اركب رابع جمب اخوك فى الى بعده

صحيح الجار ..قبل الدار
والزبون الى جمبك.. قبل ما تركب


بس زى ما الواحد فينا مبيخترش امه ولا ابوه
بردو مبيخترش الى يقعد جمبه فى الموصلات
واول ما الواحد يركب ميكروباص يقعد يدعى ربنا يبعت له بنوته محترمه
اوبرزيدون...بردو محترم
ميطلعش فى الاخر نازل تجنيد ولا جمله
وعدينى يا انسه وناولينى الشنطه الجمبك..
ويشحططنا معاه

وكل واحد ودعاوى ماماته بقى
والى يركب ياما يشوف

مره كنت راجعه انا واختى من المنصوره والمفروض بعد ما نروح
نرجع تانى طنطا عشان نخلص شويه ورق لازم يخلص يومها
لفينا شويه فى المصالح الحكوميه واتغدينا وروحنا الكليه وجبت الجدول
كان نفسى اعمل شوبينج بس ملحقتش
اوووف الوقت بيعدى هووى...
تيجى واحده تسالنى وده كله فى يوم واحد
وارد عليها : ايووووون
المهم واحنا راجعين ارض الوطن
ركب واحد جمب اختى عادى يعنى


وفجاااااااه يقطع السكوت الى احنا فيه
صوت ايد بتضرب على الكنبه الى قدامنا
وصوت اعلى " هااااا اخبار الضرب ايه ..!؟"
"تحب نعشيك بخشيه ولا بالحديد..!؟"
وطبعا مش محتاجه كونان عشان يقولنا ان الى بيتكلم ده الراجل الى جمب اختى

ويسكت شويه ..
ويطلع فجاه..
" ما قولنا لك خليك جمب الحيط"

"ولا انت غاوى بهدله ..!؟"

كل ده وانا واختى فى تعداد الموتى
موقفين ضربات قلبنا تقريبا...ليفهمنا غلط
ويكرر كلامه مع ضرباته الايقاعيه على الكنبه

ولما وصلنا بعد وصله رعب
مرضيش ينزل ولا رضى يعدينا
واتسربنا زى الحراميه وكل الى على لسانا"الحمد لله"
والسؤال هنا تفتكروا ايه حكايه الراجل ده ..!؟

وفى ختام الحلقه عزيزى القارئ
ننتظر منك الاجابه على سؤال البوست
وارسال الاجابه الصحيه


على بلوج السته بتوع صيدله

LOZA

على قيد الوفاة

علمونى أفضل أسكت

لحد ما صوتى يتنبح

قالولى امشى بدون ملامح

سيبى قلبك ينسرق

مش عايزة اكون زى الورق

ولا عايزة قلبى ينحرق

شالوا أى صفحة بيضا

كشكول ورق حتى النتيجة

علشان أشوف حياتى سودا

و العمر منى ينسرق

سرقوا منى قيد ميلادى

عايزنى أكره الحياة

أنا فى انتظار طوق نجاتى

ولو على قيد الوفاة

break

حملة حماية

بجد بجد محدش فينا كان متوقع ان النجاح يحصل بالسرعة دى

على الاقل قلنا لما تبتدى مرحلة الEVENTS

انما فعلا فعلا فى 5 مدمنين من تانى يوم قدموا فى الجمعية "صناع الحياة المنوفية " عايزين يتعالجوا

وواحد مستعد انه يدلنا على مدمنييييين كتييييييييييييير لانه بردوا كان مدمن و تاب

بالغيظ فى صناع حياة الغربية :D

ان شاء الله الحملة تجيب نتيجة أكتر من المتوقع

تحديث: اللى تعب فى الحملة مش احنا.....لأننا منزلناش فى شبين خالص..و اللى اتقدموا دول من الاعلانات اللى فى شبين

بس نجاح الجمعية او الحملة نجاح لينا أكيد

و بالغيظ فى صناع حياة الغربية..دى تهريج من باب التنافس مش أكتر

:)

العمود ده بتاعى

المخدرات
الناس بخصوص المخدرات بتنقسم لنصين ..يعنى فيه اللى بيشرب..و فيه اللى مابيشربش..او المفروض يكون فيه ناس بتشرب مخدرات..و ناس بتحاول تمنعهم او تحميههم..ايه علاقه ده بالعامود.و عامود ايه و بتاع مين..ييجى بأهالاستفزاز..

لما نفضل نلف على مكاتب عميد و امين و قائد حرس كل كليه عشان بس ناخد موافقه ان احنا ننشر اعلان او نلزق بوستر مكتوب فيه لا للمخدرات .. او احمى حياتك.. و رقم يتصل بيه اللى محتاج مساعده .. و بعد ما نلف 3 ساعات و نبتدى نلزق الاعلانات دى..نلاقى دكتور صيدلى..المفروض انه ناضج فكريا...بيشيل الاعلان من على عامود معين و يقول "لو سمحتوا..العامود ده بتاعى..ماتلزقوش حاجة عليه"..ايوه انتوا ماقريتوش غلط.. العامود بتاعى..ده فعلا كلام واحد عنده على اقل تقدير 19 سنه .. و لما نسأله"بتاعك!!!!!"يشاور على العامود و يورينا انه كاتب اسمه هو و اربعه زملا و كاتبين تحتها لينك البلوج بتاعهم و ملونين و حركات..و يقولى" لو سمحتى ماتوسخيش العامود بتاعى"...ماوسخهوش!!دى انهو عقليه دى..عقليه ايه اللى ترفض انى احط اعلان فيه رقم ساخن لمساعده ناس محتاجة لمجرد انه كاتب اسمه على العامود..و الاجمل اننا اصلا مارضيناش نلزق الاعلان على اسمه لانه زميل صيدلى و زميل مدون..بس احنا قلنهاله و هنقولها تانى..اسمك اللى على الحيط ده مايفرقش فى نظرنا عن شخبطة على الارض من ناحيه النضافه لو انت خايف على نضافه "عمودك"...و بجد كنت مستنيه على الاقل ان الصيادله يطلعوا من النص التانى من الناس..دكتور محمد احب اقول لحضرتك انت و فارما ستريت بويز ان لما حطينا صورة لحد فيكم و هو بيعمل سلوك غريب فى المدرج و شلنا الوشوش بتاعتكم و ده ضايقكم اعتذرنا بكل ادب لان انتوا بررتم بانه كان عذر طبى...و لما خدنا بالنا من شخبطتكم على الحيطة و ان مالهاش عذر اصلا..مارضيناش نتكلم عنها سواء هنا او فى اى حته عشان ماكانش نفسنا نخسر زمايل و عشان كتير بيشخبطوا على الحيطة..بس واضح من اسلوب كلام حضرتك يا دكتور محمد ان لفظ زمايل ده لم يعد يعنى شىء...و ملحوظة انا حاولت قدر الامكان اتعامل معاك بكل ادب و مارضيتش اتمادى معاك فى الكلام..و اتبعنا اسلوب رسمى و طلعنا لحرس الجامعة .. و صدقنى العامود ده بالذات لو اتشال من عليه اعلانات الحمله اسم حضرتك اللى موجود مع قائد الحرس هو اللى هيظهر فى الصورة..فاذا كنت مش محترم انك صيدلى..و اذا كنت مش محترم نضافه الكليه..واذا كنت مش محترم سنك..و مش محترم لفظ"زمايلك"..و مش محترم لا عميد الكليه و لا حتى الطلبه..فعلى الاقل احترم ان ده عمل هيحاسبك عليه ربنا.....بجد احنا كنا مستنين انكم تساعدوا فى الحمله..او على الاقل انكوا تراعوا سابق معرفه كانت ما بينا..فارما ستريت بويز..شكرا بجد

العدد التامن من مجلة الستة بتوع صيدلة

الصفحة الدينيه

00000000

"و ان منكم الا واردها كان على ربك حتما مقضيا" مريم-71

الايه هنا عايده على "جهنم"

الايه دى اختلف فى تفسيرها الشيوخ و الفقهاء..منهم اللى قال ان المقصود من الايه ان كل البشر_ ماعدا الرسل و من رحمه الله_ هيدخلوا النار الاول يكفروا عن ذنوبهم و بعد كده ربنا ينقلهم برحمته الجنة.. و منهم اللى قال ان المقصود هو ان البشر يوم القيامة هيمشواعلى الصراط المستقيم تحتهم النار و فى اخر الصراط الجنة .. منهم اللى هيقع من على الصراط و منهم اللى هيوصل الجنه بنور من ربنا..و فى التفسيرين الايه دى كل ما بقراها بقف عندها كتيير



....................................................................................................................................

صفحة الاهداءات

000000000

الاهداء الشهر ده جيه متأخر حبه للمدونين احمد المصري و حاتم ..بنباركلهم على البلوج الجديد لكل واحد فيهم

كاريزما لاحمد المصرى وفيه ابداعات احمد فى كل حاجة خصوصا فى الادب.. بجد الواحد كل مايقرا له حاجة يشتم نفسه عشان بيفكر يمسك قلم حتى :)



اما عنcoverall للبشمهندس حاتم..فده حتى الان كان عن مواقف كوميديه بتقابله فى الشغل ..و بجد بتموتنا من الضحك يا حاتم



نيجى بأه للاستاذ سمسم "بيتنا القديم" اللى نزل بوست صعب جدا و انقطع بعده و مانشرش حتى الردود اللى بتتبعتله.. و يارب يكون بيقرا المجله دلوقتنى عشان يعرف انه بجد لازم يرجع للكتابه و انه وحشنا

.....................................................................................................................................

صفحة التناحة

00000000

من التناحة انك تصحى متضايق من قبل حتى ماتفتح عينك .. ده مش اسلوب

انك تبقى بتكلم حد و هو بيقرا فى كتاب معاه و مقضيها همهمة .. و الاتنح انك لما تزهق و ماتكملش اللى بتحكيه تلاقيه بيقولك من غير مايرفع عينه من الكتاب"هاا سكت ليه؟!!..كمل"

انك تبقى بتعافر فى حاجة و مش عارف تعملها و لما ييجى حد يساعدك تقوله طب ثانيه بس انا قربت اعملها و تكمل معافرة

انك تبقى مستنى صفحة ويب بتفتح مثلا و تعد تحرك فى الماوس زى مايكون هو اللى موقف الصفحة .. حرام عليك الماوس و حرام عليك اعصاب اللى حواليك

و من التناحة بأه انك تبقى عارف انك بتعمل كل اللى انا كاتباه ده و تبقى لسه بتقرا كلامى ... قوووم يا تنح من هنا

......................................................................................................................................

اخبار اليوم

0000000

طبعا البوست اللى كسب للوزة هانم هو بوست "عندما تحتاج لالم يحيك" و نجح باكتساح و كفايه على الحاجة هديه عيد ميلادها و خلينا نشوف صرفه عشان نجيب هديه عيد ميلاد بريك و حسبنا الله و نعم الوكيل

تانى خبر اننا رجعنا الكليه بقرفها ببابا غنوجها .. و رجعنا للصحيان الساعة ستة و للرجوع بالبالطو فى الشارع الساعة تمانيه بالليل و التعليقات الظريفة عن حلاقين الصحة

تالت خبر ان احنا حاولنا نتغلب على ارف الامتحانات و المذاكرة باننا نلتزم فى الحضور و نحاول ننزل المحاضرات و السكاشن..اكيد مش عشان نساعد الطلبه بس عشان نحضر المحاضرة و نركز بضرب الجزم ..و طبعا الناس اللى هتقول محاضراتكم وحشه هنقولهم احنا منزلينها لينا مش ليكم p:

تالت خبر ان فيه كشوفات نازله فى الكليه مكتوب فيها اللى جايبين تقدير جيد فى سنه رابعه..مش عارفين ده معناه ايه؟!! بس يمكن تكون نتيجتنا هتطلع...و اشهد ان لا اله الا الله و ان محمد رسول الله

..........................................................................................................................................

التساالى

00000

"الجزيرة "فيلم بجد من اجمد الافلام العربى..من نوع الافلام اللى ماتعضش فى سنانك و تضرب نفسك عشان دفعتله تذكرة

الفيلم ده نقل لينا دنيا تانيه ماكناش نعرفها..نقل لينا عيشة الصعيد الجوانى ..نقل لينا جبروت كبير الصعيد..نقل لينا السطوة و السيطرة..و نقل لينا غرابه الناس اللى فعلا مقتنعة ان جنتها فى الدنيا و ان اخرتها عذاب كبيييير و رغم كده متكيفين مع المر و متقبلينه و دى فعلا اكتر ناس متمسكة بالدنيا..نقل لينا و باسلوب واقعى (لاول مرة) ان العقل فعلا هو اللى بيكسب .. نقل لينا ان فعلا ممكن شخصيه واحده تسيطر على بلد كامله مسالمين و مجرمين بمجرد انها شغلت عقلها .. نقل ليا احساس انه فعلا ليهم حق يجروا ورا التار بعد ما يتقتل ابوهم و امهم و اولادهم و ان فعلا قضيه الصلح بين قبيلتيين دى صعبه جدا ..نقل لينا فترة كانت الشرطة فيها بتتعاون مع المجرمين عشان تحقق امن ظاتهرى و مصالح باطنيه و الغريب انهم كانوا مقتنعين انهم صح فى كده..و نقل لينا انه برضه زى مافيه الوحش فيه الكويس

و نقل لينا احداث حصلت فعلا باسلوب تحفة من غير ما يغير كتير من الحقائق .. و على الاقل ده اول فيلم مش "مدبلج"من فيلم انجليزى

و الاهم انه اول فيلم اطلع منه و انا فعلا بفكر فى مفارقات كتير و ان انهو كان فعلا صح و انهو كان فعلا غلط .. و مالاقيش اجابه لتفكيرى

من الاخر

ده فيلم كان لازم تشوفه سواء اخراجيا او كتابيا او تمثيليا لانه معدّى

.......................................................................................................................................................

صفحة الصيدليه

00000000
والله الصفحة دى سبب تأخير المجله..بس معلش تتعوض

عموما..احنا قرينا موضوع على منتدى الكليه بيتكلم عن ازاى تقرا روشتة..و اكتشفنا بعدها ان احنا لازم نحول من الكليه بجد..لان انت بتعد 5 سنين تذاكر عشان تبذل جهد جهيد فى الاخر عشان تفسر خط دكتور..بلا نيله.. و الجدع فيكوا اللى يفسر دى(انا سارقه الروشته دى من دكتور ذكرى على المنتدى )
........................................................................................................................................................

الهوم ورك

0000000

*حاولوا تواظبوا على انكم تقروا و لو آيه قرآن واحده قبل ماتناموا

*ممكن تجمعوا انتو و تجيبوا هديه لبريك اللى عيد ميلادها بقاله فترة بس جاى فى ضائقه ماليه موسعة

*لازم تشوفوا الجزيرة..انا بيتهيألى هو نزل سرقه على النت

*ادعوا لنا عشان نتيجة الترم شكلها هتطلع قريب

*تحلوا الروشته..و من غير ماتغشوا



الستة بتوع صيدله