stop it

شبين كما نراها

طول عمرنا كل مانروح حتى بره شبين و الناس تسألنا انتوا منين؟و نرد بثقه احنا منايفة..تلاقى علامات الاسبهلال نطت على وشوشهم..و اللى يقولك ايه ده بس انتى بتلبسى حلو اكيد بتجيبى لبسك من كايرو او اليكس..و اللى تقولك يا سلام امال ازاى بتتكلموا زينا مافيش لهجة فى كلامكم..و فيه اللى ناقص يقولك اكيد انت راكن الحمارة برة.على اساس اننا داخلين عليهم بالبلاص..احنا طبعا بنحترم كل التعليقات اللى فوق دى بس قلنا نعرفهم اكتر بينا و بشبين

مجرد ماتيجى سيرة شبين لازم تعرفوا 3 حاجات مهمين

1-احنا بلد زراعى ده الاساس

2-احنا بلد الريس-المنوفية- و اللى يرشنا بالمياه نرشه بالسلفوريك اسيد

3-اى نعم احنا بلد زراعى بس بطلنا نركب الحمارة...و اى نعم عندنا عربيات بس دى من اى البكويه ايام العز و النغنغة

هاهاها كنا بنضحّك معاكم احنا برضه عندنا عربيات نضيفة و اخر شوياكه اهه

رابع و اهم حاجة تعرفها...ان الستة بتوع صيدله من شبييييين و اسمع سلام كبير اويىىىىىىى

حيث بأه انك عرفت اهم تلات حاجة عن شبين فاحنا لازم نرحب بكم و اول ماتدخلوا شبين هتلاقى ترحيب حار و يفط اهلا و مرحبا بكم الخ الخ الخ

و بعد الترحيب و الذى منه هتلاقى احلى منظر ممكن تشوفه..."بحر شبين"زى ما بنسميه او نهرالنيل زى ما بتسموه..و الاحلى من منظر النيل هو منظر الصياد وهو بيشاورلك و بيضحك اصفى ضحكة ممكن تسمعها فى حياتك

أو تتمشى على الكورنيش ده

خلاص زهقت من المشى تعالى اقعد فى حديقة العليااء..بس استنى الدخول لازم يكون كابلز بس..دورلك على فردة تانيه و تعالى
طبعا بنهرج الحديقة دى مش على طول كده دى بيقام فيها ندوات حتى مصطفى حسنى كان فيها الاسبوع اللى فات و ناس مهمة بيستضيفوهم فيها"بس احيانا ....."

و هنا بئا لو عايز تاخد نزهة نيلية فى احلى معدية ب ربع جنيه تاخدلك لفتين رايح جاى

مش الاتوبيس النهرى بتاع القاهرة المقفول

و احلى فسحة فيكى يا شبين تنزلوا تتمشوا فى شارع الاستاد و تلفوا حواليين النافورة اللى نفسنا نشوف فيها ميا دى...و على فكرة برضه دى تعتبر الفسحة الوحيده فيكى يا شبين طبعا بجمب القعاد فى "كاريزما"

على فكرة ده اعجاز ان الشارع كان فاضى كده بس الكلام ده كان الصبح بدرىى جدا دا الشارع وهو زحمة بئا بالليلو دى كاريزما

وتلاحظوا طبعا ان الكراسى 5 و مختلفة عن باقى الكراسى

شىء مفهوم طبعا

كمان لو حد لاحظ المراجيح اللى ورا

دى مش تبعنا

و الحمد لله شوارعنا متسفلته و اخر حلاوة اهه لا و متشجرة و حركاات..و المبنى ده مقر ادارة الجامعة

ودا تاكسى شبين اللى فى الصورة اللى فوق

اللى عنده قوة ملاحظة ممكن يشوفه
كان فى صورة تانية للتاكسى الكبير (السرفيس)بس مش راضية تظهر

عموما هيا نفس الشكل الصغير ده بس بالحجم الكومبو

و حيث اننا بلد الريس ..لازم "ماما " سوزان تسيبلنا حاجة من ريحتها و هى مكتبة سوزان مبارك...احنا الصراحة مادخلنهاش بس بيقولوا عليها حلوة

و برضه حاجة من الريس ... و كلنا ديموقراطيين و ماحدش يفتح بؤه

و برضه كلنا برييمو فى الفهلوة ...بيع و شرا

هنا بأه برج القاهرة مش قلتلكم بلد الريس....وسعت صح...ماشى دى ساعة الجامعة..ادعوا تتضبط بس

دا بئا مبنى الدراسات الوطنية تاخد فيه اى كورسات انت عايزها ومتفهمش حاجة فى الاخر بردوا

ملحوظة جميع الصور من تصوير الستة بتوع صيدلة وممنوع النشل او السرقة

الستة بتوع صيدلة

what valentine?!

بيقولوا يا سيدى ان اصل الفالنتين داى قصة لذيذة اوى

قال كان فيه زمن كان الحرب شغالة الله اكبر .. جيه يا سيدى الملك مش عارفة بتاع بلد ايه غالبا روما امر بتجنيد كل الشباب طبعا ماعدا المتزوجين..و عشان يضمن الحرب فى جيبه امر بوقف الزواج و منعه!!قوم ايه بأه..قوم يطلع راهب اسمه فالنتين يجوز العشاق فى السر فى الكنيسة لان طبعا هو مؤمن بالحب..قوم يجى الملك يشم خبر..ماهو كل مايطلب جندى يقولوا انا متجوز و يطلعله القسيمة(هو كان فيه قسيمة ايامها؟..ما علينا)..و يقبض الملك على فالنتين يا عينى و يحطه فى السجن..تيجى طبعا بنت السجان و تحب فالنتين و يحبها "مابقالوا زمن بيشوف جبيبه مايحبش الا و هو فى السجن" و يفضل يبعتلها جوابات و يمضيها باسمه "فالنتين" و هى تبعتله برضه..و فى الاخر يأمر الملك باعدام فالنتين "غالبا الملك كان على خلافات مع مدامته..بس برضة ماعلينا"

و يفضل العشاق بعدها يحيوا ذكرى فالنتين و يخلوه عيد الحب..و تتدبس انت و هى فى هدايا..بس الصراحه تدبيسه حلوة

و حيث اننا مش عارفين نعمل ايه فى كميه الهدايا اللى بتتحدف علينا فقلنا نكتبلكوا نصايحنا بخصوص الفالنتين

_انا لسه عارفة امبارح ان المرتبطين هم اللى بيلبسوا احمر..و اللى مش مرتبطين يلبسوا اورانج بأه!!!

_لما تجيب هديه لبنت احلى حاجة انها تكون بسيطة مش اوفر اوى..و اغلب البنات بيحبوا الاكسسوارات و الدباديب الهبله

_لما تجيبى هديه لولد برضه خليها حاجة بسيطة عشان مايقولش عليكى مدلوقة اوى..و بيتهيألى هدايا الولاد محدودة اما برفان او ساعة او نظارة شمس او كوفيه او مصحف شيك و يعنى اضعف الايمان حاجة للموبايل"و احلى حاجة تيجى قبلها بفترة و تقوليله انا عايزة اجيب هديه لاخويا ما تنزل تشتريلى انت حاجة على ذوقك و تغلفيها و تديهاله و صدقينى هتعجبه مش جايبها على ذوقه و الاحلى انه يبقى فاقس الحركة و بعد ما يشترى هديته يحلف ماياخدها الا اخوكى :)"

_بلاش الحركات القرعة بتاعة المنايفة دى و تسيبوا السعر على الهديه.

_بلاش برضه تستسهلوا و تدوا بعض الفلوس فى ظرف..انتى مش ناقصة ايد ولا هو ناقص رجل

_ماتفكرش تعمل عم العاقل و تروح تسأل البنيه نفسها فى ايه كهديه ..الحركات دى مع اختك بس

اما بأه للناس اللى لسه خراط البنات ماعدّاش عليهم "بيتهيألى فيه مثل كده" المهم انزلوا برضه و اشتروا هدايا لنفسكوا و لصحباتك الغلابه والله لولا الافلاس اللى الواحد فيه كان مانجه نفسه و العيال(انا بدور على شغل حد عنده مكان)

و ماتنسوناش يا جماعة كل واحد و واحدة هيجيب هديه يخليها دوبل عشاننا على الاقل حق بحة الصوت اللى اتبحّيناها فى النصايح دى

و هابى فالنتين دى

و الف رحمة و نور عليك يا عم فالنتين

معرفش ليه

معرفش ليه تنّحت للدنيا كده
فجأة لقيتني مسكون بالملل
لا عندي رغبة في البكا
ولا في الكلام
ولا عارف أنام
ولا حتى بسأل إيه ده إيه
و أخرتها إيه
و إيه العمل
و أخاف أقول لأي حد
أحسن يقوم يقلبها جد
حد صاحبي ينزعج
يمد إيده في قلبه من باب الكرم
عشان يشاركني الألم
أو يستلفلي من لئيم حبّة أمل
حالة كده .. معرفش إيه
حالة كده ملهاش معالم
ساعات تزورني في الربيع ..
في الحر ..
و في عز الشتا
و تجيب حاجات
لا فيها روح ولا ميتة
حاله كده ..
لا معاها تنفع كلمتين
ولا غنوتين ..
ولا لقطه من ألبوم صور
..ألاقى قلبى ف الهوا
ويا الكور
..أخاف اقول لأى حد
..أحسن يقوم يقلبها جد
..حاله كدة
.معرفش إيه
لكنى بطلع منها بعد السكات ..
فاهم شوية في اللي فات
حاسس أوي بحضن الصحاب ..
محظوظ أنا
ساعات أشاور
ينفتحلي ألف باب
لكنّي بغلط في الحساب
ومعرفش ليه
تنحت للدنيا كدة

على سلامة

كنت كاتبة بوست كدة و لما قريت الكلام ده لقيته عبر عن اللى انا عايزة اقوله و زيادة

على سلامة...بجد أشكرك

break

severe headache

من يومين فتحت اجندتى اللى بكتب فيها من 4 سنين لما بكون متضايقة و بعد ما كتبت قعدت افر فى التواريخ القديمة...لقيتنى هبله اوى ..فترة اكتب انى هاخد قرار معملش كذا و بعدها بفترة اكتب ان يااه اد ايه انا فرحانة انى عملت كذا ده.. و العكس..ياترى انا اللى هبله ولا الانسان اللى ناسّاى

بيقولوا شيكولاتة سنيكرز"و كام شكولاتة تانيه" مش هاناكلها تانى..حبكت مع الشركة اللى بتعملهم تبدل المكونات النباتيه بمكونات حيوانية بالنسبة لينا مش حلال...يا دى الحظ الهباااب

كل واحد صريح مع نفسه بيبقى عارف عيوبه و متضايق منها بس بيخبيها عن الناس عشان مش يبعدوا عنه..مش جميل انه لما يعرفها لاقرب الناس ليه يحس ان اللى قدامه بيهرّج او واخد الموضوع بتريأه...و اللى مش اجمل انه يطلع اللى قدامه بيهدى الموقف بس و مش بيتريأ..لان ساعتها الواحد بيعرف فى نفسه عيب زياده .. انه حساس..يمكن زياده عن اللزوم...انا اسفة

بيقولوا كاس الامم الفريقيه شغاال..ده معناه ان مصر بتلعب؟!!طب يا ترى مصر البييض ولا السوود؟!!

نفسى اعمل حاجة ليها لازمة فى الكليه دى غير انى امتحن و اخاف من النتيجة..بلاش فى الكليه.. حاجة ليها لازمة فى اى حتة

بقالى يوميين عندى صدااااااااع بشع مش لاقياله حل!!!!!!

sara

العدد السابع من مجلة الستة بتوع صيدلة

طبعا العدد دا قريب من اللى قبله ..دا لأن العدد اللى قبله هو اللى اتاخر جدا بسبب ظروف الامتحانات

الصفحة الدينية

كلنا ممكن نصادف ناس نحبهم و نحب نتعامل معاهم و نحب نكون زيهم
واحنا هنتكلم عن بعض االصفات اللى ممكن تخلى الواحد يكون جذاب فى نظر الاخرين
طبعا صفات مكتسبة
1-قال رسول الله صلى الله عليه وسلم: تبسمك في وجه أخيك صدقة ....ودى نصيحه اكثر الخلق جاذبيه وحباً صلى الله عليه وسلم
2- قال رسول الله صلى الله عليه وسلم حب لأخيك ماتحبه لنفسك
3-قال رسول الله صلى الله عليه وسلم: ألتمس لأخيك سبعين عذرا
4-قال رسول الله صلى الله عليه وسلم:( والذي نفسي بيده ..لا تدخلوا الجنة حتى تؤمنوا.. ولا تؤمنوا حتى تحابوا... أو لا أدلكم على شيء إذا فعلتموه تحاببتم أفشوا السلام بينكم)
5- قال رسول الله صلى الله عليه وسلم:( تهادوا تحابوا.


.نسأل الله تعالى ان لا نكون ممن يقولون ولا يفعلون

_______________________________________
صفحة الاهداءات




اهداء الشهر ده ل بريك ب مناسبة عيد ميلادها السعيد
وتحية خاصة من بابا محمد و جدو اسماعيل على المناسبة السعيدة وبيطلبوا اغنية قالى شرابى مدلل
وكان ترتيب الاحداث
شهر 12 كهرمانة
شهر 1 لوزة
شهر 2 بريك
و شهر تلاتة هنجمع ونجيب فلاشة
_______________________
اهداء تانى

الى د/ احمد ربيع

انت فين مرة واحدة انقطعت و بطلت تزورنا

:(

________________

М€ŝЋМΣŞĦ

قفل البلوج مش سياسة و بس و بدون اسباب

ياريت يا تطمنا عليك

يا ترجع تانى

وترجع للتدوين احسن

______________________________________

صفحة التناحة

الو
1
2
3
اس اس

بنجرب البلوج بنشوف بيشتغل ولا لأ
تناحة بئا

_______________________________________

صفحة أخبار اليوم
طبعا فى تصويت على مواضيع لوزة ل شهر 12
اما عن اخبارنا بئا
فى حالة من القلق من النتيجة مع ان لسة بدرى عليها

________________________
صفحة التسالى

حد سمع عن حنظلة
حنظلة دى الشخصية اللى اخترعها ناجى العلى رسام كاريكتيرفلسطينى استشهد عام 1987واللى كانت بتشهد على كل كاريكاتير بيرسمه
عمره 10 سنين
الاول كان بيبص من وشه وبعدين بئا يدينا ضهره
ويقول ناجي العلي بأن حنظلة هو بمثابة الأيقونة التي تحفظ روحه من الانزلاق ، وهو نقطة العرق التي تلسع جبينه اذا ما جبن أو تراجع
ورغم ان ناجى العلى معاصرش الاحداث الحالية
الا انك هتحس انه رجل لكل العصور

دا موقع ناجى العلى

و فى بلوج لقيناه مخصوص ل مختارات ناجى العلى



___________________________________



الصفحة الصيدلية













المرة دى مش هنتكلم عن حاجة خاصة ب كلية صيدلة أد ما هنتكلم عن استخفاف بينا




مش ك طلبة صيدلة بس ك مسلمين




امال ايه دخل صيدلة بالموضوع




لان اللى بعت الرسالة دى طلبة صيدلة طالبين مننا ننشرها و لينا الأجر و الثواب




الرسالة منتشرة على الفيس بوك و الايميل و اكيد وصلت لكتير منكوا والله اعلم بعتها ل غيره ولا لأ

هنسيبكوا مع كلام طالب فى صيدلة اسكندرية

القرآن ممنوع في هولندا والمسلمين يرفعون شكوى والحكومه تصدر تصويت وللأسف الإنتصار لحد الآن لهم43%مقابل 57% لهم لا تخذلو كتاب الله صوت يا مسلم للقرآن وساعدو على نشرها للجميع لنصره الاسلام والقران الكريم و أنشر تؤجر

وصلتني الرسالة دي من أكثر من شخص ووجدتها بالملايين علي الايميلات والفيس بوك وبالفعل استفزني جداً الموضوع كمسلم وقمت بالدخول علي الموقع للتصويت لصالح القرآن ولكني فوجئت بالموقع كله باللغة الهولندية

وقرأت الجملة فلم أجد كلمة تصلح أن تكون كلمة قرأنوهاهي الجملة لتقرؤهاHet is goed als het kabinet besluit tot

verlenging van de missie in Uruzganeen (green colour) oneen (red colour)

فدفعني الفضول للبحث عن الترجمة وكانت كالآتي هل توافق علي رأي الحكومة في مد خدمة قوات حفظ السلام في أفغانستان أو لا توافقeen = agree oneen = disagree

ايه رأيك؟؟؟مهزلة؟؟؟ صح؟؟

ده طبعاً يعبر عن مدي استخفاف مخترع الرسالة الأول العبقري اللي ربنا هيحرقه في نار جهنم عشان بيكذب علي الله ورسوله يعبر عن مدي استخفاف شعوب العالم بالمسلمين ووصفهم لينا بالجهل فعلاً

الرسالة وصلتني من طلبة صيدلة وهندسة وطب !!!!!!!ولزمايلي ولكل المثقفين اللي بيستخدموا النت بقول عيب ولزمايلي خصوصاً بقول عيب قوي دا احنا طلبة صيدلة؟؟؟

مش معهد فني صحي لوالب

وعايز اقولكوا الناس بتوع امريكا او اسرائيل طبعاً اللي في مصلحتهم ان قوات حفظ السلام تمشي

الناس دي صيع يا جماعة !!! والله صيع

شوف الدماغ اللي دارسة نفسية المسلمين؟؟؟للدرجة دي الناس دي فهمينا وبيعرفوا يوجهونا علي مزاجهم وكمان بيستغلوا اشرف كلام في اغراض سياسية؟؟؟

وعايز ابشركواعلي فكرة يا جماعة الناس دي نجحت ونسبت عدم الموافقة اللي هما عايزينها بقت 51% مش موافقين علي بقاء قوات حفظ السلام في افغانستان بدل ما كانت في الأول 43%واللي نجح الموضوع ده المسلمين

انا شايف اننا مفروض زي ما نشرناها للناس كلها ننشر الترجمة

وكفاية بقي تهزيق وقلة قيمة



كريم فايد صيدلة اسكندرية

_______________________________________________________



صفحة الهوم ورك




1- تقديم التهانى و الهدايا ل بريك دا تطبيق للصفحة الدينية "الهدايا" محنا بنرسم على كبير بردوا




2- تزودوا الدعاء شوية لان النتيجة بتقرب والتوتر بيزيد




3-التصويت طبعا




4-اللى نشر الرسالة يرجع ينشر الترجمة




الستة بتوع صيدلة

ده الى سمعته وده الى قريته وده الى انا عايزه اقوله

كلنا عارفين الحصار الى فيه غزه
وسمعنا عن الموضوع ده كتير

من كام يوم كده سمعت ان اسرائيل حاصرت غزه وان مصر مخلصهاش وفتحت لهم معبر رفح
ودى طبعا حركه جدعنه من الحكومه
- انا عارفه ان ده الطبيعى وان ده المفروض يحصل من باب العروبه بس بردو مصدقتش اننا ممكن نتحرك-
وبردو سمعت ان العرق المصرى طلع وبقوا يبيعوا السلع فى سينا بالضعف
ده غير ان مراسلين ال6 بتوع صيدله فى سينا بيقولوا انهم مش لاقين حاجه ياكلوها
وسمعت بردو انهم مسكوا 3 فلسطنين كانوا بيحاولوا يدخلوا مصر باحزمه ناسفه
سمعت ان مصر كانت بتفكر توصل كهربا لغزه بس كانت مكلفه جدااا
ده غير اننا لو عملنا الحركه دى كنا هننضرب هننضرب

وده كل الى سمعته تقريبا

اما بقى الى قريته فمعظمه مطلعتش منهم بجملتين على بعض مفيدين
الجرايد المصريه بتشيد بحركه الجدعنه
والفلسطينيه بتشكى وتشكر وتهدد

والعربيه كالمعتاد بتشجع

والرياضيه بتشيد بشجاعه ابو تريكه

اه ونسيت اقولكم على مقاله استغربتها جداااا

بعنوان اهل غزه يتحدون الظلام بالانجاب

وفبم معناه يعنى ان الاحصائيات اثبتت زياده معدل الانجاب فى فتره الحصار

ودى ميزه لان بكده عدد الفلسطنين (5,3مليون) قرب من عدد الاسرائيلين (5,5مليون)

فى الاخر الى عايزه اقوله

ياريت الى يقدر على حاجه يعملها حتى لو بالدعاء

وياريت لو الحكومه تزود امدادت الاكل فى سينا

وياريت تشوف الاسعار الى فى سينا اليومين دول

ياريت تخلى بالها على الحدود فى التفتيش

صحيح هم عرب واخواتنا وكل حاجه

بس زى ما فى الحلو فى الوحش

و حرص ولا تخونش

اخر حاجه لو حد ليه اصحاب فى غزه ياريت يسال عليهم اليومين دول

ده اكتر وقت ممكن يكونوا محتاجينا فيه

لما يتشقلب بينا الحال

مره اخويا كان بيمتحن امتحانات الشهور العاديه
شاف2 بيغشوا قالهم يبطلوا مبطلوش
راح قال للميس بتاعته
تخيلوا رد فعلها ايه...!؟
قالت له انت فتان انت مش عارف ان الفتنه اشد من القتل
جه يقولى هو انا فعلا فتان
قولت له لا طبعا الميس بتاعتك هى الى غلط يعنى انت لو شوفت حرامى وروحت بلغت عنه
يبقى انت كده فتان

كان نفسى اعلم الميس دى حاجه واحده "اذا راى احدكم منكرا فليغيره"

الى كان نفسى اوصلهولكم دلوقتى ان الجيل ده بيفهموه القيم غلط
يعنى لما احول اغير الغلط الى حوليا يبقى فتنه .........
_كده معظم الناس بقت تغيرها باضعف الايمان ( بقلبها)_
ولما اتناقش فى حاجه يبقى بجادل
لما اعلى صوتى وافرد عضلاتى ابقى كركتر ويتعمل لى الف حساب
ولما اضحك على حد يبقى فهلوه وشطاره
البجاحه بقى اسمها جرأه

مش عارفه لما جيل يتربى على مبادئ زى دى مستنين منه ايه
تفتكروا هو ده الجيل الى هيقدر يعدل حالنا
انا مش بتكلم على دفعه اخويا
احنا كجيل فينا ناس اتربت على كده
وبيبان فى تصرفاتهم جدااااااا
بس الناس الى فى جيلنا محتاجه مجهود اكبر من الى قد اخويا
صعب جداا انك تغير مبدأ واحد عايش عليه بقاله اكتر من 18 سنه
عشان كده نفسى نلحق الصغيرين نفسى نعلمهم ان الصح صح حتى لو الف وقف قصاده
نفسى اعلمهم انك اقوى حتى لو الى قدامك صوته اعلى

واخر حاجه نفسى فيها نشوف المدرسين الى بيدرسوا لولادنا
لان مش اى حد معاه ليسانس اداب ينفع يربى اجيال


اه نسيت اقولكم انا كنت بغش وانا صغيره D:
بس مبطله من فتره
خاصه بعد موقف كده حصل لى فى 3 اعدادى

loza

عندما تحتاج لالم يحيك

عندما تشناق لجرح يكويك
عندما تحتاج لالم يحيك
فلا تجور على نفسك
انظر حولك وتجاهل ما فيك

عندما تتذكر ماض يؤذيك
يبعدك عن نفسك يضنيك
فلتتجاهله
ولتجعل مستقبلك ترياق يشفيك

عندما تجد العالم حولك يرثيك

وكلامه صوط يؤذيك

ارحل

فرحيلك اجابه تنجيك

عندما تجد البسمه جهد يشقيك
والضحك دموع تغريك
ابكى
فدموعك خل يواسيك
....................
loza

العدد الستة من مجلة الستة

دا العدد السادس من مجلة الستة بتوع صيدلة

لذااااااااااا فقد قررنا اننا نضيف صفحة سادسة تعرفكوا علينا اكتر

1-الصفحه الدينيه

قال رسول الله- صلى الله عليه وسلم- :" احفظ الله يحفظك احفظ الله تجده اتجاهك اذا سألت فاسال الله واذا استعنت فاستعن بالله واعلم ان الامه لو اجتمعت على ان ينفعوك بشىء لن ينفعوك الا بشىء قد كتبه الله لك وان اجتمعت على ان يضروك بشىء لن يضروك الا بشىء قد كتبه الله عليك رٌفعت الاقلام وجفت الصحف" صدق رسول الله - صلى الله عليه وسلم-

بس كده :)

...............................................................

2- صفحه التناحه

دى صوره من لقطات الكام مكنش ينفع نعديها

دلوقتى الصوره هتكلمكم عن نفسها بس ركزوا شوية

حذفنا الصوره عشان صاحبها له مبرره الطبى

...............................................................................

3- صفحه اخبار اليوم

اخر اخبارنا ان الحمد لله خلصنا امتحانات بعد ترم تقيل جدااا وامتحانات اتقل "يعنى اهم خبر اننا رجعنا "

الشهر اللى فات لوزة فازت بالتوب بوست

وبما ان لوزة مقلة فى الكتابة ولما بتكتب بتفوز بالتوب بوست

ف قررنا نحن الستة ان بقية الشهر هيبئا بوستات ل لوزة بس عشان نعمل تصويت الشهر الجاى عليها وتفوز ببوست من بوستاتها التوب بوست هدية مننا

عيد ميلادfnan_ geology تم عشرين سنة

كل سنة وانت طيب

ودلوقتى تقدر تغنى منير براحتك

..........................................................................................

4- صفحه الاجازه (بدل الصيدليه)

كل اسبوعين اجازه وانتو طيبين

ناوين تعملوا ايه فى الاجازه..!؟

بالنسبه لنا .. فاحنا بنفكر نعمل حاجه فى الكليه

بس لسه بندرس الموضوع

ولوعرفنا نكمله هنقولكم عليها الترم التانى ان شاء الله

وفى حاجه كمان هى صحيح مطرقعه شويه

بس الفضول بقى D:

صحيح لسه معملنهاش بس بنرتب لها بردو

...................................

5-صفحه التسالى

دخلنا فيلم احلام حقيقه من ايام امتحانات العملى كده

تمثيلهم كلهم كان حلو بس حنان ترك وداليا البحيرى كانوا معديين

وتصوير الفيلم كمان كان جديد و مختلف

ممكن تكون فكرة الفيلم متاخدة من فيلم اجنبى

بس فعلا التصوير فوق الممتاز

الفيلم كله كان لذيذ

بس مشهد حنان ترك وهى بتنتحر كان استعباطه من المؤلف

الصورة اللى فوق دى من احلى الصور اللى فى الفيلم حنان ترك بتبص للنور عشان متنامش

...............................................................

6- الصفحة السادسة

كنا مجهزين اننا نعمل سلايد ملوش حل و يبئا مفاجأة المجلة دى يعرفكوا بينا اكتر

وبما ان احنا جهلة تكنولوجيا مش عارفين ننزل لا اغنية ولا سلايد

ف كل ما نعمله و نحط الكود يطلع فيه القطط الفاطسة

وحتى الشكل اللى عملناه مش هوا اللى فى اللينك تحت

ف هتتفرجوا على حاجة كدة على ما اوسم

ومرضناش نستعين بالكلاوى الجينيس بتاعتنا "كهرمانة"

http://www.slide.com/r/LnTWpczG6T_F9ulHwOltddwShVpRdHYe?previous_view=lt_embedded_url

الستة بتوع صيدلة

مغلق للامتحانات

22-1

الستة بتوع صيدلة

البقاء لله وحده

"البقاء لله وحده" جمله بنقولها كتير بس مش كتير بنبقى صادقين فى احساسنا..او بمعنى تانى مش كتير بنبقى راضيين بيها..و كتير بنقولها عشان نمنع شيطان انه يدخلنا من باب حزننا على موت حد فنقول الجملة كذا مرةحتى لو فى دماغنا..اول مرة نبقى بنقولها عشان اتعودنا نقولها اول مايموت حد سواء عزيز علينا او لأ و تانى مرة نقولها نبقى بنقولها عشان نخرس تفكيرنا من انه يقول"ليه مات" و تالت مرة بنقولها بنبقى بندعى ربنا باسلوب غير مباشر انه يرضينا بقدره و يهون علينا الفراق

انا مش بقول ان كل الناس كده بس على الاقل انا حياتى كلها كانت كده

لحد من 3 ايام بالضبط...لما جدى توفى...مش عارفة ليه ماتزلزلتش من جوه زى كل مرة...مش عارفة ليه ماتصدمتش و مابكيتش...انا بكل تلقائية لبست هدومى عادى و نزلت الكليه و عشت يومى عادى..اتصلت ببريك اقولها انى مش هجيلها و اتصلت بكهرمانة طلبت منها تعرف لوزة انى مش رايحة معاها عند بريك..و لما كهرمانة سألتنى ليه قلتلها جدو اتوفى..لقيتها بتقولى "وانتى عادى كده؟!!"السؤال ده رجع فوقنى..انا ليه مش حسة بأى تأثر رغم انى كنت بحب جدو جدا..السؤال ده فضل كل دقيقة و التانية يطلع ادام عينيا مع كل حد ييجى يعزينى..و قلت يمكن انا مصدومة فبنكر حزنى على جدو حتى ادام نفسى..و فضلت خايفة من اللحظة اللى هفوق فيها من صدمتى و من اللحظة اللى هفضل افتكر فيها جدو و كلامه عن انه عاوز يشوفنى من الاوائل على الجمهوريه و كلامه عن الصيدليه اللى هيفتحهالى فى الشقة اللى تحت و كلامه عن اننا نسيب شبين و نرجع نقعد معاه فى البلد و افتكر صوته و هو بيقرا قرآن بالليل فى الايام اللى بات فيه عندنا و استغرابى انه بيختم القرآنكل يومين فى رمضان..وافتكر صوته وهو بيصلى بيا انا وشادى..و افتكر زمان لما كان بياخدنى الارض انا و احمد و مصطفى واحنا صغيرين و لما قعدنا نحاول نشد الجزر من الارض و افتكر و افتكر وافتكر...

و شويه و قلت لنفسى انى الطبيعى مااضايقش من قضاء ربنا..وان الطبيعى انه جدو مات..و انى مش متضايقة لانى عارفة انه راح عالم تانيه احلى كتير من هنا مع صحبة احلى كتير من صحبتنا و لانى عارفة ان ربنا جمعه بناس زعل معانا كتير على فراقهم..و انه ان شاء الله ذنبه مغفور و ان ربنا عفو كريم وفضلت مقتنعة بالكلام ده لحد ما بدأت كتابة البوست ده

ساعتها بس عرفت انى بضحك على نفسى و الا ايه معنى انى مش عارفة ابطل عياط و انا بكتب

البقاء لله وحده..البقاء لله وحده...البقاء لله وحده

sara

حكاية بنت

قضت البنت على نفسها

لما فضلت طول عمرها

تحكى حكاية مش حكايتها

تكتب قصة مش قصتها

خايفة تحب الشاطر حسن

يروح و يسيبها و ميرجعش

خايفة تنادى الفارس الاخضر

يروح وكانه مبيسمعش

خايفة تطير برا القصة

تلقى الحلم الطاير ريش

قضت البنت على نفسها

لما فضلت طول عمرها

خايفة تبص ل صورة لها

تطلع صورة بهتانة

مفيش برواز

مفيش الوان

مفيش تحابيش

قضت البنت على نفسها

لما فضلت طول عمرها

ماسكة الفرش مبترسمش

ماهى خايفة ترسم لوحة

تلقى الزيت ميكفيش

break

فانتازيا سنفورة

تعمل ايه لو كنت نايم و سمعت صوت المنبه ضرب فقمت "رغم انفك"غسلت وشك و لبست هدومك و سرحت شعرك و نزلت جرى لانك كالعادة متأخر فركبت عربيتك او ركبت الاتوبيس و ناهيك عن زحمة المرور و خنقة الاشارات المهم وصلت شغلك او الكلية بتاعتك و اصطحبت بوش المدير بتاعك او دكتور المادة الخنيقة اللى انت مابتحبهاش ده غير وش اصحابك اللى انت لسه سايبهم امبارحززو رحت اشتغلت او حضرت محاضرة و غالبا مافهمتش منها حاجة و بعدين نزلت عشان تفطر "ما انت يا عينى نزلت جرى من غير فطار"و بعد كده رجعت تانى لشغلك او محاضرتك.المهم فى اخر اليوم روحت برده فى الزحمة و رجعت بيتكم زهقان و متضايق فاتخانقت مع مراتك لو متجوز او مع مامتك لو كنت عايش مع اهلك و يدوبك غيرت هدومك و اتغديت و بعد يوم طوييييييل اووىىى و ممل جدا لسه ماحطتش دماغك على المخدة عشان تنام سمعت صوت المنبه بيضرب و و ايد مامتك بتخبط على كتفك و بتقولك اصحى بقى عشان انت اتأخرت و اذ "تفوجأ"و يفاجأك القدر "فى نفس الوقت"بانك كل ده كنت نايم بتحلم ز هيكون رد فعلك ايه؟؟؟طب هيكون جسمك تعبان ولا مرتاح؟

طب تقدر تقولى دلوقتى وبأه انت نايم ولا صاحى...تقدر تأكدلى انك صاحى ما يمكن ده كمان كله حلم و انت مش عارف ... ومش عايزة حد يقولى الحياة حلم كبير و الحاجات دى عشان مابحبهاش

عايز رأى العلم فى الموضوع ده؟!!

انت تقوم تغسل وشك كده فى السريع و لو جنبك حد بس يكونص احى خليه يقرصك عشان ترد عليه و انت فايق

thanks 4 ur patience

فانتازيا

تحديث:معلش يا جماعة سنفورة بتعتذر عن الرد حاليا عشان معندهاش نت وعشان المذاكرة

مش عارفة ليه

مش عارفة ليه كل حاجة حلوة بتحصلى ببقى خايفة اوى من الحاجة الوحشة اللى بعدها ....كتير مش بلحق افرح بالحاجة الحلوة دى لانى بفضل احسب ازاى اتفادى الحاجة الوحشة اللى بعدها

اليومين دول انا فى حاجة حلوة اوى اوى اوى بس رغم كده قاعدة احسبلها ...قاعدة احسب يا ترى انا سيّبتها اوى؟ولا انا بس تجاهلت خوفى من اللى جاى؟...يا ترى يا سارة انتى مش خايفة من اللى بتعمليه؟.. يا ترى انتى واثقة و متأكده؟..يا ترى نهايه الحاجة الحلوة دى ايه؟حلوة و لا وحشة؟.يا ترى يا ترى يا ترى

لحد ماتتقلب فرحتى دى لقلب مقبوض خايف من اجابات الاسئلة دى....ساعتها افضل افكر و اقول يا رب.. يا رب الحاجة الحلوة دى تبقى كويسة ليا .. يارب تكون راضى عنها...يارب لو كزيسه و راضى عنها خلينى اكمل فيها... يا رب لو مش كويسة و مش راضى عنها... خليها كويسة و ارضى عنها بئا :) و لما عقلى يوصل للجمله دى ساعتها بس استريح و اقول ان شاء الله ربنا يبقى راضى عنها

عارفة انى كلامى اهبل و صدعتكم بس انا لما ببقى فرحانة اوى ببقى عايزة اقول للناس كلها

......................................................................................................................................

و ياريت بلاش ردود من اى حد عشان انا قصدت اكتب الكلام ده على البلوج عشان اتكلم انا لما ابقى عايزة اتكلم و مش عايزة اسمع

from sara with love