انا مين ؟ انا فين ؟ انا ازاى ؟



قمة مراحل التوهان انكتبقى مش عارف انت مين

او بمعنى اصح انت ايه ؟

تقابل الطيب فلازم تبقى طيب و حنين و تقابل الخبيث فلازم تبقى اخبث منه و تقابل الصادق فلازم تبقى صادق و تقابل الكداب فلازم تحرس


يمكن ده كان تصورى عن الاسلوب الملائم للتعامل مع الجميع ان الواحد لازم يشكل نفسه و يغير من اسلوبه للتكيف مع جميع الاوضاع

و لكن ده فى النهاية خلانى انا فى اغلب الاحوال مش عارفة انا انهى شخصية فى دول


و لما فكرت فى فترة من الفترات انى اتعامل مع كل الناس باسلوبى انا بس و اللى عاجبه عاجبه و اللى مش عاجبه هو حر لقيت ان ده عمل مشاكل كتير و فى نفس الوقت خلانى اتخدع فى ناس كتير


عمل مشاكل لان المواقف اللى بكون قاسية اوى فيها بابقى كده مهما كانت الشخصية اللى قدامى تستحمل او لا

و خدعنى لانى كنت بافترض حسن النية فى حاجات كتير اوى ثم تتوالى المفاجأت و ضربتين على الراس توجع فما بالكم بعدة مطارق


مش عارفة ابقى ؟

او اكون مين؟


اكون انا اللى انا بحبها يمين يبقى يمين مع كل الناس و شمال يبقى شمال مع كل الناس

و للا اتشكل على شاكلة اللى قدامى ما دام مفيهاش تعارض مع مبادئى حتى لو كان ده هيلخبطنى فى نفسى لان لو الشخصيات اللى قدامى مختلفة يبقى كل يوم هتألقلم مع حد مختلف و لو الشخصيات متناقضة يبقى لازم اكون طيبة و خبيثة و ذكية و فى نفس الوقت اعرف اتعامل مع اى مستوى عقلى اخر اعلى او اقل و قاسية و حنونة و .................................


و فى النهاية عند تقييم نفسى اجدنى اصبحت قطعة من شخصية الجميع و لا استطيع ان اجيب على السؤال الذى قد يجيب عليه طفل صغير


من انا ؟؟؟


يعنى مثلا لما اتعامل بريك لازم اراعى كلامى اوى لانها حساسة و رقيقة جدا

و لنا اتعامل مع لوزا لازم ابقة مركزة جدااا و واخدة بالى من كل كلمة تقولها لانها بتنسى كتييييييييير و ده بيعصبنى

و سنفورة لازم ابقى قاسية و مسيطرة الى حد ما لانها شقية جدا بتخيلنىىىىى

و سخسوختى لازم اتماااالك اعصابى لانها عصبية و حط النار جنب البنزين و شوف اللى هيحصل بس يمكن تكون اكتر واحدة باعرف مدخلها و اتفاهم معاها لانها واااضحة

و نورا بحب اناغشها جدا و احيانا باكون عندية معاها رغم انها كتير بتاخدنى على اد عقلى
ادينى كده بقيت خمسة فى واحد و لما كل واحد من الخمسة دول ييجى يقول رأيه بقة تلاقى اللى يقول عصبية و ساعتها معرفش ارد او بتقفلى على الكلمة معرفش برده او بقيتى هادية و مبتزعئيش حتىفى المواقف اللى تستاهل (تطنشى يعنى )


يووووووووه

انا مين فى دول


انا كهرمانة بس مش عارفة اوصلى(على وزن انا باكينام و نا ماسكة فى نفسى )


تفتكروا الحل انى ابقى انا مهما كانت النتااائج ؟؟؟؟؟؟؟؟


فى حين ان ده هيتطلب منى مجهود بعد عصر التشكلااات لكى اصل الى (من انا ؟؟)


-----------------------------------------------------------------------------------------


عذرا لغيااااااااابى الطويل الفترة السابقة لان الكمبيوتر بتاعنا كان يتقال عليه يارحمن يارحيم لان اخويا الصغير كان اداله بالبوكس لما دخل فيه جون و بعد ما اتصلح الروترجالتله انفلونزا شديييييدة خلته سخن مولللللع و لسة جايبين واحد


و لكن نعدكم بالتواصل بدون فواصل
كهرمانة

هناك ٣٦ تعليقًا:

Mero.. يقول...

هههههههههههههههه
الاول الف سلامة على جهازكم وروتركم عشان متتاخروش علينا تاني
بيتهيالي الواحد ممكن يحافظ على شخصية واحدة مهما كان ردة فعل الناس ملوش دعوة بيهم بس بصراحة بالطريقة دي اخره يبقى جندي ينفع مكان ما يتحط
لكن اللي عايز يبقى قائد وحاجة مهمة لازم يكون له سياسة وكذا تعامل وكذا وش مش قصدي يبقى منافق ..بس لازم يبقى سياسي كدا ويمشي الامور على كل ناحية شوية حسب الحالة..
ويحاول بقى مع نفسه يقوي شخصيته ويغذيها بالقراية او هواياته المنفردة..:)
بوست جميل:)

keda-sponsor يقول...

ده مش تغير في شخصيه ... يعني أنت لو سألت حد من أصحابك أنا شخصيتي إيه ... هيوصفولك كلهم وصف واحد .... لاحظي أن انت صنفتي كل واحده من صحباتك حسب شخصيتهم ... بشخصيه واحده بس

هو الموضوع كله أن الواحد لازم يعمل حاجه علشان يتواصل مع غللي قدامه

و دي حاجه في كل الناس ... ولو كل واحد أتعامل مع أصحابه او مع الناس عموما بطريقه اخبطوا دماغكم في الحيطه ... أنا كده ... خلقتي كده ... شكلي كده ... بتاعه عبد السلام النابلسي ... هينزل من بيتهم يقعد يتخانق لحد ما يروح

أو الناس هتهرب منه ... لأنه رخم

ألف سلامه على الجهاز و الراوتر

ووحشتينا

Eman Henaish يقول...

ايه الفلسفة دي كلها
:)
علي فكرةما اعتقدش أن في حد عنده القدرة يقول هو مين
ممكن حد اتعامل معاكي بجد في كل المواقف العصيبة قبل البسيطة .. يقولك أنتي مين
أما بالنسبة لتعاملك مع الناس فاحتفظي بشخصيتك واتعاملي علي طبيعتك .. بس حاولي تسلحي نفسك بالحرص دائمااااااا
مش مع اللئيم بس لأن ممكن الغدر يجي من ناس ما كنتيش تتوقعي منهم كدة
وعلشان زي ما بتؤلي ما تخديش (مطارق) :)
ولو حد بتثقي فيه قالك علي عيب في شخصيتك وأنتي مقتنعة بكدة حاولي تقوميه بهدوء مع الاحتفاظ برده بشخصيتك

اتمني أكون أفدتك بحاجة من الرغي الكتييييييييير ده
D:

kahramana يقول...

keda_sponser

عجبنى ردك جدااا على فكرة

شكرا على رأيك اللى ريحنى الى حد ماان اكبر مشكلة فى الموضوع ده الشعور باختلاف الشخصية لكن فعلا هو مطلوب للتواصل مع الناس

نورت البوست

kahramana يقول...

eman
يا ريت كل الرغى زى رغيك يا ايمى

شكرا يا أمر على ردك
و اكيد كل كلمة بتقوليها و اى حد بيرد باستفيد منها و احطها فى دماغى

منووووووووووووورة

kahramana يقول...

mero

الله يسلمك منجيلكش فى بوست وحش

مرسى اوى على نصيحتك الغالية

و ان شاء الله مفيش تأخير تانى

دكتور بهــدوء يقول...

بصي يا اختي
انك تبقي بشخصيه واحده مع كل الناس مش هينفع بجد ولا انتي هتستحملي ولاهما هيحترموا ده
انتي تعاملي كل واحد باللي يستاهله
الجدع تبقي جدعه معاه وتوجبي معاه اخر حاجه
والندل مانستندلش معاه لكن نحط حوالينه دايره ونبقي فاهمينه والله استندل خلاص ولا نزعل نفسينا
وبعدين اولا واخيرا
حطي نفسك قدامك دي انتي ومصلحتك فوق كل اعتبار اتعاملي بما يرضي ربنا وتبقي راضيه وف نفس الوقت ضميرك يبقي مرتاح م غير ماتيجي ع نفسك

kahramana يقول...

دكتور بهدوء

استيراتيجة حلوة اوى

و هو ده فعلا اللى انا مقتنعة بيه ان الواحد يتشكل على حسب اللى قدامه عشام يعرف يتعامل مع الجميع

انما خوفى بقة انى بانسى نفسى احيانا و مش باعرف انا فين

و لكن ان شاء الله هاحاول اطور نفسى

شكرا على ردك و مرورك الكريم

ghoneem يقول...

اهلاً بيكي

كل سنة وانت طيبة والأجازة كدة تفضل شويتين مش تعدي بسرعة

سعيد اني قريت بوست لكهرمانة قبل ما أموت.....
حلو أوي ان الواحد يدور علي نفسه
ويغيب ويراجع نفسه ومعاملته مع الناس ويشوف هوة ماشي كويس ولا مش كويس

انا عن نفسي بحب أتعامل مع الناس بشوية خبث ومكر ودهاء
أمي بتقول علية " سهن "
انا بحب اللقب ده وبحس انه وسام من أمي لابنها حبيبهااللي هوة انا
اما التعامل مع الناس بطيبة أوي بيبقي مش كويس أوي
يعني اعمليها زي تركيبة كدة فيها طيبة وخبث وانك دايماً تبقي صاحبة الخطوة التانية مش الأولي

فرحان أوي اني لقيت البوست لكهرمانة ..واني فضفضت شوية وافتكرت اني سهن
حمدا لله علي سلامة الجهاز وسعيد أوي بتعليقك ...بس احنامش بتوع الكلام المايع ده"الحب " ..احنا بنكتبه مش بنتعاطاه

تحياتي

بالتوفيق.......

•·.·´¯`·.·•¥Ä$$ìeÑ•·.·´¯`·.·• يقول...

ente ele beteweheme nafsek be keda........enta wala betet3'ayare wala betet7awele wala aya 7aga 2asasan
2ente el mafrod betna2e el nas ele yehemoke zay so7abek el 2orayeben masalan w tet2aklame ma3ahom w yet2akalmo ma3ake....w keda 2enta mesh bet3'ayare fe nafsek wala betmasele wala ay 7aga ...de 7aga esmaha lo3'et el tawasol or how to (communicate)

et5ayele law kol wa7ed fakar zayek keda w 2al ana 3ayez 2ab2a ana w mesh hata2akalam ma3a 7ad...lol !! yeb2a hayo3od tooooool 7ayato 3ashan yedawar 3ala 7ad yetbeset ma3ah men 3'er ma ye3'ayar 7aga fe nafso

w 2asasan el post da faksan men el 2awel !! =D
am joking .. bas ana 2asde en mafish 7ad 3omro ye3raf yes2al nafso "ana men" w te3raf yegaweb..mahma 3amalte mesh hatgawbe

5ode 7abayten seka belnafs w lama te3tase .. Delete el post dah =D

Y455IEN

Mohamed Elshal (shix) يقول...

بوست ميل اوى لان بيوصف حال ناس كتير
اعتقد ان فى حياتنا حنتعامل مع ناس كتير مش شرط صحابنا او الناس اللى نعرفهم بس
علشان كده انا رايى
ان الانسان يكون لنفسه شخصيه مستقله بيه بالمابادىء والاسلوب اللى يريحه
بس فى نفس الوقت ميبقاش متجمد او غير قابل للتغير
لان كونك تغيرى شخصيتك فى حدود علشان تتكيفى مع الناس اللى بتحبيهم ده مطلوب وده اللى لازم يحصل علشان تحافظى على اللى بتحبيهم حواليكى
وكتخديش ده تحت مبدا انا بلا شخصيه لا
دا انتى كده اذكى شخصيه انك تعرفى تتعاملى مع الناس كلها بمذاجك انتى
وده اللى انا ماشى بيه فى حياتى
وزى ما قولت قبل كده بوست جميل اوى

اللهو الخفى يقول...

كهرمانه انتي بنت و لازم تبقي بنوته بس ده ما يحرمكيش من انك تكوني علي طبيعتك وفي نفس الوقت لازم يبقى ليكي اسلوب دفاع عن النفس يعني في نوع من الفراش اسلوب دفاعه الوحيد عن نفسه انه يغير لونه علي حسب مكان وقوفه و النحل بالرغم من فيدتها تعتبر غبيه في دفعها عن نفسها فممكن تقتل نفسها عشان تدافع عن نفسها تختري نحله و لا تختاري فراشه
اعتقد فراشه لانها بتتكيف مع اللي حولها التكيف مش تناقض مع الذات و لا نفاق بس زي الفراش مالكيش دعوه بحد ما بتاذيش حتى عشان مصلحتك ما بتاذيش وكنت تبقي بنوته وصح مش منافقه معلومه الصراحه شيء حلو جدا انما ممكن لولد زي حلاتي لانه في الاخر ولد و لو وقع في ذله يعرف يتعامل بس انتي بنت و سهل تتجرحي بذلة لسان خليكي صريح بس في حدود مش عارف ايه الوصايا العشر دول و لا ايه
بصي العصبيه شيء وحش في البنتبس احيانا بيحمي وكتير بيضر
وعموما انا كنت جي اعزمكم علي النيو لو افتكاسه انما شقلباظ تعلوا زورنا في المدونه الصديقه و المجاوره و قولوا رائيكم بصراحه

اللهو الخفى يقول...

كهرمانه اسم جميل لحجر كريم
انا قلت فراشه و بتغير لونه بس هتغير لونها و هتفضل فراشه مش هتبقى نحله او دبور
يعني انت هتتغيري حسب الحو بس ما يتناسب معاكي انتي ككهرامانه يعني ما يتناسب مع ضمير كهرمانه و ذاتها و عقلهاو ما يبقاش كاتم قلبها نعدله صعبه تنفذها سهل جدااااااااا
و ما تركزيش في افعالك كده عشان انا كده ومش هكون غير كده و الدنيا هتتعاش بس المهم تراعي ربنا وبجد انا حابب المجموعه بتعة السته بتوع صيدله عشان مجموعه محترمه و بجد بحترم افرادها جدا
دمتم و عشتم
ههههههه

اللهو الخفى يقول...

انا عارف اني غلس بس ديه خصائص الحجر الكريم اللي اسمك مشتق منه
الكهرمان الأسمر الذهبي والأصفر يعالج المفاصل ومشاكل المفاصل والروماتيزم ووجاع الظهر ويساهم فى رفع المعنويات وازالة الخوف وانعدام الثقة فى النفس

kahramana يقول...

ghoneem

و انت طيب و ان شاء الله عندنا اجازة طويلة

و طبعا انا نزلت البوست ده عشان محرمكش من حاجة(ليه الاحراج ده بس )

و ان شاء الله مش هاغيب عنكم تانى ما الكمبيوتر فك الجبس الحمد لله و الدكتور سمحله بالحركة فى البلوج


اما بالنسبة لسهن فعجبتنى اوى الكلمة
و اسلوبك فى التعامل مع الناس حلو اوى يا سهن :) وكويس ان البوست فكرك بيه - حتى لا تنسى -:)

شكرا على ردك و نورت البوست

و بالنسبة لموضوع الحب و التعاطى

يا خوفى ... ما هى البداية بتبقى كتابة و بكرة تبقى مدمن محترف

kahramana يقول...

yassien

ههههههههه حبايتين ثقة مرة واحدة
و الله يا ياسين الموضوع مش موضوع ثقة بالنفس

المشكلة ان الواحد مهما تعب و غير من نفسه او ثبت على ما هو عليه لابيريح نفسه و لابيريح الناس


و لكنه فعلا مضطر عشان يعرف يتواصل مع غيره

شكرا على ردك يا ياسين اللى بستناه

kahramana يقول...

shix

مبدأ جميل و مريح و تحليل حلو اوى للتعامل مع الناس

ما شاء الله

شكرا على ردك و نورت البوست

kahramana يقول...

اللهو الخفى

اولا بالنسبة لردك على البوست
فردك حلو و عجبنى اوى المثل اللى ضربته واضح انك عندك سهولة فى التواصل ما شاء الله

اما بالنسبة للنصائح العشر فهى حلوة اوى و فى الصميم الف شكر

دمت و عشت منور البلوج

و عن اسمى بقة فبجد مش عارفة اشكرك ازاى لانى مكنتش اعرف اى معنى من المعانى ده خالص
ده الواحد طلع الطلب عليه كتير اهه

انا اخر اللى كنت اعرفه عن الاسم ده انه اسم العفريتة اللى كانت فىفيلم يا انا يا خالتى :)

شكرا على مرورك الكريم

bota يقول...

السلام عليكم

انتي بوصفك ده يبقى انا عرفت انتي مين يا كهرمانه انتي انا بس انا مين بقى انا برضه مش عارفه زيك

بالظبط البوست وانا بقراه حسيت انك بتكلمي عليا وجيه في وقته

لاني فعلا باجب في وقت واحس اني متدمره لاني براعي مشاعر كل الناس بس مش حساني براعي نفسي معاهم

ربنا يوفقك

kahramana يقول...

bota

الحمد لله انى مش لوحدى

لو قريتى ردود الناس على البوست على فكرة هتريحك الى حد كبير

سعدت بردك

نورتى البوست

ربنا يوفقك و يكرمك

Zika يقول...

بصي انا هحجز التعليق العشرين وهنام وهاجي بكره اقرا واعلق كمان
لا مؤاخذه يعني
:D

kahramana يقول...

zika

و انا هاحجزلك الرد على بال ما تعلق

waitting

Ma7moud So3ody يقول...

وحشتني مدونتكم اوي
كان عندي ظروف منعتني اني اتجول بين المدونات

وكمان باعمل حاجه هتكون مفاجأه لكل الناس وادعولي

وتعليقا على الموضوع
شوفي يا ست كهرمانه

المطلوب مننا نعرف احنا مين الاول
ومش مطلوب أبدا اننا نتلون ونتشكل
لازم يكون لينا مبدأ ماشيين عليه
ولا نتخلى عنه ابدا
والمبدأ ده في اوبشنز للتعامل مع كل البشر من غير مانلون

فكري ف الكلمه دي كده
انك يكون ليكي نسخه من كل البشر ودي بتيجي من التعامل مع الناس
مره ننخدع ومره نثق ومره تعدي

زي المناعه كده
فيروس يأثر وفيروس يتكسح وفيروس يقعد شويه من غير تأثير
لكن الفيروس ميمرضش مرتين

موضوع في العمق
واحلى تحيه ليكم
ربنا يوفقك يارب

بيتنا القديم يقول...

قال الامام علي رضي الله عنه:

لا تكن ليناً فتؤكل

ولا صلباً فتكسر

(:

dramaqueen يقول...

كهرمانة حبيبتى
كونى انتى
انتى كهرمانة اللى بتحب اصحابها وبتعمل اللى يريحهم وبتستحمل غضبهم وتفرح وتحزن معاهم

كونى على طبيعتك وهتلاقى ان كدة احلى

مرة واحد بس واحد كبير اوى عندة يجى 42 سنة ودماغة كبيرة اوى
قاللى اوعى تتغيرى عشان حد

ربنا يوفقك يا قمر

funckydoctor يقول...

ههههههههه
فيه أغنية بتاعت واحد مطرب شعبى بتقول أنا مش عارفنى لا دى ملامحى ولا شكلى شكلى :D
هو للأسف الشديد علشات الناس كلها تنبسط منك لازم تبقى ب مية وش على الأقل ان ما كانش 200 أو أكتر
حمد الله على سلامة الجهاز والروتر
تحياتى

shams is here يقول...

السلام عليكم

اولا بجد ده من اجمد البوستات على البلوج بتاعكم..بس رائى الشخصى محتاج صياغه وتسلسل بدقه شويه..لكن على الفكره والحوار ده بجد رااائع...

تقابل الطيب فلازم تبقى طيب و حنين و تقابل الخبيث فلازم تبقى اخبث منه

رائى ان الشخص المحترم بيفرض احترامه واخلاقه على اى حد...

اها انا shams is here

Dr.m يقول...

السلام عليكم
زياره أولى للمدونه ولن تكون الأخيره بإذن الله..
بالنسبه للشخصيات فمن الأفضل أن نعامل الجميع بالشخصيه الإسلاميه وما تدعو إليه دون النظر إلى رأي الناس طالما أنا متأكد أن هذه من أخلاق الدين لأن الدين مش حلال وحرام بس ده كمان فيه أخلاق يعني صح وغلط ..أما حكايه التلون بلون اللي قدامك فده هيتعبه أكتر ما يتعبني..
بوست رائع تحياتي
سلام

Zika يقول...

لإكرتين بخاطرتين كده كنت كاتبهم من فتره وانا بسال نفسي نفس السؤال

انا مين في دول
انا مين في دول
انا انهي وش
لونت نفسي الوان كتير
علي ناس كتير ما تستاهلش
وليه بخاف
اقول ده غش
انا مين في دول
انا انهي وش


احكيلي حاجه من السنين
احكيلي حاجه من السنين
لو بس فكره
ما تقولش حاجه عن اللي فات
غير بعد بكره
ازاي اعيش ولو يومين
من غير ما افكر ابقي مين
من غير ولا اعرف ابقي ايه
ولا جيت منين ولا روحت فين

kahramana يقول...

ma7moud so3ody

عودة مباركة

و كلام فى الصميم برده
حلوة اوى حكاية الفيروسات ده

شكرا على الرد
نورت البوست

kahramana يقول...

بيتنا القديم

رضى الله عنه و ارضاه

و جمعك و اياه و ايانا فى الفردوس الاعلى

خير الكلام ما قل و دل

افادكم الله

kahramana يقول...

dramaqueen

ربنا يكرمك يا قمر

مرسى على نصيحتك الغالية

نورت البوست

kahramana يقول...

funcky doctor

100 .... 200 ... و من يزود

واضح ان المطرب الشعبى ده مثقف جدااا
و عنده دراية باللى حواليه

و بالنسبة للجهاز و الروتر فالله يسلمك منجيلكش فى تهنيجة جهاز

kahramana يقول...

shams is here

nawart here 9 there

مرسى اوى على ردك و رأيك اللى يفرض احترامه على الجميع

kahramana يقول...

dr.m

اولا نورت البلوج و ان شاء الله هتفضل منوره على طول

جميل ردك لانك بتتكلم من الناحية الاسلامية

ربنا يكرمك

و يا رب يكون البلوج عجبك

kahramana يقول...

zika

ليك حق تتقل علينا بالرد

ما دام الرد هيبقى حاجة حلوة اوى كده

جميلة اوى الكمات و معبرة حسيت انك بتقول نفس اللى كنت بقوله مع فارق طبعاااااا الاسلوب - وش مكسوف -

نورت البوست و مكانك محجوز على طول