فى الجنة

___________________________

صفحة التناحة

تخهعابؤثابصعقثلغاقبلؤ صلغافبؤقثبفلغؤغافقلبلربقغثفبلغثف

لقيتنا انه من التناحة اننا نكتب ب نفس لون البلوج عشان نعميكوا و تضغطوا على الكلام متلاقوش حاجة ليها معنى تقروها

محدش يضايق

دى تناحة بس

حدد بالماوس عشان الكلام يظهر

____________________________________

أخبار اليوم

عيد ميلاد كهرمانة الشهر ده

كل سنة وانتى طيبة يا كهرورتنا وعقبال مليون سنة و يارب تفوزى بالتوب بوست عشان منجبلكيش هدية على التوب بوست انتى كمان

_________________________

صفحة التسالى " كايدة العزال انا من يومى ايوة اه"

احنا من كتر الشهرة و الحمد لله فى ناس عملتنا بلوج مخصوص

مش ناس هوا واحد كان طمطم اللى بيرد عندنا لو خدتوا بالكوا

المهم انه عملنا بلوج مخصوص و حاطط صور حصرية لينا فى رأيه زى ما هو شايفنا

الغريب بئا لو هوا شايفنا كدة امال بيشوف نفسه ازاى فى المراية

:d

البلوج اسمه

مركب ورق فى الترعة

الستة بتوع صندلة

اللى عايز يفتحه يدوس عليه فوق

بس بجد ضحكتنا جدا جدا جدا و احنا كنا فى مود سىء جدا

شكرا ليه بجد

وبما ان محدش بيدخل البلوج عنده ف احنا قلنا نعمله دعاية

متتوصاش بينا فى الصور اوى عشان العرسان

كهرمانة بتقولك شسوفلها نسناس حلو

__________________

صفحة الهوم ورك

احنا بقالنا كتير اوى مكناش نزلنا تصويت على التوب بوست

ف هنعمل ان شاء الله تصويت على كل الشهور اللى فاتت على ايدك اليمين و انت داخل البلوج

تانى حاجة متنسوش تقوللنا رأيكوا فى البلوج اللى معمول علينا

تالت حاجة متنسوش تدعولنا بجد لاننا مزنوقين فى الامتحانات

رابع حاجة متنسوش تقولوا ل كهرمانة كل سنة وانتى طيبة

خامس حاجة و صوتولها فى التوب بوست عشان منجبلهاش هدية على التوب بوست يببئوا اتنين فى واحد :D

متنسوش تعملوا الست حاجات اللى فوق

الستة بتوع صيدلة

لم تكن فارس احلامى

لم تكن يوما فارس احلامى

ولم تمر لحظه بخيالى

لم تكن يوما طويل الساقين

قمحى الوجنه عريض المنكبين

وعيناك التى كلما بحثت عنها

اجدها تختبئ خلف تلك القطع الزجاجيه

وكانما تريد ان توارى لونها عنى

فهى ليست العسليه التى لطالما حلمت بها

ولكننى وجدت فيها ما يفوق هذا سحرا

فيكفينى سحر الحب الذى طغى على لون عينيك

وانساب على عضلات وجهك لترسم اجمل ابتسامه عندما ترانى

يكفينى دموع قلبك التى خالفت قانون الجاذبيه

وصعدت لتظهر على وجهك

عندما ترسم الاحزان لوحاتها فى عينى

يكفينى خوفك على من النسمات التى تداعب وجهى

ظنا ان وجنتى ارق من ان تداعبهما تلك النسمات

يكفينى نظره عينيك والغيره تكاد تقتلها

كلما مر هواء بجوار اذنى

ظنا انها تحمل كلمات لغيرك

وان لم تكن لى تلك الكلمات

يكفينى تركك تلك البيض من اللفائف

بمجرد معرفتك كرهى لها

حقا فانك لم تكن يوما فارس احلامى

ولكن فليكن فارس احلامى انت

........................................

دى حاجه كتبتها بعد فيلم رومانسى

انا متقمصتش دور البطله ولا حاجه

بس لقيت نفسى ماسكه ورقه وقلم وبكتب

وبصراحه يا جماعه بفكر اعملها قصه

هى الفكره فى دماغى

بس لسه مكتبتش حاجه غير الجزء ده

فلو قدرت اخلصها يبقى ان شاء الله اجزاءها هتنزل فى ميعاد البوست ده

اه .....هى مش هتبقى باسلوب قصصى قد ما هتكون خواطر متسلسله

وهحاول ان كل خاطره تكون مستقله بس احداثها مترابطه

اقولكم انا هوفر عليا وعليكم وكفايه عليكم اوووى دى:D

loza

احنا ادسترنا و الحمد لله

خالص الشكر و التقدير للأستاذ شاكر فودة على الكلام الجميل ده

الحمد لله تم نشر مقالة عننا فى جريدة الدستور الاسبوعية الاربع اللى فات

و هنحاول ان شاء الله نرفع المقالة و نوريهالكوا

واللى شافها طبعا يقولنا رايه

صفحة 12 جريدة الدستور صفحة المدونين و المدونات على ايدك اليمين

الستة بتوع صيدلة

دوامة اكل العيش و البلدية

بصراحة اول مرة اكتب البوست على البلوج على طول من غير ما اكون محضرة

فاستحملونى بقة

موضوع مدايقنى جدا جدا هى حاجة موجودة من زمان بس هاجت شوية فى الوقت الاخير

نسمع كلنا منزمان عن بتوع الانضباط

الراجل يبقى قاعد فى المحل لا بيه و لا عليه هب دب شوية عساكر قدامه كسر ياابنىاليافتة ده احسن طالعة لبرا شوية

مش بعيد كسرها برده عشان لونها مكنش عاجبه

خش على المحل اللى بعده ايه ده فىشوية مية مكبوبين على الرصيف النضيف طبعا ادفع غرامة !!! اد ايه ؟؟؟ الف كويس

ده اللى بنسمعه

و اخر ما سمعت و لكن من احد الثقات انهم نزلوا فى شارع عندنا من ازحم الشوارع بتاع البيع و نزلوا على الاكشاك اللى فيه ودهسوها و لما اتنين ستات اتكلموا و صوتوا و قعدوا يقولوا اكل عيشنا

كانت النتيجة ان نزلوا عليهم يالعصيان لما قالوا يا بس

حالة تانية

راجل فاتح عربية بيعمل عليها سندوتشات مش مجوز و بيصرف على ستة اخواته و مجوزش عشان مفيش اللى يجوزه قفل من بدرى و ساب العربية فى الشارع جم الله ...يسامحهم و هدوا العربية و لولا شوية ولاد حلال شالوا البرطمانات اللى بيعمل منها الاكل من العربية كانوا بقوا راخرين بقوا الارض

و سيبر كان فى نفس الشارع خدوا منه تلت كمبيوترات !!!! ليه ؟؟؟ كده

انا طبعا عارفة ان الناس ده بعضهم مبيدفعش ضرايب اذا مكنش كلهم لان العربيات بتاعتهم و الاكشاك ده بتبقى من غير تراخيص اساسا و بيشغلوا الطريق العام كمان

بس بيتهيألى انا عندى اقف فى زحمة الطريق المشغول احسن الف مرة من انى اقفل باب رزق على رب اسرة كل مشكلته فى ظل زمن الغلاء اللى احنا فيه انه مش بيعمل زى ناس كتير اوى و يسرق و ينهب انما كل ذنبه انه عايز يكسب بالحلال

هو انا لما اقفل لواحد من دول باب رزقه يعنى على طول لا سحر و لا شعوذة هتبط عليه ثروة من السماء يأكل بيها عياله و للا اخواته

لا اكيد يا اما هيفتح تانى نفس الكشك و يهدوه تانى و ندور فى نفس الحلقة

يا اما هيتجه اتجاه مباشر نحو الجريمة اللى هى هتكون اخر بابا يفتحه و يمكن لفترة طويلة جدا ميهاجمش و هو مجرم نفس الهجوم اللى اتهاجمه و هو بيسعى لاكل عيشه لانه ساعته ملوش سوابق فهيدارى عن العين شوية

و ابقى استفدت ايه لا دفعته ضرايب و لا سبته يعيش حلال

بس خلقت مجرم فى البلد

طب ما هو ممكن مثلا يعملوا شارع مخصص للاكشاك و عربات البيع ممنوع دخلوه من العربيات خالص و ساعتها مش هيكون فى شغل للطرق العام و لا حاجة و مجتش على ضرايب الناس الغلابة اللى محتاجين صدقات اصلا و فى ناس ناهبين البلد و اهو لسة معمول لستة كبيرة اتذاعت فى التليفزيون عن الممثلين المتهربين من الضرايب و اللى ضرابيهم لو شلتوا عشر ارقام من على الشمال هتمثل عشر اضعاف الدخل السنوى للناس الغلابة ده

مش عارفة الشرطة بقوا مالهم اثار فى نفسى كتابة هذا الموضوع الان رغم انه جوايا من فترة قضية عماد الكبير اللى اتذاعت على العاشرة مساء و اد ايه مأثرة فى الناس كلها

صعبان عليا فى كل اللى بيحصل ده نوعين من الناس :

الاول هو المواطن المطحون فى دوامة اكل العيش و يلاقى فجأة مرة واحدة عنتظية ظابط شرطة بتحطم حياته زى بعض بتوع البلدية المتعجرفين اللى فرحانين بنفسهم و راجل ليس له حيلة بيوطى على جزمتهم يبوسها عشان ميدمروش رزقه و رزق عياله و الظباط اللى بيتعاملوا مع كافة انواع المجرمين سواء كانوا يستاهلوا او ميستهلوش بأسوا اساليب الاستهزاء و التعذيب

على الرغم من انه كظابط شرطة و اول واحد بيحترم القضاء المفروض يسيب القانون هو اللى يحكم على اى مجرم و ان اضطر الى استخدام بعض انواع الشدة فانا اقول الشدة و ليس التعذيب

و النوع التانى : هم ظباط الشرطة الاشراف اللى ملهمش ذنب فى عجرفة بعض رجال البلدية و عنتظة بعض رجال البوليس اللى عندهم نقص فى تكوين شخصاياتهم او سوء فى تربيتهم

الظباط دول الناس بتكرههم بدون اى ذنب فقط لانهم يندرجون تحت طائلة رجال الشرطة اللى احنا سامعين عنهم كذا و كذا

انا حسيت فعلا انهم مظلومين لما سمعت الشرطى اللى اتصل فى برنامج العاشرة مساء اد ايه كان متوتر و صوته بيتقطع من كتر الانفعال و خوفه من نظرة المجتمع ليه ؟؟

لو عرف كل ظابط من الظباط اللى هقول عليهم الاشرار دول اد ايه بيأثروا على الناس الغلابة و يكونوا هم بنفسهم سبب لجريمة ممكن يمنعوها

و اد ايه هو بيأثر بالسلب على سمعة ظباط زمايله ملهمش اى ذنب فى فعلته

و يفكر فى اهم حاجة

اليمين اللى حلفه و اللى هيتحاسب عليه ادام ربنا

و حسابه يوم القيامة على كل فعل قام بيه فى حق عباد الرحمن بدون وجه حق فالرحمن الحق ان لم يخلص هذا منه فى الدنيا فحسابه عسير فى الاخرة

و فى النهاية لا ادرى حلا و لا اثير مشكلة و لكنى فقط اردت ان اثير ما بنفسى

و زى مافيه ظباط مبيحترموش عمله و بيستغلوه فى تسخير الناس لخدمتهم مع العلم بان ما اخذ بسيف الحياء فهو حرام

و هو ليس سيف حياء فقط بل هو سيف قهر و خوف,, فى ناس مبتحترمش الظباط و بتهنهم

يعنى احنا من الاخر بنلف فى حلقة مفرغة كل واحد مشارك فيها

الشرطى الشرير و المواطن البلطجى( على الشرطة و غيرها ) و المواطن السلبى اللى بيسيب حقه و الشرطى الشريف الساكت على بعض افعال زمايله و الشرطى المظلوم اللى ملوش دعوة بده و لا بده و المواطن اللى بيتفرج

.................

و يا دنيا ياما هتورينا و على رأى الست مارى منيب خليها فى القلب تجرح و لا تطلع برا ترمح

\و اخيرااااا خلصت بعد تطوييل

اتمنى انكم تفهموا قصدى و يكون الموضوع مرتب الى حد ما حتى

لانى كاتباه لكم من القلب على الهواء مباشرة

ملحوظة:الصورة تصوير لوزة

kahramana

العدد ال4 لمجله السته بتوع صيدله

المجلة دى قررنا نقلب الموازين و نضيف صفحات و نشيل صفحات و ان احنا على اد مانقدر يبقى فى روح مشاركة بينا و بين البلوجات
التانية و اهو منها صلة رحم برضه

الصفحة الدينية

"لا تجعل الله اهون الناظرين اليك "

جملة تردد كثيرة فى المجالس الدينية سمعناها اكثر من مرة و عرفنا معناها كجملة ولكن عندما تحسها بقلبك ستغير الكثير من مفاهيم حياتك ..ستذكرك بحديث النبى صلى الله عليه و سلم فيما معناه ان من ارضى الله فى سخط الناس رضا الله عنه و ارضى عنه الناس و من اسخط الله فى رضا الناس سخط الله عليه و اسخط عليه الناس

و صدق رسول الله

فيما قال

ليس معنى ذلك ان تجاهر بذنب

و لكن اذا استحيت من فعلة امام الناس فاستحى من العلى العظيم ربك و رب الناس

فقلها و لكن بقلبك

صفحة الاهداءات

"لمحمد" "just humen"

من اكتر الناس اللى بتهتم بينا و مخدوعة فينا شايفنا حاجة كبيرة

و احنا هنساعده و نهديله نضارة نظر

بجد ميرسي يا محمد احنا مقصرين معاك جدا بس اعذرنا

واعذرونا كلكم يا جماعة بس دى امتحانات

و بنهديلك 6 وردات "مع النضارة"

صفحة التناحة

هممممم...نفكر فى ايه لباب التناحة النهاردة.... ايواان دى مش محتاجة تفكير .. نبدأ بأه

من اكتر الحاجات التنحة ان بنى ادم يخترق الدايرة اللى حوالين كل واحد فينا ..." دايرة ايه؟!!" هممم اقولكوا .. حوالين كل واحد فينا دايرة وهمية نص قطرها 25 سم .. الدايرة دى ما بنحسش بيها الا لما حد يعدى حدودها ساعتها نحس ان فيه حد بيتدخل فلى خصوصياتنا ... الصراحة انا امبارح كنت قاعدة جمب بنى ادم فى المواصلات بحكم الظروف .. المشكلو بأه ان انا كنت انا حساه بيعد انفاسنا انا و كهرمانة وسنفورة .. لو رفعت ايدى اعدل الشنطة يبص على شنطتى يجيب اللى جواها.. لو سنفورة كلمتنا بصوت واطى يقرب غشان يسمع .. بجد انا قعدت ساعة اللى ربع كل اجهزة الانذار بتضرب فى نافوخى .. كاننى الدايرة اللى حواليا تقلصت لاتنين سم اتحشرت فيهم .. ربنا ينتقم منه

والله البنى ادم ده حاجة من اربعة

1- انطس فى نظره و شايفنا حلوين _بس شكله ماشافش فرخة حتى قبل كده_

-فضولى زيادة عن اللزوم ومعتبر دايرة خصوصياته شاملة 30 متر حواليه

3-واحد فاضى فزهقان.. يارب اشغله يارب ماتسيبهوش فاضى ابدا

و دمتم

...........................................................................................

اخبار اليوم

الحمد لله احنا مش قلقانين من امتحانات الشيت

بنطمنكم علينا يعنى و مش محتاجين دعواتكم حتى وكمان بنحضر نفسنا عشان ترتيب الاوائل

وانشاء الله فى امتياز ميكرو يا صيادلة

و بريك طلعت الاولى على الفصل

و لوزة الاولى ترشيحات

و سنفورة اولى تخلفات

و سخسوختى اولى "*******" بلاش نقولكوا اولى ايه

وكهرمانة ورقها لسة فى التنسيق

و كانت معاكم صفحة الفشر من امام عربية ملك الفشار .شارع الاستاد

صفحة التسالى

واحنا بنتفرج فى البلوجات لاقينا فرقة حلوة اوى حبينا نعرفكم عليها هى فرقة "صبا" و الفرقة دى يا جماعة موهوبة

و هنكتب جزء من كلامات اغنية ليهم و نسيبلكو لينك البلوج و خوشوا اتفرجوا و مش هتندموا

دا لينك تحميل الاغنية

http://www.megaupload.com/?d=G4U80GBR

وده جزء من اغنيه بيكا الى فكرتها انه واحد بتاع روبابيكيا

مكركب فى روحك ودنيااك زحام

و قلبك يادوب مطرحين مهروسين...فوسع لنفسك مكان للحياة

وطل علينا ب شباك وحيد...تشوف المعانى ام جد و جديد

بيكياااا

الحاجات القديمة اللى مالية البيوت اللى زاحمة الأماكن...أشيل النجف و التحف و الدولاب القديم

فولغراف لجدك و صورة حبيبتك بدورق ازاز...السرير الحديد...الطشوت النحاس بلعبة بلاستيك...و ايامك اللى متعرفش حد...طفولتك و عقدك مراية قديمة و ملت ملامحك

بيكياااااااااا

الزمان المصدى ...الصحاب الاونطة...الوششو الخشب...نقشقش بقايا الحياة و الفضل

بيكياااااااااا

غناوى صبابا حزينة بنكلة

متعملش قلبك فتارين ازاز بقية حياتك تقضيها فرجة..ولو تحتفظ بانتيكة جوا فى قلبك تموت

__________________________________________________

الصفحه الصيدليه

anemia

اداه نفى an ومعناها دمemia كلمه لاتينيه من مقطعين الاولى

يعنى تقريبا ترجمتها مفيش دم والناس هى الى بتستذوق وتقول عليها فقر دم

المرض ده انتشر فى البشربغباء

والمشكله انه ظهر كمرض اجتماعى مش عضوى

يعنى نادر اوى لما تلاقى حد عنده دم اليومين دول

البجاحه والبرود بقوا شعار المجتمع

___________________________

صفحه الهوم وورك

الحاجات دى هووم ورك على كل زائر

اولا: تدعوا لنا كل يوم من السبت ان شاء الله من الساعه 1 ل2لحد السبت الى بعده

والبذات اخر يوم

ثانيا:ياريت الى اغنيتنا اشتغلت عندهم يقولوا لنا رأيهم

وياترى نعمل فرقه ولا ايه...!؟:D

ثالثا: احنا لغينا واجب التصويت الشهر ده

بس هيبقى فى الشهر الجاى ان شاء الله

السته بتوع صيدله

عيد ميلاد الليلة مين؟

تكملة لسلسلة اعياد ميلادنا

الشهر ده

بالظبط يوم 12-10

كان عيد ميلاد ضحكة الجروب سخسوختى او ظوظو

و عملنا عيد ميلادها فى الكلية

كان يوم جميل فعلا يا ظوظو رغم اننا وصلنا متأخرين بس كان جميل

كالعادة احنا اللى عملنا الاكل عملنا شوية تورتات كدة

او بامانة

كهرمانة عملت

و علفكرة يا جماعة كهرمانة تعبانة جالها تسمم :( قولولها الف سلامة بئا بالمرة

ممكن نفرجكو على شوية من التورت

بس العرسان بالدور لو سمحتوا

دى مكتوب عليها ظوظو عشان متحولوش

و اللى فى الصورة اللى فوق دا يا جماعة بئا shady shan للناس اللى تعرفه

دى بئا هدية جت ل زوزو فى عيد ميلادها بيقولوا انهم جابوها عشان لقوها شكلها

كل سنة وانتى طيبة يا ظوظو

الستة بتوع صيدلة

أرى الكثير

طرت شاعرا بالسعادة لتلك الحرية.. حرية اغتصبتها خلسة حين فتحت الغفلة باب قفصى...طرت اغرد بصوتى لاول مرةطرت انتقل بين ورده حمراء و اخرى زرقاء..طرت شاكرا ربى فقد أرانى الكثير مما احلم به
طرت لابعد و ابعد. لألمح السعادة فى عينى فتاة صغيرة شاهدت سعادتها حين رؤيته . شاهدت لهفتها حين لاقته . شاهدت خجلها من النظر لعينيه. شاهدت ادعاؤها بتجاهله رغم عدم قدرتها على اخفاء ابتسامتها
شاهدتها تطيل الحديث معه حالمة بتوقف الزمن فى تلك اللحظة
سمعتها تدندن"بحبك ما بعرف كيف" شاهدتها تحلم بعين ساهمة عين تنظر للفراغ ثم شاهدت هذا الفراغ يلفها حين راته مع فتاة اخرى تركب سيارته الفارهة.. شاهدت تحرك عينيها جيئة و ذهابا فى ارتباك منهار ... شاهدت الحقيقة فى عينيها. حقيقة ملأتها الاشواك فأدمت عينيها البريئة لتنهمر دموع دامية قطرة فقطرة فانهار. حقيقة انه لم يحبها ..بل اشفق عليها .. حقيقة انه لم يكن يبتاع مناديلها الرخيصة لرؤيتها و انما لتحسره على فقرها .. ثم سمعت صوت ارهبنى . صوت تشقق فانهيار.. صوت نابع من قلبها.. ثم شاهدت تلك النظرة الخاوية فى عينيها تلك العينين التى ملأتها السعادة ذات مرة.لأنهار بجانبها ارثى لحالى . ارثى رؤيتى لقلب ملىء بالنبضات ثم بالطعنات
ربى لما جعلتنى ارى الكثير

from zozo with love

sa7'so7'te

عدنا

سلام عليكم
يا جماعة احنا بنعتذر للناس اللى دخلوا البلوج الايام اللى فاتت و معرفوش
كنا بنغير اللوك
بس معرفناش نكمله للأسف
احنا فى اغنية عايزين نرفعها على البلوج و معرفناش للأسف
اللى عايز يتبرع و يرفعهالنا يقولنا ياريت
عملنا اكاونت للستة بتوع صيدلة بدل ما كنا كل مرة من عند حد
اول ما تخش البلوج هتلاقى صورة لينا احنا الخمسة دى مش احنا طبعا بس احنا شايفين نفسنا كدة الفترة دى
بمناسية الامتحانات
الشيت :(
3-11 ان شاء الله ادعولنا بئا

بعد كدة بنستعرض مواهبنا بئا
فى الغناء و التلحين والرسم و الرقص و كل حاجة
و طبعا مواهبنا فى الغناء كانت هتكمل بالاغنية اللى معرفناش نرفعها بس يلا تتعوض ان شاء الله


يارب يكون اللوك الجديد دا عجبكو
و الحاجات الجاية تعجبكو ان شاء الله

كل سنة وانتوا طيبين

فتح عينيه التى لم تغفل لحظة و معها انتبهت اذنيه لصوت ينبه او قد يكون صوت يحذره فأراد ان يهرب من الحقيقة و اغمض عينيه بشدة و تمنى لو يتحكم فى عضلات أذنيه لتغلق فتحتها فلا يسمع هذا الصوت و لكنه فوجىء بيد تضربه فى رفق و لكنه رفق مشوب بالتهديد فاختار السلامة و فتح عينيى فى يأس و تخلى عن محاولته اليائسة فى غلق أذنيه ثم تحرك فى بطئ و ضعف لينتقل الى مكان آخر اجتمع فيه أمثاله ليتناولوا وجبتهم الاجبارية..جلس فى موقعه المقرر له مخفضا رأسه فى ضعف غامضا عينيه محاولا عدم القيام بأى حركة الا الحد الادنى.فانطلق نفس الصوت يأمره بتناول الطعام _الذى لم يدرك انه اصبح من وسائل التعذيب الا فى ايامه تلك_ فرفع يد واحدة من يديه ليتحسس الطريق الى الطعام مصرا على غلق عينيه ليرتطم بطبق من طعام لا يعرف كنههو لم يحاول شغل باله بمعرفته. و تظاهلر بالأكتفاء فهبطت يديه بجانبه و لم ينطق بحرف .. ليحذره ذلك الصوت مرة أخرى أن اشرب هذا السائل .ليفكر فى التمرد و العصيان المتمثلين فى عدم تنفيذ تلك الاوامر و عدم تحريك اى من اطرافه للأستجابة .. ثم يتخلى عن تلك الفكرة ليرفع يده فى يأس و يتجرع الماء و تنتابه امال بعيدة مفرحة
أمال تبشره ان " ابسط يا عم فاضل كام يوم و رمضان يخلص و تبطل تصحى تتسحر . يعنى هتنام ليلة كامله يعنى يااهوووووووووووووووو"
ليبتسم ابتسامة لم ترتسم على شفتيه من قبيل الكسل و يتحرك كالمغيبين ليرتمى على سريره واضعا هدفا امام عينيه و هو ان ينام الساعتين الفاضلين قبل معاد الكلية
:)
............................................................................................................
كل سنة وانتوا طيبين العيد قرب . اى نعم الواحد زعل ان رمضان عدى من غير مايعمل حاجات كتير من اللى كان نفسه يعملها بس برضه الحق يقال انا فرحت جدا ان مش هيبقى فيه سحور بالجبار تانى ياهووووووو
يلا عيد سعيد عليكم كلكم و علينا احنا كمان
و سلامووووو عليكووووووووو
from sara with love

............................................................................................................

كل سنة وانتوا طيبين

احنا حبينا نعيد عليكو بدرى مصلحة

عشان ناخد العيدية منكوا قبل العيد

يلا يا جماعة

بسم الله

اللى هيحط فكة يحط هنا

واللى هيحط مجمد يحط هنا

احنا بنجمع الفلوس دى مش عشانا لا سمح الله

احنا بنجمع عشان نعمل النيو لوك الجديد للبلوج عشان زى مانتوا شايفين مهوى على الاخر

الستة بتوع صيدله

العدد التالت من مجلة الستة بتوع صيدلة

1- الصفحه الدينيه

الله

لله الاسماء الحسنى نناجيه بيها.. فنناجيه مرة بالرحمن ومرة اخرى بالغفار

المظلوم يناديه يا عدل اما الخائف يناديه بالسلام

صفحة الدينية

صاحب الطلب يناديه بالوهاب الرزاق

والمكروب يناديه يا فرج و المخطىء يناديه يا ستار

و حين نبدا يومنا نبدؤه بالجملة المعهودة " يا فتاح يا عليم يا رزاق يا كريم" لنجمع بين مطالعتنا للمستقبل و تمنينا الرزق الوفير

قد تتناقض اسمائه بين القابض و الباسط و الخافض و الرافع و بين معز و مذل" ليدل على شموليته و تعديه حدود ادراك البشر

ربما لذلك احب الاسماء الى قلبى هو "الله" ربما لانه جامع لكل تلك الصفات فاذا ناشدت الرحمة قلت يا الله و اذا ناشدت المغفرة قلت يا الله و اذا ناشدت العدل قلت يالله و اذا ناشدت الحكمة قلت يالله و اذا ناشدت الستر قلت يالله و اذا ناشدت السلام قلت يالله و اذا ناشدت الكرم قلت يالله واذا و اذا و اذا

فيالله انا نعوذ بك من عذاب القبر و نعوذ بك من فتنة المسيح الدجال و نعوذ بك من فتنة المحيا و الممات ونعوذ بك من فتنة المأثم و المغرم اللهم ادخلنا و المسلمين جميعا جناتك و قنا عذاب القبر و عذاب جهنم يالله

اللهم آمين

و يجعلوا عامر

sa7'so7'te

_______________________________________________

2-صفحة الاهداءات

الشهر الى فات بالظبط 15-9

عيد ميلاد واحده بحبها اووووى

يوم ما اتولدت فتحت عينى لقيتها مستنيانى

وهى الى سمتنى

الله يسامحها بقى :(

اعرفها من 18 سنه تقريبا

عيد ميلاد اختى

كل سنه وانتى طيبه وعقبال مليووووووون سنه

loza

____________________________________________

3-صفحة التناحه

قمة التناحة وان كنت انا شخصيا بعملها كتير ان الواحد ممكن ياخد ثواب من الرد علىالتليفون و رغم كدا بيكسل

ويقول الو بدل سلام عليكم

break
________________________________________________________

4-صفحة اخبار اليوم

من حظنا الجميل

ان سخسوختى هيا اللى تفوز الشهر ده ب احسن بوست عن بوست رحلة علاجى

بنجاح ساحق ماحق ملوش مثيل

حظنا جميل ليه بئا؟

عشان عيد ميلاد سارة الشهر ده

وفى الحالة دى الهدية هتبئا 2*1 يا ساره

و كل سنة وانتى طيبة

ولينا كلام تانى فى عيد ميلادك طبعا

الحاجة التانية

مينفعش شهر يعدى من غير حاجة وحشة

بيتنا القديم قفل البلوج بتاعه

لأسباب غير مفهومة

و يارب يرجع عن قراره ده
لاننا فعلا بنحبك فى الله يا سمسم

:(

الستة بتوع صيدلة

_______________________________________________

5-صفحة التسالى

مش هنتكلم المرة دى على فيلم ولا شريط

نتكلم عن كليتنا

كلية الصيدلة جامعة طنطا

كان فى فطار فى الكلية امبارح

قلنا و ماله نحضره

الوجبة بتاعة الكلية لا تعليق

الالذ ان الناس اللى عاملين الفطار اللى هما الجمعية العلمية الصيدلية

طالبين اكلهم من برا

من مطاعم برا يعنى

واحنا اللى اتدبسنا فى الاكل بتاعهم

وبصراحه اكتر مش احنا بس

احنا وعميد الكليه

و طبعا قاعدين من الساعة 4 للمغرب مفيش حاجة نعملها

و"الستة بتوع صيدلة يتحدوا الملل" جمعنا البنات على قد ما قدرنا و اعدنا نلعب مع بعض

بجد دى كانت احلى حاجة فى اليوم

شوية اللعب اللى لعبناهم

رجعنا بالزمن لورا بتاع 120 يوم كدا

و بعد الفطار كمان اعدنا نلعب

كان يوم مسلى جدا

و السنة الجاية ان شاء الله هنحضره بردوا

بس هنجيب اكلنا معانا

ونبقى نقول للعميد بردو على الحكايه دى

الستة بتوع صيدلة

______________________________

6-الصفحة المختلفة

صناع الحياة المنوفية

حلم كبير جمعنا كلنا كل صناع الحياة بالمنوفية لمدة شهرين من العمل الدائم الذى يصحبه أمل كبير اننا نقدر نحقق هدفنا و هو عمل شنطة 10000 للأسر المحتاجة ووسط فترات الأمل و لحظات اليأس اذا بنا بتوفيق الله سبحانه و تعالى نصل الى ما نطمع ان يرضيه و ان يجعله فى الميزان حسنات كل من عمل به و هو عمل 11000 شنطة رمضانية للأسر وهو اعلى مما حددنا و اكبر من كل الجمعيات التانية و دا طبعا من مبدأ

و فى ذلك يتنافس المتنافسون

kahramana

___________

ادعوا معانا ربنا يتقبل من كل من عمل بهذا المشروع و يخلص عمله لوجه الله الكريم و يجعله فى ميزان حسنات الجميع

القلب السليم وعلامه صحه القلب

عشان تعرف اذا كان قلبك سليم ولا لا هات كوبايه ميه بيضا فيها معلقتين ملح( قال يعنى فى ميه بيضا)
وحط صباعك الابهام فيها وطلعه بعد 5 دقايق كرر الحكايه دى 3 مرات ورا بعض
شوف الفرق بين الابهامين (مش قصدى النضافه)

دلوقتى بقى اقوم اغسل وشك وصحصح معانا لان الى فوق ده كان هزار
وهنتكلم بقى فى الجد

القلب السليم

قال النبى -صلى الله عليه وسلم :"الا وان فى الجسد مضغه اذا صلحت صلح الجسم كله واذا فسدت فسد الجسم كله"
والمقصود طبعا باتلمضغه القلب

القلب السليم هو القلب الذى لا ينجو يوم القيامه الا من اتى الله به يوم القيامه كما قال تعالى :
"يوم لاينفع مال ولا بنون الا من اتى الله بقلب سليم"
فهو الذى قد سلم من كل شهوه تخالف امر الله
ومن كل شبهه تعارض خبره
فسلم من عبوديه ما سواه وسلم من تحكيم غير رسوله فخلصت عبادته لله تعالى

علامات سلامه القلب
ول علامه لصحه القلب ومحبه الله للعبد..هى كثره ذكر الله فاللسان يخرج ما فى القلب فاذا امتلئ قلبك بحبه عز وجل
اللسان بذكره

*انه لايزال ينيب الى الله ويتعلق به تعلق المحب المضطر الى محبوبه الذى لا حياه له الا برضاه
*ان يتعب الجسد فى خدمه الله ولا يمل القلب وقد كان النبى -صلى الله عليه وسلم-يصلى حتى ترم قدماه فيقال له فى ذلك فيقول :
" افلا اكون عبدا شكورا"
*ان يكون كلام الله عز وجل والكلام عنه احب شئ لقلبه عما سواه
*ان يأنس بالله عز وجل ويستوحش من غيره
* اذا دخل فى الصلاه ذهب عنه همه
* ان يجعل همه الاعظم رضا ربه وطاعته
وفى الاثر عن على بن ابى طالب رضى الله عنه قال:
"من شغله امر دينه كفاه الله امر دنياه"

البوست من كتاب "البحر الرائق فى الزهد والرقائق"

نوايا الصيام

مش عارفة ابتدى ازاى وانا داخلة البلوج دلوقتى بعد ايام كتيرة كدا مش عارفة اد ايه كنت ببص و امشى بالعافية حاسة انى غريبة
ما علينا
انا عارفة انى جاية بعد الهنا ب سنة عشان اقول نوايا الصيام بس لسة بدرى بردو الواحد هيعرف يجمع ان شاء الله ثواب كبير
انا احاولت اجمع على قد ما اقدر من برامج و كتب و مواضيع واللى عنده زيادة يقول وانا ازوده على النوايا دى و ناخد ثواب كلنا
الاول انا دورت على موضوع تجديد النية يعنى نقرا النوايا مرة واحدة وتكفى الشهر كله ولا كل يوم نجددها
لقيت ان المفروض نوايا الصوم فى الفرض تتجدد كل يوم
ودا الحديث
عن حفصة –رضي الله عنها- ، أن رسول الله –صلى الله عليه وسلم- قال: ((منلم يُجْمِعالصيام قبل الفجر فلا صيام له))[رواه أبو داود والترمذي وغيرهما، وصححه شيخنا الألباني –رحمه الله-].
نوايا الصيام

-استجابة لأمر الله تعالى
قال تعالى ((ياايها الذين ءامنوا كتب عليكم الصيام كما كتب على الذين من قبلكم لعلكم تتقون )) البقرة 183...
- ليدخلنى الله الجنة من باب الريان
عَنِ النَّبِيِّ صَلَّى اللَّه عَلَيْهِ وَسَلَّمَ قَالَ فِي الْجَنَّةِ ثَمَانِيَةُ أَبْوَابٍ فِيهَا بَابٌ يُسَمَّى الرَّيَّانَ لَا يَدْخُلُهُ إِلَّا الصَّائِمُونَ ) (البخاري: 3017)

-اقامة ركن من اركان الاسلام
-السياحة
معناها ان الانسان يبيع نفسه لله عز و جل
قالت السيدة عائشة"سياحة هذه الامة الصيام
-مغفرة ما تقدم من الذنوب
قال رسول الله صلى الله عليه وسلم:"من صام رمضان ايمانا واحتسابا غفر له ماتقدم من ذنبه"
-طلب الشفاعة يوم القيامة
قال رَسُولَ اللَّهِ صَلَّى اللَّهم عَلَيْهِ وَسَلَّمَ ( الصِّيَامُ وَالْقُرْآنُ يَشْفَعَانِ لِلْعَبْدِ يَوْمَ الْقِيَامَةِ يَقُولُ الصِّيَامُ أَيْ رَبِّ مَنَعْتُهُ الطَّعَامَ وَالشَّهَوَاتِ بِالنَّهَارِ فَشَفِّعْنِي فِيهِ وَيَقُولُ الْقُرْآنُ مَنَعْتُهُ النَّوْمَ بِاللَّيْلِ فَشَفِّعْنِي فِيهِ قَالَ فَيُشَفَّعَانِ ) (أحمد: 6337
-أسعى للجنة حتي يرزقنى الله إياه
اقال رسول الله صلى الله عليه وسلم ( من قال لا إله إلا الله ختم له بها دخل الجنة ومن صام يوما ابتغاء وجه الله ختم له به دخل الجنة ومن تصدق بصدقة ابتغاء وجه الله ختم له بها دخل الجنة ) . رواه أحمد ( صحيح الترغيب والترهيب )

-ان ارفع درجتى فى الجنة و يكون لى السبق

-اصوم لكى اتعلم الصبر
-اصوم لكى اعتق من النار
قال رسول الله صلى الله عليه وسلم ( إن لله عند كل فطر عتقاء وذلك في كل ليلة ) رواه ابن ماجة
-اصوم حتى يكون خلوف فمى اطيب من ريح المسك
قال رسول الله صلى الله عليه وسلم:"ولخلوف فم الصائم حين يمسى أطيب عند الله من ريح المسك"
لكى يباعد الله بينى و بين النار
قال النبي صلى الله عليه وسلم ( الصيام جنة وحصن حصين من النار ) حسنه الألباني
تكفير للذنوب
- أصوم مجاهدة للشيطان والنفس والهوى
10اصوم ل تستغفر لى الملائكة حتى افطر
قال رسول الله صلى الله عليه وسلم:"ان الله وملائكته يصلون على المتسحرين"
قَالَ رَسُولُ اللَّهِ صَلَّى اللَّه عَلَيْهِ وَسَلَّمَ أُعْطِيَتْ أُمَّتِي خَمْسَ خِصَالٍ فِي رَمَضَانَ لَمْتُعْطَهَا أُمَّةٌ قَبْلَهُمْ خُلُوفُ فَمِ الصَّائِمِ أَطْيَبُ عِنْدَ اللَّهِ مِنْ رِيحِ الْمِسْكِ وَتَسْتَغْفِرُ لَهُمُ الْمَلَائِكَةُ حَتَّى يُفْطِرُواوَيُزَيِّنُ اللَّهُ عَزَّ وَجَلَّ كُلَّ يَوْمٍ جَنَّتَهُ ثُمَّ يَقُولُ يُوشِكُ عِبَادِي الصَّالِحُونَ أَنْ يُلْقُوا عَنْهُمُ الْمَئُونَةَ وَالْأَذَى وَيَصِيرُوا إِلَيْكِ وَيُصَفَّدُ فِيهِ مَرَدَةُ الشَّيَاطِينِ فَلَا يَخْلُصُواإِلَى مَا كَانُوا يَخْلُصُونَ إِلَيْهِ فِي غَيْرِهِ وَيُغْفَرُ لَهُمْ فِي آخِرِلَيْلَةٍ قِيلَ يَا رَسُولَ اللَّهِ أَهِيَ لَيْلَةُ الْقَدْرِ قَالَ لَا وَلَكِنَّ الْعَامِلَ إِنَّمَا يُوَفَّى أَجْرَهُ إِذَا قَضَى عَمَلَهُ ) (أحمد: 7576
11-طلباللدعوات المستجابة
عن ابى هريرة رضى الله عنه قال : قال رسول الله صلى الله عليه و سلم ((ثلاث دعوات مستجيبات ...دعوة الصائم ..دعوة المظلوم ..دعوة المسافر
- أصوم لأن الصيام عمل صالح
إِلَيْهِ يَصْعَدُ الْكَلِمُ الطَّيِّبُ وَالْعَمَلُ الصَّالِحُ يَرْفَعُهُ الآية فاطر:10

و ان شاء الله اى حد عنده نوايا غير دول يااااااااااريت يقولها عشان نزودها و ناخد اكبر ثواب كلنا

تذكرته

تذكرته

تذكرت كيف عايشنى فى مراحل حياتى ..تذكرت كيف اصبحنا اصدقاء بعد ان كنا اقارب...تذكرت المشاعر الجميلة التى ربطتنا...تذكرت يوم ما انهى امتحانات الثانوية و ذهب للكشف... تذكرت يوم ما اكتشف مرضه بالسرطان... تذكرت انقباض قلبى يومها... تذكرت تغير حالتة مع ايام العلاج...تذكرت محاولته لابعادى عنهفى مرضه كيلا اراه..تذكرت محاولاتى العديدة لزيارته و التى نجحت فى بعضها...تذكرت كيف كره العكاز الذى يستعمله...تذكرت املى فى شفاؤه و تذكرت كيف انهار املى و انهارت مناعتة ...تذكرت محاولتى تشجيعه للذهاب الى الكلية ... وتذكرت تلك الليلة التى سهرناها كاملة فى تلك المحاولة و هو يهاب هاب الاجهاد و يهاب شفقة الناس...تذكرت نجاحى فى تلك المحاولة و تذكرت اخفاؤه لاجهاده عن اعين الصدقاء...تذكرت مرور الايام و تذكرت جملة الطبيب المعهودة"احنا عملنا اللى علينا و ربنا معاه ... ده آخر العلاج"... تذكرت انهيار والدته و دعائها " رب انى لا اسألك رد القضاء و لكنى اسألك اللطف فيه "... تذكرت آخر ايامه و كيف اغلق هاتفه و غرفته عليه... تذكرت كيف كان يصرخ طلبا للمسكنات... تذكرت امه تدعو له الموت رحمة به... تذكرت مجىء الشيخ ليدعوا له و يهدؤه و تذكرت تعجبه من تماسكه... تذكرت عزمى على زيارته غدا رغم انف كل الرافضين... وتذكرت غدا هذا حين تلقيت صدمة وفاته... تذكرت تخيلى اليائس ان تحدث معجزة تحييه..و لكن ما من معجزة اعادته لى...تذكرت غفوتى وسط بكائى لاصحى معتقدة انه كابوس و تذكرت كيف افقت من ذلك الكابوس على ملابس امى السوداء لينفطر قلبى مرة اخرى...تذكرت كيف جاء اصدقائى تلك الليلة لينقلونى بعيدا عن منزلى و تذكرت كيف حاولوا مساعدتى لاجتياز امتحان اليوم التالى..تذكرت انى لم اكن اصدق بعد بوفاته و تذكرت كيف نجحوا فى اضحاكى و تذكرت كم غضبت بعدها من نفسى ...تذكرت يوم ذهبت لاعزى عمتى المتظاهرة بالتماسك و تذكرت كيف انهار تماسكها لحظة رؤيتى ...تذكرت كم بكيت و انا اعانقها و تذكرت هروبى مسرعة لعدم قدرتى... تذكرت امى تدعونى للتماسك و تذكرت غضبى منها لانها خافت على مشاعرى من زيارته ايامه الاخيرة... تذكرت غضبى من نفسى لانى لم اقدم معاد زيارته يوم واحد

ثم تذكرت ابتسامته.. و تذكرت دعاباته و تذكرت جملته " انت وحدك تكفينى" ليتحاشى غيرتى... و تذكرت كم اردت ان اصرخ بعد مماته لاخبره كم احببته ... تذكرت مرور الايام بعدها و ارتباطى بمصحفه الاخضر .... و تذكرت هلعى حين بدأـ ملامحه تختلط على رغم عدم مرور عام.... و تذكرت ادراكى بانها اختلطت على لاننى اراها فى كل وجه

تذكرت و تذكرت و تذكرت مع انى لم انس

و مع حلول رمضان ظل يطرق تفكيرى و لا يبارحه لا اعلم لماذا... ربما لاننا فى ايام مباركة فينادينى لادعوا له غير عالم بدعائى فى كل صلاة

فادعوا له معى دعوة صادقة عسى ان يتقبلها الله

اللهم نور لاحمد قبره بنور و جهك الكريم و وسعه له برحمتك يا رحمن يا رحيم و وصله سلامى فانت خير امين و ارزقه شفاعة نبينا محمد عليه افضل صلاة و تسليم و اعفو عنه و اغفر له و ارحمه و تب عليه يا الله

اللهم آمين

from zozo with love

بوست كان لازم ينزل

______________

احنا مش عارفين نبتدى منين......!!؟
حاجات كتير حصلت لناس غالين عندنا منها الحلو ومنها الوحش
كده سبونسر
غيابك فعلا هيفرق عندنا فى البلوج
بس لما تحس ان عندك وقت ممكن تدخل فيه
متبخلش على زوار بلوجك بيه
بلاش شغل المنايفه ده s:

يااااااااااريت تفكر تانى
بس لو خلاص قررت

يبقى ربنا يوفقك فى دراستك
وان شاء الله نشوفك الصيف الى جاى
مش اقل من امتياااااااااز

____
البقاء لله يا محمد فى صحبك
عارفين ان اصعب حاجه انك تفقد واحد صاحبك
بس ربنا يصبرك ان شاء الله

سفاح كرموز و زى الهوا: البقاء لله فى جدك
صحيح اثر فيك الفتره الاخيره
بس ياريت تتجاوز محنه موته
ويااااااااااارب النت يرجع


زى الهوا:البقاء لله فى جدك


_________________

اعياد ميلااااااد

حد يجى فى الحر ده بردو ..!!؟

كل سنه والعربى و د. البرى طيبين
عقبال مليووووووون سنه
و تدوين بردو ان شاء الله

_____________________

ان شاء الله بكره رمضان
كل سنه وانتو طيبين

جايز يبقى فى تقصير مننا بس اعذرونا
يومنا فى رمضان مبيبقاش فيه 5 دقايق فاضين
من الكليه الى بتبدأ من الساعه 9 يعنى تقريبا بالمواصلات
يومنا بيبتدى من 8
ويادوب بنخلص الكليه على الفطار
نفطر ونصلى التراويح ويااااادوب نروح نموت على السرير
عشان تانى يوم نصحى قبل الفجر نتسحر ونكمل يومنا

بالنسبه للبوستات بتاعه رمضان ان شاء الله
السنه 12 شهر
فاحنا قررنا ان شهر وااحد فى السنه هنتكلم فيه دينيات
وهنسيب الدنيويات
احنا عارفين ان رب رمضان هو رب شعبان
بس نفسنا يكون فى فرق فى حياتنا فى رمضان
حتى فى البلوج
وجايز الكلام الى نكتبه يكون تذكره لحد
وربنا يكتب لنا ثوابها

وعشان بكره رمضان يبقى هنتكلم فى حاجه
لازم ناخد بالنا منها عشان اى حاجه نعملها ان شاء الله تقبل مننا

الاخلاص

الاخلاص: هو افراد الله عز وجل بالقصد فى الطاعات
يعنى نسيان رؤيه الخلق بدوام النظر للخالق

فالذى يغلب على قلبه حبالله عز وجل وحب الاخره تكتسب حركاته الاعتياديه صفه همه وتصير اخلاصا والذى يغلب على نفسه الدنيا والعلو تكتسب جميع حركاته تلك الصفه فلا تسلم له عباده من صوم وصلاه وغير ذلك الا نادرا

والغافلون عن الاخلاق يرون حسناتهم يوم القيامه سيئات وهم المقصودون بقوله تعالى:
"وبدا لهم من الله ما لم يكونوا يحتسبون وبدا لهم سيئات ما كسبوا "
فالعمل بغير نيه عناء والنيه بغير اخلاص رياء

النيه
قال بعض السلف : رب عمل صغير تعظمه النيه ورب عمل كبير تصعره النيه

فيمكن للعبد ان يستحضر نيه صالحه فى مباحاته فتصبح بذلك قربات
فالتطيب مثلا ان نوى به اتباع سنه الرسول -صلى الله عليه وسلم - فهو قربه
وان نوى به التودد الى قلوب النساء الاجنبيات والتفاخر فهذا يجعل التطيب معصيه
فاذن المباح بالنيه الصالحه يرتفع الى قربه وبالنيه الفاسده يصبح معصيه

الكلام الى فوق ده من كتاب " البحر الرائق فى الزهد والرقائق


السته بتوع صيدله"

بنلف فى دواير

شريط جديد لبن لادن يتوعد فيه و يهدد بهجمات انتحارية الخ الخ الخ

و عقب ذلك تعددت ردود الفعل عالميا على اختلافها كالأتى

*المخابرات الامريكية تؤكد صحة التسجيل و عدم التلاعب فيه و تدلل على ان الصبغة السوداء فى لحية بن لادن دليل على وقت الحرب تبعا لمبادئ القاعدة

* الديموقراطين الامريكين يدللوا على سوء سيطرة بوش و عدم توفيره الامان اللازم للامريكين بدلالة عدم القبض او التخلص من بن لادن و تهديده المستمر

* بوش يستغل الموقف ليسكت معارضين الحرب على العراق بحجة انها كانت و سيلة لحماية المريكين من صدام و قد نجحت ووفرت عليهم احد اوجه التهديد الامنى

*العراق لا تزال غارقة فى الدماء...دماء السنة و الشيعة

*الفلسيطينين قتل مراهق برصاص العدو " كنوع من التذكير بوجود العدو و نوع من اثبات الذات بين فتح و حماس.. و لسان حال اسرائيل يقول" علمناهم الشحاتة سبقونا على الابواب"

"و بنلف فى دواير"

...........................................................................................................

الستة بتوع صيدلة انا عارفة انى منزلة بوست و ده مش معادى بس بجد انا اسفة ماقدرتش امسك نفسى و بعدين نزلوا بوست تانى يوم عادى لو عايزين الكلمتين دول بس كانوا محشورين فى زورى

3 ايام حداد

فقدناها من 3 ايام تقريبا


غرقت فى بحر اسكندرية
بين صخرتين
ناس حاولو ينقذوها و معرفوش


كانت معانا فى كل ذكرياتنا
كانت معانا فى الكلية
كانت معانا فى تجمعتنا
فى اوقات التهييس

ياما قاست معانا


لما كنا بننساها كنا بنزعل اوى


بجد متضايقين اوى


وان شاء الله تكون اخر الاحزان


و مش هسامح نفسى ابدا لانى كنت السبب


ياما اهملتها





وكنت بعاملها بقسوة


حتى الصورة الوحيدة اللى صورناها فيها بالصدفة كنا مسكنها بقسوة زى متكون نبلة مش كاميرا

هنستقبل العزا فيها ال 3 ايام اللى جايين ان شاء الله :(

واخر حاجة صورناها بيها كانت صور ل بوست و صورنا جزء و كان فاضل جزء

ومنجلكوش فى حاجة وحشة

loza

مجلة الستة بتوع صيدلة الشهرية

احنا قررنا اننا ننزل المجلة دى كل شهر ان شاء الله

هنحاول قدر الامكان ان صفحات المجلة تبقى ثابتة -صفحة واحد بس اللى هيتجدد كل شهر-ان شاء الله

و للناس اللى مخدتش فكرة عن المجلة قبل كدا دا العدد الاول بس مكنش جماعى

مجلة بربر

اولا احنا مش هنقول مين كاتبة صفحة ايه وانتوا عليكو الاستنتاج بئا طبعا ونشوف شخصياتنا طاغية على كتابتنا ولا لأ

___________________________________________________

1- الصفحة الدينية

باقى على رمضان بالظبط من لحظة كتابتنا

14 يوم

20 ساعة

58 دقيقة

استعديتوا ل رمضان ولا لسة؟

كل سنة وانتوا طيبين

و ان شاء الله نطلع كلنا من رمضان بالمغفرة والعتق

و متنسوش يا جماعة تفتكرونا فى الدعاء أمااااااااااااااااااااانة

____________________________________

2-صفحة الاهداء

it's my greeting 2 u marmar,

i can't describe my awfully sorry 2 u

i can't describe my love 4 u..cuz love like the shadow u can see it ,touch it,feel it,but u can't describe it or spacify it..it's real love which u don't know about.c u s

_______________________________________

3- صفحة التناحة

فكرت كتير فى موضوع التناحة دا .. ووصلت لموضوع حيوى تنح هكلمكو فيه

وهوا

ان قمة التناحة انى اسيب الصفحة فاضية

_________________________________

4- صفحة اخبار اليوم

الصفحة دى هنعلن فيها عن التوب بوست للشهر اللى فات

و فازت بيه عن جدارة loza

عن بوست تفتكرى بجد؟!

و اقترحو انتوا علينا هديتها تبقا ايه للشهر ده

لاننا كنا هنخليها متطبخش معانا النهردة بس للأسف عملت معانا كل حاجة فى الاكل يعنى تستاهل جايزتين مش جايزة

و بنعلن كمان عن التصويت بتاع مواضيع الشهر الجديد هينزل ان شاء الله من يوم 1 فى الشهر الجديد على اليمين للناس اللى مخدوش بالهم منه

_________________________

5-صفحة التسالى

المرة دى هنتكلم عن فيلم كدة رضا

طبعا فيلم احمد حلمى الجديد اكيد كلكم عرفينه او سمعتو عنه

انا بعزى اى حد من اللى بينام فى بيات شتوى او صيفى بالأدق..الفيلم ده اقل ما يقال عنه عن انه تحفة بجد ..ده الفيلم الوحيد من أفلام احمد حلمى اللى عدى فيلم ظرف طارق

طبعا الستة بتوع صيدلة كلهم شافوه رغم ان انا كنت مسافرة بس صممنا ندخله فى نفس الوقت-انا فى المصيف وهما فى شبين-

طبعا انتوا مستنيين انى احكى الفيلم...بس انا مش ناوية احرقو عليكم بطلو بخل بئا مفرقش تمن التذكرة و "عارف يا بومبو الفلو س دى لو ضاعت البومبو ده هيعمل فيك ايه"

سلام يا بومبو منك ليه

والبوست الجاى ابقى احكيلكو احداث الفيلم للى مقدروش يستغنو عن تمن التذكرة

_________________________________

6الصفحة المختلفة-

يا جماعة احنا عندنا اقتراح

خاص بالجماعة الصيادلة

احنا فكرنا نعمل بلوج يكون شامل كل الصيادلة سواء مخلصين او مش مخلصين

ويكون كلامه كله عن الكلية و ظروفها و مشاكلها و الأمراض واى تهييس ليه علاقة بالصيدلة

يعنى من الاخر نتكاتف ونعمل حزب الصيادلة المهروسين

اللى موافق يقول

ولو لقينا الفكرة عجبت الناس ان شاء الله نبدأ علطول

تحديث على الصفحة دى: البلوج دا معمول اصلا عن titrated minds بس خاص ب ناس معينة اللى عايز يشاركهم بيبعتلهم احنا بس حابيين انه يبئا بلوج خاص بالصيادلة يكتبو فيه علطول يحسو انه بلوجهم يعنى
___________________________________

فى النهاية بئا عشان احنا عارفين ان فى ناس هتكسل تقرأ المجلة كلها هتاخد افكار كدا

اول حاجة قولو رايكو فى فكرة المجلة الشهرية دى عموما ..نستمر ولا لأ؟!

ثانيا مين كتب صفحة ايه فى المجلة عشان نعرف اذا كانت شخصياتنا بتبان فى الكتابة ولا لأ؟

ثالثا...نجيب ل لوزة هدية ايه لانها فازت فى التوب بوست الشهر ده؟

رابعا..ايه رأيكو فى فكرة بلوج الصيادلة المهروسين دى؟

خامسا..أيه رأيكو فى اللوك الجديد؟

تحديث:التصويت بتاع شهر 8 على اليمين يا جماعة متنسوووش تصوتوا بس بصوت واطى

اخر تحديث ان شاء الله

نموذج اجابات الاسئله

1-ان شاء الله المجله هتستمر وليبدأ العد التصاعدى من اصداراتها ان كان فى العمر بقيه

2-

-الصفحه لبدينيه _______>كهرمانه

-الاهداء_______>سنفوره

-التناحه _______>لوزا

-اخبار الدنيا _____>بريك

-التسالى _____>ظوظو

3-بم انها هى الى كاتبه صفحه التناحه يبقى هنجيب لها هديه فاضيه وده اقل واجب :D

الستة بتوع صيدلة