مجلة ملهاش اسم اعداد وتنفيد واخراج وكتابة بربر

اهلا بيكو ف مجلة بريك الشهرية اليومية السنوية الاسبوعية الاجبارية على كل اللى دخلو البلوج




الصفحة الدينية

دعاء: اللهم انى اسألك من خير ما سألك منه نبيك محمد واعوذ بك من شر ما استعاذك منه نبيك محمد
رسالة:انى احبكم فى الله
عن رسول الله صلى الله عليه و سلم : " لو أن اثنين تحابا تحابا في الله و كان أحدهما في المشرق و الآخر في المغرب لجمع الله تعالى بينهما يوم القيامة و قال هذا الذي كنت تحبه فيّ"


..................................................................................
صفحة كاملة ل لوزة

بحبك والله العظيم بحبك

و متخليش حاجة تضايقك

الفكرة جاتلى من فيلم السلم والتعبان لما كان بيصالحها وعملها اعلان ف وسط الشارع بحبك تتجوزينى؟

بس طبعا انا مش هينفع اقولك تتجوزينى اصلى مش ناوية على ارتباط دلوقتى انتى عارفة ظروفى :D
هيا الصفحة خاصة ب لوزة طبعا بس هيا مش هتزعل لو قلت للعيال اصحابى انى بحبهم و كل واحدة بتمثلى جزء من حياتى
.....................................................................

صفحة التناحة
التليفون يرن



الو ازيك
الحمد لله

عاملة ايه
الحمد لله كويسة

و اخبارك ايه؟
تمام

تمام؟
تمام الحمد لله

وماما ازيها؟

الحمد لله كويسة

اخبارها ايه؟
تماام

طيب

وبعدين نرجع ف وسط الكلام تانى

المهم انتى عاملة ايه

جرررررررررررررررررررررررررررررررر

كل يوم على كدا اى حد يتصل سواء بيا او بماما وخاصة بماما ساعتين ازيك وعاملة ايه وتمام واخبارك ايه واخبار صحتك ايه

................................................................................................

صفحة اخبار اليوم
كايدة العزال انا من يومى ايوة ااه
فى واحدة ربنا يخليها ماشية تتكلم لعيا مع طوب الارض مش مخلية لا كبير ولا صغير
وطبعا انا ايدى بتاكلنى عشان احكى الموضوع بس منهم لله اللى خلونى اوعدهم محكيش
بس اهم حاجة ان فى بنى ادمة بتغير منى مع انى عمرررررررررررررررررررررى فحياتى ماتعاملت معاها فاى حاجة
"انما السبيل على الذين يظلمون الناس ويبغون فى الأرض بغير الحق اولئك لهم عذاب أليم "
وانا بشكرها على انها بتخلصلى ف ذنوبى الواحد كان محتاج الموضوع دا قبل رمضان

بالمناسبة:اللى غنت اغنية كايدة العزال انا من يومى هيا نفسها اللى غنت اغنية الطشت قالى
....................................................................................

صفحة التسالى
مش عارفة ليه لما بحب اتسلى بحب اعمل حاجة مبحبهاش

بمعنى انا مبحبش عمرو دياب مثلا
اقوم ارزل على نفسى واسمع شريط عمرو دياب وفى الاخر ابئا اتسليت ف حاجة عجبتنى
ازاى
شريط عمرو دياب الجديد
مع التمحيص والتفحيص فيه

1-اول اغنية كانت الليلة دى اللى هيا على اسمها الشريط

اول ما سمعتها افتكرت انى هسمع اغنية SWAY
هيا مختلفة شوية بس طبعا اول ما بتخش فى الاغنية بتدخل ف طريق تانى خالص

طريق عارفة احلى حاجة فيكى ايه

و اقصد هنا اسلوب كتابة الكلمات الكلمات

والله كل حاجة فيا بتناديك..ايوة كل حاجة فيا بتناديك
عارفةا حلى حاجة فيكى ايه..تعالىاقولك احلى حاجة فيكى ايه

و هكذا

2-قالتلى قول
اغنية فكرتها غريبة جدا واحدة عارفة انه كان يعرف واحدة قبلها وبتقوله اذا كان حبها ولا لأ؟ ولما قالها انه حبها اتصدمت يا حبة عينى!! و ف نفس الوقت كانت عارفة انه ليه ماضى و رغم كدا كانت فاكرة انها اول حب
فكرة غريبة جدا ومش مقنعة
3-ضحكت

الغريب ان الاغنية دى بردو زى اللى قبلها اللى كتبها بهاء الدين محمد
يعنى الاغنيتين اللى فيهم افكار الاتنين افكارهم اوحش من بعض لنفس الشاعر
اغنيتين اغرب من بعض
ضحكت يعنى قلبها مال و خلاص الفرق ما بينا اتشال يلا يا قلبى قولها كل اللى بيتقال
ضحكت يعنى حسة هواك وموافقة تعيش العمر معاك
هوا ايه اللى بيتقال بئا لما واحدة بتضحك مش عارفة؟
الشريط دا فادنى جدا الصراحة
انى مضحكش لاى حد اعرفه لانى كدا مايلاله وموافقة اعيش عمرى معاه
و ربنا يشفى
على كدا كله يحاسب على ضحكته بئا ل يتفهم غلط
و كمان بيقول اهى ضحكت تانى
دى طالعت دايبة فيه


5-طول مانا شايفك
اغنية حتى كسلت ادور اشوف متشابهة مع ايه

لا كلمات ولا توزيع ولا اى حاجة فاى حاجة

6- خليك معايا
قلت يااه اخيرا لقيت اغنية عدلة فى الشريط
لحنها حلو اوى كلماتها حلوة اوى جميلة على بعضها
بس الفرحة مكملتش

فى اغنية اجنبى السمها SHAPE OF MY HEART
انا مسمعتش الاغنية بنفسى بس كذا حد قالى عليها انه نفس اللحن
7-روحى مرتحالك
لحن جميل جدا جدا وغريب على عمرو دياب !
8-انت الغالى
توزيع جميل جدا
دول الاغانى اللى لفتت نظرى عشان اعلق عليهم
ولا عزاء للناس اللى بتحب عمرو دياب
...................................................................




صفحة حال الدنيا

لقيت كلمات اغنية دواير من احلى كلمات الاغانى اللى شفتها ف حياتى

اسيبكو مع مقاطع من الاغنية

ساكنيين فى عالم يعشق الخطر فيه الطيور تهرب من الشجرو تهرب النجوم من القمر و تهرب الوجوه من الصور بنلف فى دواير ندور على الأمان و نلاقينا رجعنا لنفس المكان نحلم و نحلم بالحياه المفرحة و اتارى احلامنا بلا اجنحة ندور نور ندور بجناح حزين مكسور سعات نشوف فى العتمة و سعات نتوه فى النور و سعات عيونا بالأساة تفرح و سعات فى ساعة الفرح منوحة

كلمات :الأبنودى
BREAK