مش عارفه احلم

"يييوه
ايش معنى انا مش بعرف احلم..او حتى لو بحلم عمرى ما بفتكر حاجة..ليه لازم استنى الساعات تعدى كل ساعه 60 دقيقه كل دقيقه 60 ثانيه عشان اشوف اللى نفسى فيه..عشان احس باللى نفسى فيه..عشان اعيش اللى نفسى فيه"..كل يوم تروح لسريرها بسرعه و تبقى بتفكر "النهاردة انا هحلم ..هحلم بيه..هحلم بينا..الليله دى هقابله..هاسمع كلامه اللى بيطلعه و هو مكسووف ..هاشوف عينيه رايحة جايه بين عينيا..هقابله فى الحلم بعد ما معرفتش اقابله النهاردة فى الحقيقه.." و تفضل تفكر كده..و تظبط حلم على مزاجها..و تفضل تزود احداث ليه لحد ما عينيها تروح فى النوم..و فجأه تفتح عينيها و تبص فى ساعة موبايلها اللى بتنام حضناه..و تلاقى ان الصبح جه..و كالعادة ماحلمتش..لا بيه و لا بأى حاجة اصلا..فتقوم و هى مش طايقه نفسها ,, و تقعد تفكر" طب ده ليه..يمكن عشان انا بفضل افكر فيه قبل مانام فماسبتش حاجة للعقل الباطن يحلم بيها..يمكن."
و يعدى اليوم و مافيش احتمال تقابله النهارده..لان فى الواقع كل دقيقه ليها نفس الطول..مافيش دقيقه هتقصر عن اختها..و لأن اصلا الدنيا مابتشغلش بالها احنا عاوزين ايه..مش قاعدة تحت ايدينا تنفذلنا طلباتنا ..و ييجى العصر و تقرر تنام العصر مع انها طول حياتها مابتنامش فى الوقت ده..فتروح لسريرها و هى مش كابس علهيا نوم حتى..بس يمكن تشوفه..و تقرر" انا المرة دى مش هفكر فيه خالص قبل مانام و اسيب عقلى الباطن يشتغل بأه"..و تغمض عينيها .. و برضو تقفش نفسها بتفكر فيه فتغمض عينيها اوى اوى و تقعد تقول اى كلام مالوش علاقه ببعض لمجرد انها ماتفكرش فيه..لحد ماتنام..و يعدى ساعة..ساعتين..وتصحى..برضه ماحلمتش بيه.."طول عمرى بحلم نادرا بس عمرى ماتضايقت من كده..عمرى ماتمنيت احلم للدرجة دى"..و تقوم من النوم برضه و هى حاسه ان كل اللى عملته انها ضيعت وقت و حرقت دمها..و تيجى الساعة سبعه و وراها تمانيه و فى ديلها تسعة و العاشرة ماشيه وراها بتتلكك و كمان نص ساعة وتقول هى" بس كفايه كده ملل.. انا هادخل انام دلوقتى"..ومامتها تستغرب يابنتى لسه بدرى..مش مهم..ماهو مش هيبقى ملل على الفاضى اهو اضيع كام ساعة..و تروح للسرير ماعندهاش حتى امل فى حاجة..و بعد ماتغمض عينها تفكر فى فوكيرة حلوة..و هى انها تفضل ماتفكرش غير فى اسمه وهى بتنام ..بس اسمه..يعنى لا فكرت فيه كتير ولا مافكرتش فيه..وتفضل تردد اسمه لحد ماتنام..و تصحى تانى يووم و هى مزقططة..المرة دى نفعت..وتفضل تفتكر الحلم مرة واتنين وتلاته بكل احداثه تفتكر لما حلمت بأنها فى الكليه.زو تفتكر انها قابلت اصحابها كلهم و تفتكر المحاضرة اللى حضروها و تفتكر الحر و الشمس ... بعدين تفتكر اهم حتة من الحلم تفتكر لما شافته ..شافته هو..شافته و هو رايح السكشن و ماشى بسرعة و يختفى فى ثوانى جوا المعمل..و هنا باه تفضل تعيد اللقطة دى من الحلم و تبتسم و بعدين تلاقى الابتسامة بتكبر و بتكبر لحد ماتبقى هتاكل وشها..وتفضل مبتسمة نفس الابتسامة الكبيرة دى حتى و هى بتسمع مامتها و هى بتقولها باستغراب "مالك؟انتى اتهبلتى على الصبح كده"..
.................................
قصه اوسانطوطه :)