كبرنا


احنا بدأنا البلوج ده من مايو 2007 يعنى من تلات سنين كده (عديتهم على صوابعى)..التلات سنين دول غيرووونا كتييير اوى..حسه ان احنا عجزنا فيهم..زمان كنا ننزل الكلية اول كل سنة و احنا مقررين نحضر محاضرة على الاقل من كل مادة و نشوف ليها لزمة ولا لأ..و بعدين نرسى على محاضرة واحدة و بقية الوقت نقضيه تحت الكوبرى فى الكليه..نهيس..نرغى..نلعب سبن ذا بوتل..نعلق على لبس اى حد معدّى"الشوذة دى مش لايقة..الطقم ده جامد..الطرحة دى مش مكانها..الشنطة دى بوّظت الطقم" ممكن نقضى ساعتين كده..و اللّى وراه فينا سكشن يطلع و الباقى مستنيه تحت فى مكانه..نروح سينما كل ما فيلم ينزل..نقعد فى الكشك بتاع الكلية نشغل فيروز لحد ما ننسى احنا فين و امتى..نرغى كتييييير و نتجادل اكتر..نعلى صوتنا فى العربيات و مش واخدين فى بالنا لحد ما حد يقولنا صلوا عالنبى..مانساش يوم ما سواق طماع ركبنا خمسات فى الكنبة..و حبينا نبوخ عليه فكل واحدة فينا سدت ودنها و بدأت تغنى بصوت عااالى اغنيه غير التانيه..كل مافتكر الموقف ده بحسنا مستفزين جدا جدا جدا..كنا هبل اوى و صغيرين اوى..كنا نعمل اللى شايفينه صح حتى لو كل الناس قالولنا غلط..عرفنا ناس..اعجبنا بناس..وكرهنا ناس..واتلسعنا من ناس و ناس وناس..غلطنا كتييير غلطات نفسى الزمن يرجع عشان مانعديش بيها تانى..وفجأة لقيتنا كبرنا..حسة بحالة من الخرس فى حياتنا..بقينا كل واحدة مشغولة بدنيا..لسه اصحاب و اخوات..بس عاقليييين..انا فاكرة مرة زمان كنا راجعين شبين و الجو كان جميل و هوا شباك العربيه مخدر وشوشنا..وقررنا نرجع فى نفس العربية طنطا عشان نفضل فى المود ده شوية كمان..آخر مرة عملنا حركة مجنونة او ملهاش معنى زى دى مافتكرهاش..حتى فى خناقتنا بقينا نكبّر .. انا نفسى حسه انى عجزت من جوا..كل حركة بعملها الف حساب...عارفين زمان لما كنت انزل دريم بارك ماكنش فيه لعبة الا لما اركبها..مع الوقت بأيت اجبن..كل مرة اخاف ادخل لعبة جديدة لحد ما بطلت اروحها..حاسه انى يائسه..كل اللى نفسى فيه بيبعد يوم عن اللى قبله لحد ما بقالوش طعم..حسه بجبل تلج بيشل قلبى بيمنعه من جنونه بيوقف نبضاته بيسد نفسه يوم بعد يوم..احنا امتى كبرنا كده..و ليه كبرنا كده؟