اول مظاهره

وانابقلب كده فى مكتبتى الصغيره الى كل كتاب فيها ليه ذكرى معايا .. لقيت كميه كتب سياسيه وتاريخيه رهيبه
منها "برتوكولات اليهود" " الهيكل المزعوم" وكتاب من الحجم العائلى اسمه "مصر القديمه" وده كان عدد صفحاته 614 صفحه و"تاريخ مصر القومى" عدد صفحاته 282 والغريب انه بادئ من الفصل لتاسع
المشكله مش انى لقيت الكتب دى عندى الحكايه انى اشتريتها من 5 ابتدائى ل2 اعدادى
مش معنى انى كنت بجيب كتب سياسيه انى كنت بفهمها كلها فى كتب معينه زى بروتوكلات اليهود ده كنت بتنح قدام المصطلحات السياسيه الى فيه......
ولقيت بحث كنت عملاه عن اليهود وانا فى 2 اعدادى بعنوان " السجل الاسود لاسرائيل فى المنطقه العربيه"

بدأت حكايه السياسه معايا لما حلمت بالرسول (صلى الله عليه وسلم)فى 5 ابتدائىرحت سالت الشيخ بتاعنا فى المدرسه قالى انى هيكون ليا دور كبير فى القضيه الفلسطينيه......
بصراحه ومخبيش عليكم انا صدقت وعشت الدور بدأت اشترى اى كتاب كتوب عليه ال4 حروف " ى ,ه,و,د" واجمع كتب عن القدس واروح المكتبه ادور على اى كتب تخص الموضوع وكنت فاهمه انى هكون صلاح الدين التانى وانا الى هحل مشكله الشرق الاوسط فى الالفيه التانيه

ندخل بقى فى موضوع البوست .....
اول مظاهره ليا كانت فى 2 اعدادى مش فاكره كان ايه الى حصل بالظبط فى فلسطين وقررنا نعمل مظاهره بعد المدرسه وطلعنا للمدير وقاستاذناه وواحده صاحبتنا لفت على فصول الولاد والبنات تعرفهم بمعاد المظاهر للى عايز يجى
المهم خلص اليود الدراسى من هنا واتجمعنا من هنا على باب المدرسه وبات المظاهره
لسه بنقول يا هادى ومطلعناش من الشارع حتى لقينا شويه مخبرين وده طبعا نظرا لخطورتنا على امن الدوله ...( الى هى مش مصر طبعا والمعنى فى بطن الكاتب)
قعدوا يحدفونا بالطوب ساعتها حسيت اننا صح ومدام بعتولنا حد يبقى فى امل وان ممكن نعمل حاجه وان لما نعمل مظاهرات من اعدادى يبقى هنحارب فى الجامعه
ايام زمان لما كنت بتفرج على الافلام العربى الى فيها مظاهرات بلاقى الولاد قدام والبنات ورا كنت بسال اشمعنى يومها بقى عرفت اشمعنى الولاد يومها خدوا ضرب لان المخبرين بيضربوا فى الى قدام ويحدفوا طوب على كله والمشكله ان عددنا كان بسيط حوالى 30 ولد و15 بنت تقريبا
شويه كده وسمعت صوت فرقعه وطلع شويه دخان .. تقريبا المخبرين فرقعوا شويه بمب على صواريخ لما سالت قالو لى انها قنبله بطلع دخان عشان يفرقونا .. بس مش عارفه اسم محل الاطفال الى جابوها منه
بعدها العيال حسوا ان الموضوع قلب بجد وخاصه انها كانت مدرسه خاصه يعنى معظم طلبتها مدلعين شويه وكتر الف خيرهم انهم شاركو بكلمتين
وانا افتكرت ان اخويا الصغير مستنى فى مدرسته عشان اروح اجيبه

ويومها حسيت ان المدير قالهم على المظاهر قبل ما تبدأ
loza

تاج الروقان

التاج المصون دا جالى من العربى
وفى حاجة انا لقتنى مطولة فى اجابات التاج دا اوى غالبا لانى رايقة النهردة فمحدش يزهق واكيد اللى يهمه يقرا الاجابات هيقرأ للاخر
نيجى لأسألة التاج بئا
انت مين؟
بما انى لسة متفرجة على فيلم ظرف طارق النهردة
انسان..كائن حى يعيش ويتعايش
مين اكتر 6 اشخاص بتحبهم؟
السؤال دا صعب اوى انا الحمد لله بحب ناس كتير ..بحب كل الناس مدام معملوش حاجة وحشة فيا
انت سعيد؟
الحمد لله
لو اجتمعت انا وحسني مبارك في غرفة واحدة؟
بعد الشر بعد الشر يعنى مش هكلمه هشوف ورايا ايه وهعمله ..هيا ناقصة عطلة
لو معاك مليون ونص جنيه......تعمل بيهم ايه؟
مليون ونص بس؟!!
البخل حتى فى الاسئلة
 هتبرع بالنص مليون لصناع الحياة عشان شنطة رمضان واهى تبئا جت فوقتها
و هجيب عربية نسافر بيها احنا الخمسة طنطا بدل الشحططة فى المواصلات
والباقى بئا للى عايز مش هتأخر على حد بحاجة
بتحب مصر؟
ابزولوتلى
بتحب البنات؟
احم ..هوا الصراحة..هوا انا معروفة فى الجروب انى بحب البنات وبحب ابصلهم بس مش بعاكس :D
انت مسلم ؟
الحمد لله
ليه؟
عشان اهلى مسلمين طبعا..وبحمد ربنا على كدا الف مرة
مين اكتر شخصية ما تقدرش تستغنى عنها في حياتك؟وليه؟
اكتر شخصية مقدرش استغنى عنها طبعا هيا أمى..ليه دى بئا عايزة مليون بلوج اعد اكتب فيه
بس فى العادى انا مبستغناش عن حد بحبه بالساهل
ايه اكتر موقف محرج اتعرضت ليه في حياتك؟واتصرفت ازاي؟
فى مواقف محرجة لما الواحد بيفتكرها بيضحك عليها وفى مواقف محرجة لما الواحد بيفتكرها بيبئا عايز يولع فنفسه
وانا فثانوية عامة كنت بخبى القصص بين الكتب عشان ماما تفتكرنى بذاكر ومرة كنت بقرأ ملف المستقبل وكانت قصة تخينة كدا وحطاها فوسط الكتاب وقفلته وهيا فى النص طبعا الكتاب مكنش مقفول وكان فى فراغ كبير فى النص وماما جت طلعت القصة من الكتاب وحطتها اودامى بكل هدوء على المكتب

- _-
ايه الأمنية اللي بتدعي ربنا دايما انه يحققها لك؟
اللهم لا تذهب قلبي الي شئ صرفته عنى
على حسب كل فترة بئا كمان
اه علطول بدعى كمان ان ربنا يرزقنى زوج صالح فاقرب وقت :D
تمرر التاج دة لمين؟
مصطفى
fasakonya
د/عمرو
hyperminds
د/رانيا
خراب يا دنيا عمار يا دماغى
سمسم
بيتنا القديم
كومى-شاطر -مجدى-سعي
د who i am
تحدييييث:افتكرت اكتر موقف احرجنى من كتر الاحراج كنت نسيته..كنت مع ماما فى المجلس الحسبى و كانو بيعاملو ماما بطريقة مش لذيذة ففضلت ماسكة نفسى ماسكة نفسى لحد ما فاض فيها وزودوها اوى رحت جاية مزعقة فى اللى كانت بتزعق ف ماما و هووووووووووب رحت جاية معيطة ف وسط كلامى ..مقولكوش كنت محرجة اد ايه ..ادى جزات اللى بيكتم فنفسه
break

حوار مع صديقى الملحد


"حوار مع صديقى الملحد"كتاب لدكتور مصطفى محمود. بيحاول يقنع فيه صديقه الملحد اللى معاه دكتوراه من فرنسا بوجود الحالق و بيرد فيها على الاسئله العلمية الجدالية اللى سألهاله.بجد الكتاب تحفة قريته زمان وانا صغيرة فى اعدادى.ايامها كانت فى اسئلة بتدور فى دماغى بخصوص الدين و مش كنت لاقيالها اجابة مقنعة زى مثلا (لو كل حاجة ليها اللى خلقها فمن خلق الخالق؟)و العياذ بالله اسئلة زى دى كتير كنت بستغفر ربنا بعدها و اقول اكيد عقلى الصغير مش هيستوعبلها اجابة بس بجد مع الكتاب ده لقيت اجابات كتير مقنعة للى خطر على بالى واللى ماخطرش.من يومين لقيت الكتاب ده تانى و لقيتنى بقراه تانى و قعدت افكر اننى ادّيه لسمر عشان انا حكيتلها عليه و بعدين قلت ان احسن طريقة اوصل بيها الكتاب لناس كتير هى البلوج. و قعدت افكر اكتب انهو فصل فى الآحر قلت يمكن الناس ماتبقاش عايزة تقراه من قبيل انه بلا وجع دماغ او انه مش وقته او انا مؤمن بما فيه الكفاية...فى الآخر قلت انزل المقدمة دى و نازل معاها الاسئلة اللى جاوبها و حسب ردودكم احدد اذا كنت اكتب انهو فصل او ماكتبش خالص كل دة حسب اصواتكم لغاية آخر الاسبوع (كل واحد يقول رقم السؤال اللى نفسه يعرف اجابته)( الموضوع ده بيفكرنى باتصل ب 0900) المهم انا رغيت كتير فكفاية كده و اقولكوا الأسئلة

1-لم يلد و لو يولد (اذا كان لكل خلق خالق فمن خلق الخالق)

2-اذا كان الله قدر علينا افعالنا فلماذا يحاسبنا؟

3-لماذا خلق الله الشر و المرض و الاسلحة....؟

4-و ما ّنب الذى لم يصله القرآن(كمن فى الغابات و الحراش)؟

5-الجنة و النار(كيف يعذبنا الله و هو الرحمن الرحيم على ذنب محدود فى الزمن بعذاب غير محدود فى الابد و ماذا نساوى بجانب عظمة الله حتى ينتقم مننا هذا الانتقام)؟

6-هل الدين افيون يخدر الفقراء و المظلومين ليناموا على ظلمهم و فقرهم و يحلموا بالجنة فى حين يثبت الاغنياء على غناهم باعتبار انه حق و نا الله خلق الناس طبقات؟

7-حكاية الاسلام مع المرأة(تعدد الزوجات-بقاء المرأة فى المنزل0الحجاب-الطلاق فى يد الرجل- الضرب-الهجر فى المضاجع0 ما ملكت ايمانهم-الرجال قوامون-نصيب الرحل مضاعف فى الميراث)

8-الروح (مادليلك على ان النسان له روح و يبعث بعد الموت و انه ليس مجرد جسد ينتهى الى التراب و ماذا يقول دينكم فى تحضير الارواح؟)

9-الضمير(تتكلمون عن الضمير بتقديس كما لو انه مطلق مع انه احد المصنوعات الاجتماعية و تتغير احكامه و ضوابطه وفق المصالح القيمة التى تفيد نقول عنها خير و التى تضر نقول عنها شر)

10-هل مناسك الحج وثنية؟

11-لماذا لا يكون القرآن من تأليف محمد؟

12- لماذا لا يكون القرآن مؤلفا على وجه العموم؟

13-شكوك ( قول ان القرآن غير متناقض فما بالك بلآية "فمن شاء فليؤمن ومن شاء فليكفر" و "و ما تشاؤن الا ان يشاء الله" و امثلة اخرى

14-موقف الدين من التطور(عليك ان تثبت ان خلق الانسان جاء على طريقة جلاجلا امسك الخالق بقطعة الطين ثم عجنها بيده و نفخ فيها فأذا هى آدم مع ان كل علوم التطور تقول ان آدم جاء نتيجة سلسلة من التطورات الحيوانية السابقة)

15-كلمة لا اله الا الله ( الستم تبالغون فى استخدامها و كأنها مفتاح كل باب و هل انجو من العذاب اذا قلتها اذن فلا اله الا الله .هل انتهى الأمر؟)

16-كهيعص (تلك الحروف التى لا تفهمون لها معنى فى القرآن)

17-المعجزة ( كيف يجوز للرب الرحيم الذى تصفونه بأنه رؤوف ودود كريم ان يامر نبيه و خليله ابراهيم بأن يذبح ابنه)

18-معنى الدين ( انا اكثر دينا من كثير من دعاتكم فأنا لا اؤذى احد و لا اسرق و لا اقتل و لا ارتشى و لا اكذب ... الا تقولون ان الدين معاملة)

19- فزنا بسعادة الدنيا و فزتم بالأوهام



الكتاب كده خلص و اكيد كان هيبقى احلى لو قريتوه كله على بعضه .

لمحة انسانية



الموضوع جوايا بقاله فترة و قلت بما اننا خدنا افراج من سجن كليتنا المبجل ابعبر بقة عنه

طبعا فى ناس كتير اوى بتسافر عشان تروح الكلية و بتيجى من اماكن بعيدة كمان و فى ناس بتروح الكلية بالمواصلات الداخلية فى طنطا

احيانا كتير اوى و انت قاعد فى العربية لا بيك و لا عليكتلاقى واحد او واحدة من الفلاحين اللى لسة طالعين من الغيط جه قعد جنبك و يا سلام بقة لو معاه طفل صغير ملحوس كده

طبعا حضرتك عفاريت الدنيا تركبك و تبقى قاعد تنفخ و تتاخر لجنب و حاسبى يا بنت و حاسب يا حاج

و انت فاهم انه مش واخد باله مثلا من انك - لامؤاخذة - مأروف منه

عارف انت فى اللحظة ده بتعمل ايه ؟؟

البنت الصغيرة اللى انت مأروف منها ده هى بالنسبة لمامتها ملكة جمال حياتها نور عينيهاة و على قد ما قدرت تهتم بيها و هى نازلة بتبقى حسة انها اجمل بنت فى الدنيا و وهى ملحوسة كده وشها برىء - مش بعيد تكون هى اللى بتلحوسها قبل ما تنزل من البيت -

والعكس بقة الام اللى انت مدايق منها ده هى روح قلب بنتها و حياة ابنها اللى زيك و ان كنت ترضيها لمامتك و باباك ارضها لهم

ممكن تقول انا ماما و بابا مش زيهم اكيد بس برده ولادهم شايفنهم احلى بابا و ماما فمفيش داعى نكسر قلوبهم

او ممكن اللى يقعد جنبك ده يكون ابن هو كل امل باباه و مامته ومن وجهة نظرهم البيه الكبير راح الباشا جه

تخيل احساس الاب و انت مدايق من ابنه ده و احساس الابن نفسه و انت بتكسره و تقلل شأنه قدام اهله


عارف ان ممكن الولد او البنت ولاد الزوات اللى مستنيه يقعد جنبك ده ربنا يرزقك بواحد متقنعر حبتين و تحس انت بقة انه مأروف منك و افففففف و كان نفسه ياخد كنبه لوحده بس يلاااااا ..

فى ناس ممكن متحش بالموضوع اوى او تفتكر انه عادى و مش بيبقى باين بس هاقوللك انه فعلا بيبقى باين لان فى اغلب الاحوال انت بتبقى حاسس بشعور اللى قدامك تجاهك خاصة اذا كان فى بعض التصرفات اللى تظهر ده زى المنديل اللى حطه و افففف اللى ممكن تطرد الاكسجين من العربية


الناس ده غلابة اوى اقصد بيها غلابة الطيبة و قلبهم ابيض اوى و بيساعدوك كتير جدااا و انت مش واخد بالك - راجع درس الفلاح و العامل من ابتدائى بتاع الحداد اللى بينفخ فى الكير و الفلاح و صديقه الهدهد ....- لازم نحترمهم جدا

غير طبعا " ان اكرمكم عند الله اتقاكم " يعنى ممكن البنى ادم ده يكون احسن عند ربنا بكتيييير اوى منك يعنى هيبقى احسن فى الاخرة و ده معناه انه لازم يكون افضل عند الله فى الدنيا و بالتالى لازم تقدره


امممم طولت عليكم كالعادة انا عارفة


لى و لكم و يللا نبتدى عهد جديد

kahramana

أجازة أولها عمر وسلمى عايزين اخرها ايه

لينا ا لأجازة.الأجازة كمان مرة.ايه يا جماعة لسة ما تأثرتوش؟
طب الأجازة تالت مرة..ايوا كدا
احنا من يومين كدا كان امتحان حقوق الانسان..طبعا معظمنا خرج وعنده حالة نوم رهيبة.منا اللى نام جوا الامتحان..ومنا اللى نزل ونامجوا الكلية
المهم قلنا لازم نعمل حاجة نحس فيها بالاختلاف بما ان احنا فى العادى مبنمشيش من الكلية الا متأخر ..وفى العادى بنعد نرغى مع اى حد نقابله.وفى العادى مبنذاكرش يوم الامتحان.و بالتالى لازم نعمل حاجة تفرق
فكرت اقولهم "ايه رأيكم نذاكر المرة دى باه عند يعنى " وتخيلتهم هياكلونى
قلنا خلاص ناكل فاى حتة وبعدين نروح سينما
المهم بدأنا رحلة البحث عن السينيما .طبعا دورنا ايه أنضف سينيما..مش كتر فلوس والله بس انا بصراحة مبحبش ان الناس اللى تبئا معانا فى السينيما يبأوا بيئة..لأنهم غالبا بيعلقو تعليقات ملهاش لزمة عالفيلم
السينيما الأولانية ملقيناش فيها أفلام حلوة والسينيما الأخيرة بردو ملقيناش فيها أفلام حلوة
طب نعمل ايه؟! لقيتهم كلهم بصولى و فهمت اللى فيها..قلتلهم لأ يعنى لأ مش هندخل سينيما بيئة..وطبعا أعدو يقنعو فيا انها مش بيئة أوىبس بيئة نص نص ..وانا مش موافقة .وكل اللى على لسانى لأ يعنى لأ.ليه نبوظ فيلم ممكن نشوفه فحتة تانية نضيفة .ولما لقتهم كلهم زعلو خصوصا ان فى واحدة مننا مش هينفع تسافر معانا مصر مثلا لو حبينا نروح سينيما نضيفة فقلتلهم خلاص بس والله العظيم لو حد من الناس نطق جوة لأروح ومش هندخلها تانى
وطبعا بريك طلعت بالحل السحرى وقالت ناخد لوج لينا لوحدنا ومحدش ليه دعوة بينا
وكان الفيلم"عمر و سلمى "
دخلنا وقعدنا وبدأ الفيلم
وسنفورة لسة بتتخانق انها مش عارفة تعد اعدة مريحة
بخصوص الفيلم هقولكو المفيد
هو كقصة مش مهمة اوى ويمكن استهبلونا فمعظمها بس كأفيهات و كتامر ومى مسخرررررررة
بصراحة ممسكناش نفسنا من الضحك
وطبعا اول ما مى عز الدين ظهرت فى الفيلم أعدت أنا وبريك نعلق على لبسها وأول جملة عرفت أكونها فدماغى" يا نهار اسوح لو عندنا واحدة فى الكلية كدا دا أنا كنت أعدت فبيتنا "
غالبا دا كان تفكير معظمنا
وطبعا اللى كان بيتفرج على مناظرنا فى السينيما خصوصا لما عمرو وسلمى كانو بيخرجو او يحبو فبض كان هيعرف أد ايه قصدنا بمعنى جملة "انا عايزة من دا يا حزمبل"
ماعدا كهرمانة اللى مقالتش كدا غير لما شافت التورتة
وفضلنا اعدين بعد الفيلم ما خلص حتى وكل اللى على لسانا "أنا عايزة من دا يا عم حزمبل" لغاية ما العامل اللى فى السينيما جه وقالنا "اليوم خولص ........ايه الفيلم خلص"
وخرجنا من الفيلم بحاجتين .أولهم أن غالبا الناس هى اللى هتبطل تيجى سينيما عشان متسمعش تعليقاتنا
الحاجة التانية ان احنا ملناش دخول أفلام من كدا تانى لان بنطلع معقدين وغالبا بنعد يومين فى حالة فراغ عاطفى
اما الحاجة التالتة فاننا حفظنا كل اللى اتقال فيه :)
و بالتالى بئينا اليومين اللى بعدهم بنرد على بعض بحتت من الفيلم
بريك...بتتخانق مع خد تقول انت فاكر نفسك اييه؟!! فارد اقولها صفيق
ولزة تعد تغنيلنا يا برنسيسة يا برنسيسة
وسنفورة تبص لولد مسقط بنطلونه "يابنى عريتنا مش هوا دا اللى بيتبين"
وخرجنا من الفيلم بنقول
"يارب نجيب امتياز ميكرو السنة الجاية"
والمعنى فبطن الشاعر
قصدى فبطن الصيادلة
from sarah with love




عفوا أبى لم أعد احبك




أجدنى منهكة كالخريف

متقلبة كالشتاء..

حزينة كالمطر

..فى قمة احتياجى اليك....

أجدنى على شفير الهاوية ..فلابد أن اختار ما بين الموت..والانتحار
أبحث عنك كى نركب سويا سفينة نوح ونهرب من الطوفان..ولكنى كالعادة لا أجدك


حتى بأحلامى لم تزرنى سوى مرتين ..و رحلت !!


تركتنى على قيد الحياة..والأمل ..و الألم


سلبتنى منى ..سرقت "أنا" من "أنا" ...لكى أحاول الابقاء على "أنا" بلا "أنت"
علمتنى ألا أهدى قلبى الا لمن يحبنى ويهتم بى


وانت لم تعد هنا لتهتم بى


عــــفوا أبى لم أعد أحبك
__________
دى حاجة كنت كتبتها من تلات سنين تقريبا.. وحاولت افتكرتها امبارح بس مش فاكرة فين الكشكول اللى كنت بكتب فيه الخواطر دى :(
فدا اللى عرفت افتكره من الخاطرة دى
ومش عايزة تريقة ولا انتقاد ولا اى كلمة وحشة كله يقولى جميل مبدع فظيع شديد :D
break

تسييحة لكل واحد كده على الماشى


العنف الرقيق مع لوزا :
فى يوم كنت انا ( كهرمانة ) و سخسوختى و السنفورة مستنيين بريك و لوزا فى الموقف و لقينا بريك جاية عمالة تضحكككك و لوزا وشها احمر
بريك بتقول انهم كانوا جايين على اول شارع الموقف و ماشيين فى جنب و مرة واحدة قام تاكسى كاسر على لوزا و بتقولنا لقيت لوزا اديرت زى الوحش الكاسر و قالت اما استعد بقى افك خناقة لوزا هتتخانق يا جدعان و راحت لوزا بصة للسواق بشراسة جدا و قالت بكل ....رقة ( يعنى كده ينفع يعنى ده يسح ده - و انا قصدت اكتبها بالسين - ) و اديرت مشيت راح السوق ضاحك عليها كان ناقص تقوله لو عايز تمشى على الرصيف قوللى و انا انزلك لكن متكسرش عليا كده يا عمو
قوة الايمان مع لوزا :
لوزا قالت انا لازم اختبر قوة ايمانى انا مش هاظبط المنبه للفجر و لازم اقوم انا لوحدى و نامت و كل املها انها تقوم تقوم الفجر من غير منبه و بالفعل قامت لوزا و الفجر بيأذن و فرحتتتت هيييييييييه ايمانى قوى بس و نامت تانى من غير ما تصلى


لولاك يا لسانى ما انسكيت يا افايا مع السنفورة :
السنفورة و لوزا خرجوا قبل امتحان التحليلية بيوم و هم بيتمشوا شافوا بنت لابسه شبشب تقريبا بتاع مامتها فراحوا ضاحكين و عدى الموقف و هو بيلفوا و راجعين قابلوها تانى راحت السنفورة ضاحكة تانى برده رخت البنت مديرالها و قالت بتضحكى على ايه يا اختى ما تبصى على الشبشب الهاواى اللى انت لابساه و رجعوا بقى السنفورة فرحااااانة و بتقولنا مش عارفة هى عرفت منين ان الشبشب بتاعى ماركة
اصلهم فهموا ان هاواى ده يعنى من جزر هاواى مستورد يعنى ميعرفوش ان هاواى ده نوع من انواع شباشب الحمام - اعتقد انها معلومة لاغلب الناس


-
السنفورة بتسيح يا جدعان:
هند و هى فى ابتدائى كان نفسها يبقى اسمها دهن عشان تبقى مع واحدة اسمها ايمان فى تقسيمة الفصل و اهى تبقى مغيرتش اسمه اوى


بخيره و لا فيش غيره مع سخسوختى :
احنا متعودين نشرب ميكس شوكلاتة دايماا الصبح لازم لازم
فمرة و احنا رايحين الكورس انا و سخسوختى و السنفورة ملقناش المكس انا و السنفورة جبنا عصير مانجة و سخسوختى بقى بما انها مدمنة لبن على الصبح ممكن لو مشربتش لبن على الصبح تقعد تهرش زى الجرب ..... اقصد المدمننين و تجيلها تشنجات و تموت فجابت نص كيلو لبن بخيره و شاليمو و ماشية بكل فخر و لا هممها الناس اللى عمالة تضحك عليها و الطلبة اللى بيبصوا عليها جماعات
و احنا بقى متعودين انها بتخلص الميكس فى ثوانى هواا قبل ما نكون فتحناه احياناا و الغريبة انها برده خلصت النص كيلو لبن برده قبلنا
و كان تعليقها الوحيد احمدوا ربنا انى مجبتش لبن البقرات التلاتة و احنا تلاتة ...... احم احم


التسييحة التانية لسارة مع بريك بقى اللى جاية


بريك القلب الطيب
كنا مروحين على بيت بريك بعد امتحان لقينا قطة عيانة فى شارعهم و بريك بقى اتهبلت ابدا ما انا طالعة الا لما نجيبلها حاجة تاكلها اصلا القطة كانت عاملة حادثة مضيعة معالمها و اصرت على اننا نشتريلها حاجة قلتلهم لين و بعد مناقشات رسى الامر على انهم مصرين - حتى القطة - يجيبولها مكس شوكلاتة و رحنا جبنا اتنين مكس و لقيت بريك بقى بتحط الشاليموه و تقوللى خدى شربيها يا ابلة ياسمين قلت امرى لله و هنشربها ازاى بقى المهم حطينا الشاليمو فوق بقها و و قعدنا ننزل المكس فيه و راحت القطة جارية و هى مش قادرة تتحرك اساسا و اجيلها يمين تيجى شمال و العكس لما قرفتتتتت و اتحريييت
و الله لو عيل من عيالى - مستقبلا - ما هيتعبنى كده اخرى هازغطه زى البطة - احم احم قصدى هداديه و العبه طبعا - المهم راحوا جابولها تونة و عيش و ابدا ما هى راضية تاكل حاجة قام واحد جار بريك جه قالها ان القطة ده كده بقالها اسبوعين و عايزة حد يموتها عشان ترتاح لقيت الحلوة بريك بتبصلى قلتلها نعم يا ماما انا أأكل اه اموت لااااااا
و حطينا الاكل جنبها و مشينا و طبعا سخسوختى مكدبتش خبر و جرى فتحت المكس التانى و مكنش فيه شاليمو اقوللها يا بنتى خدى بتاع القطة تقوللى لا ابدا انا خايفة القطة تتقرف تشرب مطرحى اقوللها زى اختك و القطة هتقدر تقوللى ابدا حرام نقرفها و طبعا مقدرتش تصبر لما نطلع تحطه فى كباية و شربته من غير شاليمو
و احلى حاجة ان بريك مبتحرمش لانها كان لنا سابقة مع قطة برده السنة اللى فاتت و كنات عايزة تاخدها البيت معاها تأكلها و تديها الدوا و الفيتامين لحد ما تخف لولا جارى دكتور بيطرى قال مينفعش ده معفنة تجيب امراض و مش هتعرفوا تأكلوها و لا تدوها دوا ارموها فى اى زبالة فى الشارع عشان تلاقى فيها أكل و طبعا بريك ام قلب حنين اصرت اننا نرش الالدوا على الزبالة عشان لما تاكل منها
و بكدة اكون اتميت واجبى و اكدت روح الترابط الاجتماعى اللى اشار ليها دكتر كنافة


kahramana

مرمر

مرمر....بجد وحشتينى اوى ...البيت ملوش طعم من غيرك بجد
انا اسفة مكنش قصدى
مكنش قصدى اهملك اليومين الاخرانين...غصب عنى لو كنت اعرف انك هتزعلى كدا مكنتش سبتك..بس انا كنت زعلانة اوى
انا مش عارفة انتى متي ليه ...طبعا دا قضاء ربنا
بس لو كنتى متي من البرد _مع انى معتقدش _ زى ما بيقولو..فهيا غلطتى عشان مختش بالى منك فى الجو ده
ولو كان الموضوع نفسى فهيا بردو غلطتى لانى كنت حسة انك تعبانة مش حسة انا كنت متأكدة ..و معملتش حاجة كل اللى عملته انى قلت لماما انك شكلك تعبانة جت تروح ناحيتك طرتى دخلتى العش !!
مش عارفة انتى كنتى بتضحكى على نفسك ولا على ماما
ولا هوا عشان اسمك مرمر لازم تكونى كدا !!
بجد انا متضايقة اوى وزعلانة اوى وندمانة اوى و تعبانة اوى وز هقانة او ى و بحبك اوى و وحشتينى اوى
انا حبيتك اكتر لما سبتينى
بس هيفيد بايه !!!

مرمر هيا الصفرة اللى فى الصورة اللى فوق :(
و العصفور التانى دا كان اسمه صفصف
كان بيضرب مرمر قبل ما تموت بيوم وانا شفته بس مجاش فبالى انه ممكن يموتها فى الاخر
او الله اعلم مش عايزة اظلمه ممكن ميكونش هوا اللى موتها
المهم ان مرمر ماتت فى الاخر
break

تاج معقر...بالعقاقير

ده اول تاج يجيلنا على البلوج و جالنا من دكتور كنافة اللى هوا hyper minds
و احنا بنشكره و يا رب ميندمش انه بعتهولنا بعد ما يقرا الاجابات



من هو:أحب شخص لقلبك فى الدنيا؟
كهرمانة : ماما
لوزا : ماما
سخسوختى: ماما
بريك :ماما
سنفورة :ماما

انسان مستعد تضحي بحياتك –ركز فى كلمة حياتك- عشانه؟
كهرمانة: بابا
لوزة : اختى
سخسوختى : اى حد من الاسرة
بريك:ماما
سنفورة :احمد اخويا

اسم أول حب؟
كهرمانة: و انا فى اولى ابتدائى كان اخو واحدة صاحبتى و هو كان فى تالتة ابتدائى و كان اسمه احمد
لوزة : وانا فى اولى ابتدائى وكان جارنا وجه خطبنى من ماما بس نقلنا من المنطقه ولو شوفته دلوقتى معرفوش
سخسوختى : احمد ابن عمتى
بريك : واحد جارنا اكبر منى بعشر سنين و حبيته من الكلام اللى كنت باسمعه عليه بس لما سمعت صوته كرهته
سنفورة : محمد ابن خالى

اسم اخر حب(حتى الان)؟
كهرمانة: واحد فى اخر الشارع عندنا متشرددددد و معفن اوىىىى بس فى وشه براااااءة رهيبة طارق كل لما اعدى من جنبه ابصله اوى ولما اجى اكلمه يمشى و يسبنى فى مشكلة واحدة بس عنده انه اصغر منى شوية شويتين تلاتة كده هو فى اوائل ابتدائى
و طبعا الحب فى الحالتين كان من طرف واحد اللى هوا طبعا عشان الاحراج J الطرف التانى
لوزة : كان فى 3 ابتدائى لما نقلنا وكنا بنعمل سباق عجل وكان بيجى يلعب معانا
سخسوختى : احمد برده _ الله يرحمه_
بريك :هه .....هه ...هه :D
سنفورة:احمد اخو محمد :D
و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
كهرمانة: موجه ال رسومات المسيئة للنبى صلى الله عليه و سلم
لوزا : لما بغلط بقعد اعاتب فى نفسى لما اكرهها
سخسوختى: انا فى مرحلة فى حياتى دخلت فى مشاكل كتير و كرهت نفسى ساعتها و عموما لما بعك
بريك :ممكن ف فترة معينة ابئا مضايقة من حد بس مش لدرجة انى اقف ابص على جثته ممكن اغرزها فقلبه بس اشيلها بسرعة J
سنفورة :بكره نفسى لما احرج نفسى و ده بيحصل كتير

ما هو :اسم أجمل كتاب كتبه بشر قرأته ومحتفظ به حتى الان ؟
كهرمانة: الرحيق المختوم
لوزة : 200يوم حول العالم
سخسوختى: رحلة من الشك الى الايمان لمصطفى محمود كان بيوصف فيه الشكوك اللى دارت فى عقله بخصوص حقيقة الله _ سبحانه و تعالى _ و فى كل فصل كان بيقول سؤال و يجاوب عليه اجابة منطقية و بجد
عرفلى و اكدلى حاجات كتير
بريك: الرحيق المختوم و لوزة وكهرمانة هما اللى جابهولى فمحتفظة بيه
سنفورة:حبيت اوى الكتاب اللى سارة كانت بتتكلم عليه و خطاب الى رجل ميت لمصطفى محمود بردو
اسم كتاب-كتبه بشر برضة- انت متعلق بيه وبتقرأه كل فترة؟
كهرمانة : رجال حول الرسول
لوزة : اى كتاب بيقع فى ايدى لصلاح جاهين
سخسوختى : مبقراش كتاب مرتين
بريك:لا تحزن مكملتوش لانى كل ما بسيبه برجع اقراه من الاول من جماله
سنفورة :ميكى وبطوط وممكن كابتن ماجد

اهم جهاز منزلى انت متعلق بيه او بتستخدمه كتير ؟
كهرمانة : الكمبيوتر
لوزة : الكمبيوتر
سخسوختى : التلاجة و التليفزيون
بريك :الكمبيوتر
سنفورة : التلاجة والمعلقة

اكتر حاجة لما بتبصلها بتحس بالراحة؟
كهرمانة : السما عند الشروق
لوزة : البحر والسما ساعه المطر
سخسوختى :البحر
بريك : اللبن
سنفورة :البحر بردو

مكان تحس فيه بالحنين الى شىء لا تدرى ماهو وذكريات جارفة الى لاشىء ؟
كهرمانة : مدرستى الاعدادي و بيت بريك
لوزة : مدرستى الاعداديه
سخسوختى : البحر برده
بريك : شط اسكندرية(بوريفاج)
سنفورة : بيتنا اللى فى البلد

مكان تحس بالراحة عندما تدخله ؟
كهرمانة : المسجد و دار اقرأ ( باحفظ فيها قرآن )
لوزة :المسجد
سخسوختى : الحمام .......شوية جد بأه المسجد
بريك :اكتر حتة الواحد بيستريح فيها التربة مع ان الواحد لسة مدخلهاش
سنفورة : السرير و البلكونة

اجمل مدينة زرتها داخل مصر ؟
كهرمانة : الاسماعيلية و مارينا فى الساحل الشمالى
لوزة : مطروح
سخسوختى : مطروح
بريك : اسكندرية طبعا
سنفورة : مرسى علم

نوع هاتفك المحمول؟
كهرمانة : نوكيا-فودافون L
لوزة : نوكيا –فودافون L
سخسوختى: نوكيا –فودافون-اتصالات J
بريك :سامسونج –فودافون-اتصالات J
سنفورة : نوكيا –فودافون-اتصالات J
سرعة بروسيسور جهازك ؟
كهرمانة : 2,4 __256
لوزة : مفهمش فى العربياات
سخسوختى : مفهمش فى الموضوع ده لما اخويا يرجع من المدرسة هابقى اسأله
بريك :اسألو عبد الرحيم عمرو
سنفورة : دماغى انضف من عبد الستار فى الموضوع ده

حجم ذاكرة –هارد- جهازك ؟
كهرمانة : 80 جيجا
لوزة :80 جيجا
سخسوختى : مش عارفة برده
بريك: مش عارف L
سنفورة : 120جيجا

المساحة التى تشغلها المواد الاسلامية على جهازك ؟
كهرمانة : 30 جيجا
لوزة : 20 جيجا
سخسوختى :ده غالبا هاعرف اجيبها مممم غالبا8 جيجا
بريك : مش عارف بردو L
سنفورة : حوالى 10 جيجا


أهم هدف انت واضعه لحياتك دلوقتى ؟
كهرمانة : اعدى فى صيدلة من غير ما اشيل و لا مادة فى اى سنة ده عشان بابا و عشانى بقى نفسى يبقى عندى بيت ناجح
لوزا:اعدى السنة دى صافى
سخسوختى : والله انا فى فترة مشتتة فيها جدا بس نفسى اعمل حاجة ليها لازمة يعنى ما اتوهش فى الزحمة
بريك: هدفى فى الحياة العملية اخلص السنة دى على خير و اجتماعيا انى اتجوز انشالله فبيت مدبلر يا كهرمانة




مواصفات فتاة –أو فتى للبنات- الأحلام بالنسبة لك ؟
كهرمانة : متدين مقتدر
لوزة : متدين فاهمنى يعتمد عليه و طويل
سخسوختى : يبقى اعلى منى تدينا(و هلاقى من دة كتير)بس يكون لذيذ مش متشدد وياريت يكون طويل
بريك : متدين بس مش متشدد يرفعنى فى تدينى و ميكونش كداب وميكونش بخيل وبيحبنى
سنفورة :بريزيدوووووووووووووووووووووووووووووون زيى

صف ما يأتى :شعورك لما بتسمع كلمة مصر؟
كهرمانة :الفخر
لوزة :عايزة اعيط
سخسوختى : بصوا لو حد جيه قاللى "مصر مصر يا سارة"هاحاول افتكر اللقطة دى كانت فى انه فيلم لو قالها تانى يبقى هاسأله بنفسى ده انه فيلم؟ الوطنية مش بالكلمتين دول الوطنية ممكن تبقي انك ما ترميش حاجة فى الطريق عشان تبقى بلد نضيفة
بريك :بتخض
سنفورة :بحس بصوت دخل ودنى

شعورك لما بتسمع كلام عن اليهود ؟
كهرمانة :غل
لوزة :كلمة بتلفت انتباهى عايزة اعرف كل حاجة عنهم مش ا عجاب بس عشان تغلب عدوك لازم تعرفه
سخسوختى : فين ايام ما تاهوا 40 سنة . دلوقتى احنا اللى تايهين
بريك :كره وحقد وغل و اعععععععععععععع
سنفورة : بفتكر حرب 73 وفيلم فتاة من اسرائيل

شعورك لما بتشوف ظابط شرطة ؟
كهرمانة : بفتكر الحرامى اللى لاقيناه فى البيت
لوزة : ما شفتهمش غير فى الافلام
سخسوختى : هم نوعين الاتنين يتخاف منهم نوع تخاف ليعاكسك و نوع تحترمه فتخاف منه و ان كان ده قليل
بريك : اهىء اهىء همففففففففففففففففففففففف
سنفورة :بفتكر الضرب على القفا

شعورك لما بتشوف الكناس العجوز فى الطريق ؟
كهرمانة : الشفقة
لوزة : ببقى عايزة اروح اكنس بداله
سخسوختى : بفكر ان احنا لما بنرمى ورقة عالارض بنشيل ذنب الراجل ده
بريك : بيصعب عليا
سنفورة :يبقى انت اكيد اكيد فى مصر

لون البطانية اللى بتتغطى بيها فى الشتاء ؟
كهرمانة : احمر فاسود
لوزة : بيج فى تركواز
سخسوختى : احمر و ممكن آخد بتاعة شادى الزرقا
بريك :بيج فاحمر
سنفورة :روز فى بنى

لون الجورب-الشراب- المفضل لديك ؟
كهرمانة : بيج
لوزة : لبنى فى بستاج بس اتقطعL
سخسوختى : درجات الاخضر او البينك
بريك : اصفر مع انى والله بعز كل شراباتى
سنفورة:رصاصى اصله اجدد واحد عندى الصراحة

احساسك اذا داست قدمك فى الطريق على مخلفات اخراج حيوان- *** ولا مؤاخذة- ؟
كهرمانة : ياى يع هم لسة بيعملوا عندكم عالطريق احنا عندنا بيعملوا على الرصيف طبعا لو حصلت هاروح استحمى عدل
لوزة : بنئرف اوىى اوىى اوىى ولما فتحت مانجاية لقيت فيها بذرة أغمن عليا على طول
سخسوختى : بتقرف حبتين لزوم الروتين و بعدين بدور على علبة مناديل
بريك : بقول لامؤاخذة
سنفورة :اكيد هبقى لابسه شوزة ولا ايه

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف ؟
كهرمانة : حبيب قلبى ده ادعى ربنا طبعا ان ولادى يكونوا زيه و ان زوجى لو مكنش كده اربيه على كده (مع العيال يعنى) امال ايه جوزك على ما تعوديه
لوزة : بسم الله ما شاء الله
سخسوختى : بصراحة بحس ان لو كان بنفس تدينه بس مع لبس عادى و دقن طويلة بس مهذبة كان هيبقى احسن بس فى نفس الوقت بحترمه لان اكيد لقى صعوبات كتير فى الموضوع ده و رغم كده ثبت على موقفه
بريك : ساعات بحس فيهم برياء وساعات بحس ان وشهم منور
سنفورة : بشوف ناس و ناس. ناس بستريحلها و ناس ما بستريحلهاش



احساس يراودك فى اشارة مرور مغلقة بسبب مسئول كبير؟
كهرمانة : ببقى عايزة اقوله متعنطز على ايه آخر و آخرك فى التراب
لوزة : ما كلنا ولاد تسعة
سخسوختى :ساعتها بتمنى يثبتوا علميا " ان من البص ما يحرق"
بريك :للدرجة دى هوا كبير سد اشارة المرور
سنفورة :بحس انى عايزة ارمى قشرة موزة يمكن يزحلق J

لمن ترسل هذا التاج ؟؟
بين السطور ...أيمان كونان