العدد السابع من مجلة الستة بتوع صيدلة

طبعا العدد دا قريب من اللى قبله ..دا لأن العدد اللى قبله هو اللى اتاخر جدا بسبب ظروف الامتحانات

الصفحة الدينية

كلنا ممكن نصادف ناس نحبهم و نحب نتعامل معاهم و نحب نكون زيهم
واحنا هنتكلم عن بعض االصفات اللى ممكن تخلى الواحد يكون جذاب فى نظر الاخرين
طبعا صفات مكتسبة
1-قال رسول الله صلى الله عليه وسلم: تبسمك في وجه أخيك صدقة ....ودى نصيحه اكثر الخلق جاذبيه وحباً صلى الله عليه وسلم
2- قال رسول الله صلى الله عليه وسلم حب لأخيك ماتحبه لنفسك
3-قال رسول الله صلى الله عليه وسلم: ألتمس لأخيك سبعين عذرا
4-قال رسول الله صلى الله عليه وسلم:( والذي نفسي بيده ..لا تدخلوا الجنة حتى تؤمنوا.. ولا تؤمنوا حتى تحابوا... أو لا أدلكم على شيء إذا فعلتموه تحاببتم أفشوا السلام بينكم)
5- قال رسول الله صلى الله عليه وسلم:( تهادوا تحابوا.


.نسأل الله تعالى ان لا نكون ممن يقولون ولا يفعلون

_______________________________________
صفحة الاهداءات




اهداء الشهر ده ل بريك ب مناسبة عيد ميلادها السعيد
وتحية خاصة من بابا محمد و جدو اسماعيل على المناسبة السعيدة وبيطلبوا اغنية قالى شرابى مدلل
وكان ترتيب الاحداث
شهر 12 كهرمانة
شهر 1 لوزة
شهر 2 بريك
و شهر تلاتة هنجمع ونجيب فلاشة
_______________________
اهداء تانى

الى د/ احمد ربيع

انت فين مرة واحدة انقطعت و بطلت تزورنا

:(

________________

М€ŝЋМΣŞĦ

قفل البلوج مش سياسة و بس و بدون اسباب

ياريت يا تطمنا عليك

يا ترجع تانى

وترجع للتدوين احسن

______________________________________

صفحة التناحة

الو
1
2
3
اس اس

بنجرب البلوج بنشوف بيشتغل ولا لأ
تناحة بئا

_______________________________________

صفحة أخبار اليوم
طبعا فى تصويت على مواضيع لوزة ل شهر 12
اما عن اخبارنا بئا
فى حالة من القلق من النتيجة مع ان لسة بدرى عليها

________________________
صفحة التسالى

حد سمع عن حنظلة
حنظلة دى الشخصية اللى اخترعها ناجى العلى رسام كاريكتيرفلسطينى استشهد عام 1987واللى كانت بتشهد على كل كاريكاتير بيرسمه
عمره 10 سنين
الاول كان بيبص من وشه وبعدين بئا يدينا ضهره
ويقول ناجي العلي بأن حنظلة هو بمثابة الأيقونة التي تحفظ روحه من الانزلاق ، وهو نقطة العرق التي تلسع جبينه اذا ما جبن أو تراجع
ورغم ان ناجى العلى معاصرش الاحداث الحالية
الا انك هتحس انه رجل لكل العصور

دا موقع ناجى العلى

و فى بلوج لقيناه مخصوص ل مختارات ناجى العلى



___________________________________



الصفحة الصيدلية













المرة دى مش هنتكلم عن حاجة خاصة ب كلية صيدلة أد ما هنتكلم عن استخفاف بينا




مش ك طلبة صيدلة بس ك مسلمين




امال ايه دخل صيدلة بالموضوع




لان اللى بعت الرسالة دى طلبة صيدلة طالبين مننا ننشرها و لينا الأجر و الثواب




الرسالة منتشرة على الفيس بوك و الايميل و اكيد وصلت لكتير منكوا والله اعلم بعتها ل غيره ولا لأ

هنسيبكوا مع كلام طالب فى صيدلة اسكندرية

القرآن ممنوع في هولندا والمسلمين يرفعون شكوى والحكومه تصدر تصويت وللأسف الإنتصار لحد الآن لهم43%مقابل 57% لهم لا تخذلو كتاب الله صوت يا مسلم للقرآن وساعدو على نشرها للجميع لنصره الاسلام والقران الكريم و أنشر تؤجر

وصلتني الرسالة دي من أكثر من شخص ووجدتها بالملايين علي الايميلات والفيس بوك وبالفعل استفزني جداً الموضوع كمسلم وقمت بالدخول علي الموقع للتصويت لصالح القرآن ولكني فوجئت بالموقع كله باللغة الهولندية

وقرأت الجملة فلم أجد كلمة تصلح أن تكون كلمة قرأنوهاهي الجملة لتقرؤهاHet is goed als het kabinet besluit tot

verlenging van de missie in Uruzganeen (green colour) oneen (red colour)

فدفعني الفضول للبحث عن الترجمة وكانت كالآتي هل توافق علي رأي الحكومة في مد خدمة قوات حفظ السلام في أفغانستان أو لا توافقeen = agree oneen = disagree

ايه رأيك؟؟؟مهزلة؟؟؟ صح؟؟

ده طبعاً يعبر عن مدي استخفاف مخترع الرسالة الأول العبقري اللي ربنا هيحرقه في نار جهنم عشان بيكذب علي الله ورسوله يعبر عن مدي استخفاف شعوب العالم بالمسلمين ووصفهم لينا بالجهل فعلاً

الرسالة وصلتني من طلبة صيدلة وهندسة وطب !!!!!!!ولزمايلي ولكل المثقفين اللي بيستخدموا النت بقول عيب ولزمايلي خصوصاً بقول عيب قوي دا احنا طلبة صيدلة؟؟؟

مش معهد فني صحي لوالب

وعايز اقولكوا الناس بتوع امريكا او اسرائيل طبعاً اللي في مصلحتهم ان قوات حفظ السلام تمشي

الناس دي صيع يا جماعة !!! والله صيع

شوف الدماغ اللي دارسة نفسية المسلمين؟؟؟للدرجة دي الناس دي فهمينا وبيعرفوا يوجهونا علي مزاجهم وكمان بيستغلوا اشرف كلام في اغراض سياسية؟؟؟

وعايز ابشركواعلي فكرة يا جماعة الناس دي نجحت ونسبت عدم الموافقة اللي هما عايزينها بقت 51% مش موافقين علي بقاء قوات حفظ السلام في افغانستان بدل ما كانت في الأول 43%واللي نجح الموضوع ده المسلمين

انا شايف اننا مفروض زي ما نشرناها للناس كلها ننشر الترجمة

وكفاية بقي تهزيق وقلة قيمة



كريم فايد صيدلة اسكندرية

_______________________________________________________



صفحة الهوم ورك




1- تقديم التهانى و الهدايا ل بريك دا تطبيق للصفحة الدينية "الهدايا" محنا بنرسم على كبير بردوا




2- تزودوا الدعاء شوية لان النتيجة بتقرب والتوتر بيزيد




3-التصويت طبعا




4-اللى نشر الرسالة يرجع ينشر الترجمة




الستة بتوع صيدلة

ده الى سمعته وده الى قريته وده الى انا عايزه اقوله

كلنا عارفين الحصار الى فيه غزه
وسمعنا عن الموضوع ده كتير

من كام يوم كده سمعت ان اسرائيل حاصرت غزه وان مصر مخلصهاش وفتحت لهم معبر رفح
ودى طبعا حركه جدعنه من الحكومه
- انا عارفه ان ده الطبيعى وان ده المفروض يحصل من باب العروبه بس بردو مصدقتش اننا ممكن نتحرك-
وبردو سمعت ان العرق المصرى طلع وبقوا يبيعوا السلع فى سينا بالضعف
ده غير ان مراسلين ال6 بتوع صيدله فى سينا بيقولوا انهم مش لاقين حاجه ياكلوها
وسمعت بردو انهم مسكوا 3 فلسطنين كانوا بيحاولوا يدخلوا مصر باحزمه ناسفه
سمعت ان مصر كانت بتفكر توصل كهربا لغزه بس كانت مكلفه جدااا
ده غير اننا لو عملنا الحركه دى كنا هننضرب هننضرب

وده كل الى سمعته تقريبا

اما بقى الى قريته فمعظمه مطلعتش منهم بجملتين على بعض مفيدين
الجرايد المصريه بتشيد بحركه الجدعنه
والفلسطينيه بتشكى وتشكر وتهدد

والعربيه كالمعتاد بتشجع

والرياضيه بتشيد بشجاعه ابو تريكه

اه ونسيت اقولكم على مقاله استغربتها جداااا

بعنوان اهل غزه يتحدون الظلام بالانجاب

وفبم معناه يعنى ان الاحصائيات اثبتت زياده معدل الانجاب فى فتره الحصار

ودى ميزه لان بكده عدد الفلسطنين (5,3مليون) قرب من عدد الاسرائيلين (5,5مليون)

فى الاخر الى عايزه اقوله

ياريت الى يقدر على حاجه يعملها حتى لو بالدعاء

وياريت لو الحكومه تزود امدادت الاكل فى سينا

وياريت تشوف الاسعار الى فى سينا اليومين دول

ياريت تخلى بالها على الحدود فى التفتيش

صحيح هم عرب واخواتنا وكل حاجه

بس زى ما فى الحلو فى الوحش

و حرص ولا تخونش

اخر حاجه لو حد ليه اصحاب فى غزه ياريت يسال عليهم اليومين دول

ده اكتر وقت ممكن يكونوا محتاجينا فيه

لما يتشقلب بينا الحال

مره اخويا كان بيمتحن امتحانات الشهور العاديه
شاف2 بيغشوا قالهم يبطلوا مبطلوش
راح قال للميس بتاعته
تخيلوا رد فعلها ايه...!؟
قالت له انت فتان انت مش عارف ان الفتنه اشد من القتل
جه يقولى هو انا فعلا فتان
قولت له لا طبعا الميس بتاعتك هى الى غلط يعنى انت لو شوفت حرامى وروحت بلغت عنه
يبقى انت كده فتان

كان نفسى اعلم الميس دى حاجه واحده "اذا راى احدكم منكرا فليغيره"

الى كان نفسى اوصلهولكم دلوقتى ان الجيل ده بيفهموه القيم غلط
يعنى لما احول اغير الغلط الى حوليا يبقى فتنه .........
_كده معظم الناس بقت تغيرها باضعف الايمان ( بقلبها)_
ولما اتناقش فى حاجه يبقى بجادل
لما اعلى صوتى وافرد عضلاتى ابقى كركتر ويتعمل لى الف حساب
ولما اضحك على حد يبقى فهلوه وشطاره
البجاحه بقى اسمها جرأه

مش عارفه لما جيل يتربى على مبادئ زى دى مستنين منه ايه
تفتكروا هو ده الجيل الى هيقدر يعدل حالنا
انا مش بتكلم على دفعه اخويا
احنا كجيل فينا ناس اتربت على كده
وبيبان فى تصرفاتهم جدااااااا
بس الناس الى فى جيلنا محتاجه مجهود اكبر من الى قد اخويا
صعب جداا انك تغير مبدأ واحد عايش عليه بقاله اكتر من 18 سنه
عشان كده نفسى نلحق الصغيرين نفسى نعلمهم ان الصح صح حتى لو الف وقف قصاده
نفسى اعلمهم انك اقوى حتى لو الى قدامك صوته اعلى

واخر حاجه نفسى فيها نشوف المدرسين الى بيدرسوا لولادنا
لان مش اى حد معاه ليسانس اداب ينفع يربى اجيال


اه نسيت اقولكم انا كنت بغش وانا صغيره D:
بس مبطله من فتره
خاصه بعد موقف كده حصل لى فى 3 اعدادى

loza

عندما تحتاج لالم يحيك

عندما تشناق لجرح يكويك
عندما تحتاج لالم يحيك
فلا تجور على نفسك
انظر حولك وتجاهل ما فيك

عندما تتذكر ماض يؤذيك
يبعدك عن نفسك يضنيك
فلتتجاهله
ولتجعل مستقبلك ترياق يشفيك

عندما تجد العالم حولك يرثيك

وكلامه صوط يؤذيك

ارحل

فرحيلك اجابه تنجيك

عندما تجد البسمه جهد يشقيك
والضحك دموع تغريك
ابكى
فدموعك خل يواسيك
....................
loza

العدد الستة من مجلة الستة

دا العدد السادس من مجلة الستة بتوع صيدلة

لذااااااااااا فقد قررنا اننا نضيف صفحة سادسة تعرفكوا علينا اكتر

1-الصفحه الدينيه

قال رسول الله- صلى الله عليه وسلم- :" احفظ الله يحفظك احفظ الله تجده اتجاهك اذا سألت فاسال الله واذا استعنت فاستعن بالله واعلم ان الامه لو اجتمعت على ان ينفعوك بشىء لن ينفعوك الا بشىء قد كتبه الله لك وان اجتمعت على ان يضروك بشىء لن يضروك الا بشىء قد كتبه الله عليك رٌفعت الاقلام وجفت الصحف" صدق رسول الله - صلى الله عليه وسلم-

بس كده :)

...............................................................

2- صفحه التناحه

دى صوره من لقطات الكام مكنش ينفع نعديها

دلوقتى الصوره هتكلمكم عن نفسها بس ركزوا شوية

حذفنا الصوره عشان صاحبها له مبرره الطبى

...............................................................................

3- صفحه اخبار اليوم

اخر اخبارنا ان الحمد لله خلصنا امتحانات بعد ترم تقيل جدااا وامتحانات اتقل "يعنى اهم خبر اننا رجعنا "

الشهر اللى فات لوزة فازت بالتوب بوست

وبما ان لوزة مقلة فى الكتابة ولما بتكتب بتفوز بالتوب بوست

ف قررنا نحن الستة ان بقية الشهر هيبئا بوستات ل لوزة بس عشان نعمل تصويت الشهر الجاى عليها وتفوز ببوست من بوستاتها التوب بوست هدية مننا

عيد ميلادfnan_ geology تم عشرين سنة

كل سنة وانت طيب

ودلوقتى تقدر تغنى منير براحتك

..........................................................................................

4- صفحه الاجازه (بدل الصيدليه)

كل اسبوعين اجازه وانتو طيبين

ناوين تعملوا ايه فى الاجازه..!؟

بالنسبه لنا .. فاحنا بنفكر نعمل حاجه فى الكليه

بس لسه بندرس الموضوع

ولوعرفنا نكمله هنقولكم عليها الترم التانى ان شاء الله

وفى حاجه كمان هى صحيح مطرقعه شويه

بس الفضول بقى D:

صحيح لسه معملنهاش بس بنرتب لها بردو

...................................

5-صفحه التسالى

دخلنا فيلم احلام حقيقه من ايام امتحانات العملى كده

تمثيلهم كلهم كان حلو بس حنان ترك وداليا البحيرى كانوا معديين

وتصوير الفيلم كمان كان جديد و مختلف

ممكن تكون فكرة الفيلم متاخدة من فيلم اجنبى

بس فعلا التصوير فوق الممتاز

الفيلم كله كان لذيذ

بس مشهد حنان ترك وهى بتنتحر كان استعباطه من المؤلف

الصورة اللى فوق دى من احلى الصور اللى فى الفيلم حنان ترك بتبص للنور عشان متنامش

...............................................................

6- الصفحة السادسة

كنا مجهزين اننا نعمل سلايد ملوش حل و يبئا مفاجأة المجلة دى يعرفكوا بينا اكتر

وبما ان احنا جهلة تكنولوجيا مش عارفين ننزل لا اغنية ولا سلايد

ف كل ما نعمله و نحط الكود يطلع فيه القطط الفاطسة

وحتى الشكل اللى عملناه مش هوا اللى فى اللينك تحت

ف هتتفرجوا على حاجة كدة على ما اوسم

ومرضناش نستعين بالكلاوى الجينيس بتاعتنا "كهرمانة"

http://www.slide.com/r/LnTWpczG6T_F9ulHwOltddwShVpRdHYe?previous_view=lt_embedded_url

الستة بتوع صيدلة

مغلق للامتحانات

22-1

الستة بتوع صيدلة

البقاء لله وحده

"البقاء لله وحده" جمله بنقولها كتير بس مش كتير بنبقى صادقين فى احساسنا..او بمعنى تانى مش كتير بنبقى راضيين بيها..و كتير بنقولها عشان نمنع شيطان انه يدخلنا من باب حزننا على موت حد فنقول الجملة كذا مرةحتى لو فى دماغنا..اول مرة نبقى بنقولها عشان اتعودنا نقولها اول مايموت حد سواء عزيز علينا او لأ و تانى مرة نقولها نبقى بنقولها عشان نخرس تفكيرنا من انه يقول"ليه مات" و تالت مرة بنقولها بنبقى بندعى ربنا باسلوب غير مباشر انه يرضينا بقدره و يهون علينا الفراق

انا مش بقول ان كل الناس كده بس على الاقل انا حياتى كلها كانت كده

لحد من 3 ايام بالضبط...لما جدى توفى...مش عارفة ليه ماتزلزلتش من جوه زى كل مرة...مش عارفة ليه ماتصدمتش و مابكيتش...انا بكل تلقائية لبست هدومى عادى و نزلت الكليه و عشت يومى عادى..اتصلت ببريك اقولها انى مش هجيلها و اتصلت بكهرمانة طلبت منها تعرف لوزة انى مش رايحة معاها عند بريك..و لما كهرمانة سألتنى ليه قلتلها جدو اتوفى..لقيتها بتقولى "وانتى عادى كده؟!!"السؤال ده رجع فوقنى..انا ليه مش حسة بأى تأثر رغم انى كنت بحب جدو جدا..السؤال ده فضل كل دقيقة و التانية يطلع ادام عينيا مع كل حد ييجى يعزينى..و قلت يمكن انا مصدومة فبنكر حزنى على جدو حتى ادام نفسى..و فضلت خايفة من اللحظة اللى هفوق فيها من صدمتى و من اللحظة اللى هفضل افتكر فيها جدو و كلامه عن انه عاوز يشوفنى من الاوائل على الجمهوريه و كلامه عن الصيدليه اللى هيفتحهالى فى الشقة اللى تحت و كلامه عن اننا نسيب شبين و نرجع نقعد معاه فى البلد و افتكر صوته و هو بيقرا قرآن بالليل فى الايام اللى بات فيه عندنا و استغرابى انه بيختم القرآنكل يومين فى رمضان..وافتكر صوته وهو بيصلى بيا انا وشادى..و افتكر زمان لما كان بياخدنى الارض انا و احمد و مصطفى واحنا صغيرين و لما قعدنا نحاول نشد الجزر من الارض و افتكر و افتكر وافتكر...

و شويه و قلت لنفسى انى الطبيعى مااضايقش من قضاء ربنا..وان الطبيعى انه جدو مات..و انى مش متضايقة لانى عارفة انه راح عالم تانيه احلى كتير من هنا مع صحبة احلى كتير من صحبتنا و لانى عارفة ان ربنا جمعه بناس زعل معانا كتير على فراقهم..و انه ان شاء الله ذنبه مغفور و ان ربنا عفو كريم وفضلت مقتنعة بالكلام ده لحد ما بدأت كتابة البوست ده

ساعتها بس عرفت انى بضحك على نفسى و الا ايه معنى انى مش عارفة ابطل عياط و انا بكتب

البقاء لله وحده..البقاء لله وحده...البقاء لله وحده

sara

حكاية بنت

قضت البنت على نفسها

لما فضلت طول عمرها

تحكى حكاية مش حكايتها

تكتب قصة مش قصتها

خايفة تحب الشاطر حسن

يروح و يسيبها و ميرجعش

خايفة تنادى الفارس الاخضر

يروح وكانه مبيسمعش

خايفة تطير برا القصة

تلقى الحلم الطاير ريش

قضت البنت على نفسها

لما فضلت طول عمرها

خايفة تبص ل صورة لها

تطلع صورة بهتانة

مفيش برواز

مفيش الوان

مفيش تحابيش

قضت البنت على نفسها

لما فضلت طول عمرها

ماسكة الفرش مبترسمش

ماهى خايفة ترسم لوحة

تلقى الزيت ميكفيش

break

فانتازيا سنفورة

تعمل ايه لو كنت نايم و سمعت صوت المنبه ضرب فقمت "رغم انفك"غسلت وشك و لبست هدومك و سرحت شعرك و نزلت جرى لانك كالعادة متأخر فركبت عربيتك او ركبت الاتوبيس و ناهيك عن زحمة المرور و خنقة الاشارات المهم وصلت شغلك او الكلية بتاعتك و اصطحبت بوش المدير بتاعك او دكتور المادة الخنيقة اللى انت مابتحبهاش ده غير وش اصحابك اللى انت لسه سايبهم امبارحززو رحت اشتغلت او حضرت محاضرة و غالبا مافهمتش منها حاجة و بعدين نزلت عشان تفطر "ما انت يا عينى نزلت جرى من غير فطار"و بعد كده رجعت تانى لشغلك او محاضرتك.المهم فى اخر اليوم روحت برده فى الزحمة و رجعت بيتكم زهقان و متضايق فاتخانقت مع مراتك لو متجوز او مع مامتك لو كنت عايش مع اهلك و يدوبك غيرت هدومك و اتغديت و بعد يوم طوييييييل اووىىى و ممل جدا لسه ماحطتش دماغك على المخدة عشان تنام سمعت صوت المنبه بيضرب و و ايد مامتك بتخبط على كتفك و بتقولك اصحى بقى عشان انت اتأخرت و اذ "تفوجأ"و يفاجأك القدر "فى نفس الوقت"بانك كل ده كنت نايم بتحلم ز هيكون رد فعلك ايه؟؟؟طب هيكون جسمك تعبان ولا مرتاح؟

طب تقدر تقولى دلوقتى وبأه انت نايم ولا صاحى...تقدر تأكدلى انك صاحى ما يمكن ده كمان كله حلم و انت مش عارف ... ومش عايزة حد يقولى الحياة حلم كبير و الحاجات دى عشان مابحبهاش

عايز رأى العلم فى الموضوع ده؟!!

انت تقوم تغسل وشك كده فى السريع و لو جنبك حد بس يكونص احى خليه يقرصك عشان ترد عليه و انت فايق

thanks 4 ur patience

فانتازيا

تحديث:معلش يا جماعة سنفورة بتعتذر عن الرد حاليا عشان معندهاش نت وعشان المذاكرة

مش عارفة ليه

مش عارفة ليه كل حاجة حلوة بتحصلى ببقى خايفة اوى من الحاجة الوحشة اللى بعدها ....كتير مش بلحق افرح بالحاجة الحلوة دى لانى بفضل احسب ازاى اتفادى الحاجة الوحشة اللى بعدها

اليومين دول انا فى حاجة حلوة اوى اوى اوى بس رغم كده قاعدة احسبلها ...قاعدة احسب يا ترى انا سيّبتها اوى؟ولا انا بس تجاهلت خوفى من اللى جاى؟...يا ترى يا سارة انتى مش خايفة من اللى بتعمليه؟.. يا ترى انتى واثقة و متأكده؟..يا ترى نهايه الحاجة الحلوة دى ايه؟حلوة و لا وحشة؟.يا ترى يا ترى يا ترى

لحد ماتتقلب فرحتى دى لقلب مقبوض خايف من اجابات الاسئلة دى....ساعتها افضل افكر و اقول يا رب.. يا رب الحاجة الحلوة دى تبقى كويسة ليا .. يارب تكون راضى عنها...يارب لو كزيسه و راضى عنها خلينى اكمل فيها... يا رب لو مش كويسة و مش راضى عنها... خليها كويسة و ارضى عنها بئا :) و لما عقلى يوصل للجمله دى ساعتها بس استريح و اقول ان شاء الله ربنا يبقى راضى عنها

عارفة انى كلامى اهبل و صدعتكم بس انا لما ببقى فرحانة اوى ببقى عايزة اقول للناس كلها

......................................................................................................................................

و ياريت بلاش ردود من اى حد عشان انا قصدت اكتب الكلام ده على البلوج عشان اتكلم انا لما ابقى عايزة اتكلم و مش عايزة اسمع

from sara with love

عصف الهواء

حياتى مليئة بالخبرات ..و كل حياتى لا تتعدى لحظات

مررت بعاشقين يتهامسان.. اصابعهم تتشابك فى حنان .. رايت لهفتهم حين اللقاء و رأيتها حين الفراق

رأيت طفولة بريئة تهيم بحب ام مليئة بالحنين. تحمله بين ذراعيها للأمان فيلامس وجهها صباعيه الواهيان

رايت عراك و شجار و انفصال و حب يضيع و يفقد تحت الركام.

.رايت براءة انهكها الارتباك فتنهار بين حزينة و باك

..رايته ينظر لعصفورين يطيران يلفان حول ابناء صغار

.رأيت نظرة امل فى عينيه اعادت الحياة الى و اليه..جعلنى انتظر و ابغى البقاء لارى لحظة العودة و اللقاء لاثبت ان الحب لا يضيع هباءولكن..........

حياتى فاجأها الفناء .. لأسقط و ارتطم بأرض الجفاء ... فما انا سوى كيس طائر اطاره الحظ و عصف الهواء

from sara with love

العدد الخامس من مجلة الستة بتوع صيدلة

أولا احنا بنعتذر عن التأخير المرة دى ...و دا طبعا ل ظروف الامتحانات

و كمان المجلة مش أد كدة

بس اهو اى حاجة تيجى مننا حلوة :D

جوا العدد المرة دى هتلاقى فجأة فى صفحة التسالى عيد ميلاد احد افراد الستة بتوع صيدلة و الكثير من المفاجات بانتظارك بس اشترى العدد :d

مجلة الستة بتوع صيدلة...و هل يخفى الخبر؟

بنعمل اعلانات اهو

اولا الصفحة الدينية

هيا رسالة لحد معين -مع اننا عارفين ان الحاجات دى مش بتأثر فيه-

قال تعالى { أَوَلَمَّا أَصَابَتْكُم مُّصِيبَةٌ قَدْ أَصَبْتُم مِّثْلَيْهَا قُلْتُمْ أَنَّى هَذَا قُلْ هُوَ مِنْ عِندِ أَنْفُسِكُمْ إِنَّ اللّهَ عَلَى كُلِّ شَيْءٍ قَدِيرٌ } [165: سورة آل عمران]

[[البر لا يبلى والذنب لا ينسى والديان لا يموت, افعل ما شئت فكما تدين تدان]]

__________________________

صفحة خاصة

توفت الى رحمة الله ابنة أسامة- بيتنا القديم-

الموضوع لمن يرغب فى تعزيته

http://osamaislamic.blogspot.com/2007/11/blog-post_29.html

ان شاء الله تكون شفيعة ليك يوم القيامة يا سمسم و تجتمع بيها فى الجنة

___________________________

صفحة التناحة

تخهعابؤثابصعقثلغاقبلؤ صلغافبؤقثبفلغؤغافقلبلربقغثفبلغثف

لقيتنا انه من التناحة اننا نكتب ب نفس لون البلوج عشان نعميكوا و تضغطوا على الكلام متلاقوش حاجة ليها معنى تقروها

محدش يضايق

دى تناحة بس

حدد بالماوس عشان الكلام يظهر

____________________________________

أخبار اليوم

عيد ميلاد كهرمانة الشهر ده

كل سنة وانتى طيبة يا كهرورتنا وعقبال مليون سنة و يارب تفوزى بالتوب بوست عشان منجبلكيش هدية على التوب بوست انتى كمان

_________________________

صفحة التسالى " كايدة العزال انا من يومى ايوة اه"

احنا من كتر الشهرة و الحمد لله فى ناس عملتنا بلوج مخصوص

مش ناس هوا واحد كان طمطم اللى بيرد عندنا لو خدتوا بالكوا

المهم انه عملنا بلوج مخصوص و حاطط صور حصرية لينا فى رأيه زى ما هو شايفنا

الغريب بئا لو هوا شايفنا كدة امال بيشوف نفسه ازاى فى المراية

:d

البلوج اسمه

مركب ورق فى الترعة

الستة بتوع صندلة

اللى عايز يفتحه يدوس عليه فوق

بس بجد ضحكتنا جدا جدا جدا و احنا كنا فى مود سىء جدا

شكرا ليه بجد

وبما ان محدش بيدخل البلوج عنده ف احنا قلنا نعمله دعاية

متتوصاش بينا فى الصور اوى عشان العرسان

كهرمانة بتقولك شسوفلها نسناس حلو

__________________

صفحة الهوم ورك

احنا بقالنا كتير اوى مكناش نزلنا تصويت على التوب بوست

ف هنعمل ان شاء الله تصويت على كل الشهور اللى فاتت على ايدك اليمين و انت داخل البلوج

تانى حاجة متنسوش تقوللنا رأيكوا فى البلوج اللى معمول علينا

تالت حاجة متنسوش تدعولنا بجد لاننا مزنوقين فى الامتحانات

رابع حاجة متنسوش تقولوا ل كهرمانة كل سنة وانتى طيبة

خامس حاجة و صوتولها فى التوب بوست عشان منجبلهاش هدية على التوب بوست يببئوا اتنين فى واحد :D

متنسوش تعملوا الست حاجات اللى فوق

الستة بتوع صيدلة

لم تكن فارس احلامى

لم تكن يوما فارس احلامى

ولم تمر لحظه بخيالى

لم تكن يوما طويل الساقين

قمحى الوجنه عريض المنكبين

وعيناك التى كلما بحثت عنها

اجدها تختبئ خلف تلك القطع الزجاجيه

وكانما تريد ان توارى لونها عنى

فهى ليست العسليه التى لطالما حلمت بها

ولكننى وجدت فيها ما يفوق هذا سحرا

فيكفينى سحر الحب الذى طغى على لون عينيك

وانساب على عضلات وجهك لترسم اجمل ابتسامه عندما ترانى

يكفينى دموع قلبك التى خالفت قانون الجاذبيه

وصعدت لتظهر على وجهك

عندما ترسم الاحزان لوحاتها فى عينى

يكفينى خوفك على من النسمات التى تداعب وجهى

ظنا ان وجنتى ارق من ان تداعبهما تلك النسمات

يكفينى نظره عينيك والغيره تكاد تقتلها

كلما مر هواء بجوار اذنى

ظنا انها تحمل كلمات لغيرك

وان لم تكن لى تلك الكلمات

يكفينى تركك تلك البيض من اللفائف

بمجرد معرفتك كرهى لها

حقا فانك لم تكن يوما فارس احلامى

ولكن فليكن فارس احلامى انت

........................................

دى حاجه كتبتها بعد فيلم رومانسى

انا متقمصتش دور البطله ولا حاجه

بس لقيت نفسى ماسكه ورقه وقلم وبكتب

وبصراحه يا جماعه بفكر اعملها قصه

هى الفكره فى دماغى

بس لسه مكتبتش حاجه غير الجزء ده

فلو قدرت اخلصها يبقى ان شاء الله اجزاءها هتنزل فى ميعاد البوست ده

اه .....هى مش هتبقى باسلوب قصصى قد ما هتكون خواطر متسلسله

وهحاول ان كل خاطره تكون مستقله بس احداثها مترابطه

اقولكم انا هوفر عليا وعليكم وكفايه عليكم اوووى دى:D

loza

احنا ادسترنا و الحمد لله

خالص الشكر و التقدير للأستاذ شاكر فودة على الكلام الجميل ده

الحمد لله تم نشر مقالة عننا فى جريدة الدستور الاسبوعية الاربع اللى فات

و هنحاول ان شاء الله نرفع المقالة و نوريهالكوا

واللى شافها طبعا يقولنا رايه

صفحة 12 جريدة الدستور صفحة المدونين و المدونات على ايدك اليمين

الستة بتوع صيدلة

دوامة اكل العيش و البلدية

بصراحة اول مرة اكتب البوست على البلوج على طول من غير ما اكون محضرة

فاستحملونى بقة

موضوع مدايقنى جدا جدا هى حاجة موجودة من زمان بس هاجت شوية فى الوقت الاخير

نسمع كلنا منزمان عن بتوع الانضباط

الراجل يبقى قاعد فى المحل لا بيه و لا عليه هب دب شوية عساكر قدامه كسر ياابنىاليافتة ده احسن طالعة لبرا شوية

مش بعيد كسرها برده عشان لونها مكنش عاجبه

خش على المحل اللى بعده ايه ده فىشوية مية مكبوبين على الرصيف النضيف طبعا ادفع غرامة !!! اد ايه ؟؟؟ الف كويس

ده اللى بنسمعه

و اخر ما سمعت و لكن من احد الثقات انهم نزلوا فى شارع عندنا من ازحم الشوارع بتاع البيع و نزلوا على الاكشاك اللى فيه ودهسوها و لما اتنين ستات اتكلموا و صوتوا و قعدوا يقولوا اكل عيشنا

كانت النتيجة ان نزلوا عليهم يالعصيان لما قالوا يا بس

حالة تانية

راجل فاتح عربية بيعمل عليها سندوتشات مش مجوز و بيصرف على ستة اخواته و مجوزش عشان مفيش اللى يجوزه قفل من بدرى و ساب العربية فى الشارع جم الله ...يسامحهم و هدوا العربية و لولا شوية ولاد حلال شالوا البرطمانات اللى بيعمل منها الاكل من العربية كانوا بقوا راخرين بقوا الارض

و سيبر كان فى نفس الشارع خدوا منه تلت كمبيوترات !!!! ليه ؟؟؟ كده

انا طبعا عارفة ان الناس ده بعضهم مبيدفعش ضرايب اذا مكنش كلهم لان العربيات بتاعتهم و الاكشاك ده بتبقى من غير تراخيص اساسا و بيشغلوا الطريق العام كمان

بس بيتهيألى انا عندى اقف فى زحمة الطريق المشغول احسن الف مرة من انى اقفل باب رزق على رب اسرة كل مشكلته فى ظل زمن الغلاء اللى احنا فيه انه مش بيعمل زى ناس كتير اوى و يسرق و ينهب انما كل ذنبه انه عايز يكسب بالحلال

هو انا لما اقفل لواحد من دول باب رزقه يعنى على طول لا سحر و لا شعوذة هتبط عليه ثروة من السماء يأكل بيها عياله و للا اخواته

لا اكيد يا اما هيفتح تانى نفس الكشك و يهدوه تانى و ندور فى نفس الحلقة

يا اما هيتجه اتجاه مباشر نحو الجريمة اللى هى هتكون اخر بابا يفتحه و يمكن لفترة طويلة جدا ميهاجمش و هو مجرم نفس الهجوم اللى اتهاجمه و هو بيسعى لاكل عيشه لانه ساعته ملوش سوابق فهيدارى عن العين شوية

و ابقى استفدت ايه لا دفعته ضرايب و لا سبته يعيش حلال

بس خلقت مجرم فى البلد

طب ما هو ممكن مثلا يعملوا شارع مخصص للاكشاك و عربات البيع ممنوع دخلوه من العربيات خالص و ساعتها مش هيكون فى شغل للطرق العام و لا حاجة و مجتش على ضرايب الناس الغلابة اللى محتاجين صدقات اصلا و فى ناس ناهبين البلد و اهو لسة معمول لستة كبيرة اتذاعت فى التليفزيون عن الممثلين المتهربين من الضرايب و اللى ضرابيهم لو شلتوا عشر ارقام من على الشمال هتمثل عشر اضعاف الدخل السنوى للناس الغلابة ده

مش عارفة الشرطة بقوا مالهم اثار فى نفسى كتابة هذا الموضوع الان رغم انه جوايا من فترة قضية عماد الكبير اللى اتذاعت على العاشرة مساء و اد ايه مأثرة فى الناس كلها

صعبان عليا فى كل اللى بيحصل ده نوعين من الناس :

الاول هو المواطن المطحون فى دوامة اكل العيش و يلاقى فجأة مرة واحدة عنتظية ظابط شرطة بتحطم حياته زى بعض بتوع البلدية المتعجرفين اللى فرحانين بنفسهم و راجل ليس له حيلة بيوطى على جزمتهم يبوسها عشان ميدمروش رزقه و رزق عياله و الظباط اللى بيتعاملوا مع كافة انواع المجرمين سواء كانوا يستاهلوا او ميستهلوش بأسوا اساليب الاستهزاء و التعذيب

على الرغم من انه كظابط شرطة و اول واحد بيحترم القضاء المفروض يسيب القانون هو اللى يحكم على اى مجرم و ان اضطر الى استخدام بعض انواع الشدة فانا اقول الشدة و ليس التعذيب

و النوع التانى : هم ظباط الشرطة الاشراف اللى ملهمش ذنب فى عجرفة بعض رجال البلدية و عنتظة بعض رجال البوليس اللى عندهم نقص فى تكوين شخصاياتهم او سوء فى تربيتهم

الظباط دول الناس بتكرههم بدون اى ذنب فقط لانهم يندرجون تحت طائلة رجال الشرطة اللى احنا سامعين عنهم كذا و كذا

انا حسيت فعلا انهم مظلومين لما سمعت الشرطى اللى اتصل فى برنامج العاشرة مساء اد ايه كان متوتر و صوته بيتقطع من كتر الانفعال و خوفه من نظرة المجتمع ليه ؟؟

لو عرف كل ظابط من الظباط اللى هقول عليهم الاشرار دول اد ايه بيأثروا على الناس الغلابة و يكونوا هم بنفسهم سبب لجريمة ممكن يمنعوها

و اد ايه هو بيأثر بالسلب على سمعة ظباط زمايله ملهمش اى ذنب فى فعلته

و يفكر فى اهم حاجة

اليمين اللى حلفه و اللى هيتحاسب عليه ادام ربنا

و حسابه يوم القيامة على كل فعل قام بيه فى حق عباد الرحمن بدون وجه حق فالرحمن الحق ان لم يخلص هذا منه فى الدنيا فحسابه عسير فى الاخرة

و فى النهاية لا ادرى حلا و لا اثير مشكلة و لكنى فقط اردت ان اثير ما بنفسى

و زى مافيه ظباط مبيحترموش عمله و بيستغلوه فى تسخير الناس لخدمتهم مع العلم بان ما اخذ بسيف الحياء فهو حرام

و هو ليس سيف حياء فقط بل هو سيف قهر و خوف,, فى ناس مبتحترمش الظباط و بتهنهم

يعنى احنا من الاخر بنلف فى حلقة مفرغة كل واحد مشارك فيها

الشرطى الشرير و المواطن البلطجى( على الشرطة و غيرها ) و المواطن السلبى اللى بيسيب حقه و الشرطى الشريف الساكت على بعض افعال زمايله و الشرطى المظلوم اللى ملوش دعوة بده و لا بده و المواطن اللى بيتفرج

.................

و يا دنيا ياما هتورينا و على رأى الست مارى منيب خليها فى القلب تجرح و لا تطلع برا ترمح

\و اخيرااااا خلصت بعد تطوييل

اتمنى انكم تفهموا قصدى و يكون الموضوع مرتب الى حد ما حتى

لانى كاتباه لكم من القلب على الهواء مباشرة

ملحوظة:الصورة تصوير لوزة

kahramana