النهاردة



مساء الخيير عليكم ..ازيك يا عم ابراهيم اخبار الشبك معاك ايه النهاردة؟..مساء الفل يا حاج محموووود اتفضااال..لا و الله ماصطدناش حاجة النهاردة الحال واقف بس عشاك عندنا مع احلى كوباية شاى طبعا..هه..خلاص سلمت على جيران المركب و ضبطت القعدة و جيت ارغى شوية..ارغى عن ايه..همممممم..هحكى النهاردة بما انه كان بالنسبالى يوم طويييييييل..النهاردة صحيت الساعة 8 الا ربع كده و فضلت أأجل المنبه لحد 8 و قايمة غصب من عنى و انا مستغربة هما ازاى لوزة و بريك و كهرمانة بيلاقوا صحة يصحوا الساعة سبعة الا ربع عشان يحضروا محاضرة من قبيل التغيير الترم ده..و قمت و قفت قدام الدولاب طبعا فى الوقفة الصامتة اليومية اللى بقفها بلا اى حركة قدام الدولاب لحد ما فجأة امد ايدى اطلع الهدوم اللى مناسبة مزاجى..و بعد اللبس و الصلاة و الذى منه نزلت على الموقف و انا مرتبة فى دماغى ان النهاردة هحضر انا الكورس بدرى و اقابل لوزة و كهرمانة و بريك بعد ما يكونوا طلعوا من المحاضرة و نونو تجيلنا على طنطا و نخرج نتفسح او ناكل و ال 3 اساتذة يروحوا الكورس هما فى الميعاد المتأخر و اورح انا و نونو..وصلت طنطا..عديت على جاد اتعزمت على الفطار و طلعت على الكورس ببص لقيت لوزة و بريك داخلين عليا كل واحدة ماسكالى عصير برتقان.."ايه اللى طلعكوا من المحاضرة!!!" فيردوا الرد اللى انا متوقعاه من امبارح"اصل احنا وصلنا متأخر فقررنا منحضرش و نفطر من جاد"..طب فين كهرمانة؟؟.."لا هى ماكلمتناش قلنا يبقى هتنزل متأخر معاكى" و الاقى موبايلى بيرن الانسة كهرمانة:ايوة يا ظوظو انتى فين ؟؟.."انا داخلة على الكورس".."طيب ايه نظام الخروج؟؟"..عادى زى ما هو اتفقى بس مع نونو و تعالوا مع بعض""خلاص اوك"..و ساعتها تقرر الانستين التانيين انهم يستنوا كهرمانة و يحضروا معاها الكورس فى المعاد المتأخر..حضرت الكورس..و نزلت ادور عليهم.."انتوا فين""احنا فى المحاضرة خمسة و هتخلص" يادى النيلة على الالتزام اللى مقطع نفسه فى اخر شهر فى ال5 سنين..نزلولى من هنا و خلاص نونو و كهرورة على وصول لقينا صوت عالى و هوجة و فيه اعتصام فى المدرج.."هييييييه يلا نروح نتفرج" طبعا الجملة دى مش متأ:دة مين الى قالتها فينا بس مش بعيد نكون قلناها مع بعض ..طلعنا..لقينا الموضوع قالب بخناق اكتر من انه اعتصام صيادلة..طيب هى ايه المطالب..مش عارفين بالضبط..طيب ماهو فيه اجتماع مع العميد بكره ايه لزومه الكلام ده..لأ لازم ينزل يكلمنا دلوقتى..ودكاترة تنزل و دكاترة تيجى و ماحدش سامع حاجة من حد..نونو و كهرمانة وصلوا و هم لسه بيتخانقوا مع بعض..لواء الجيش جيه و قال كلام معقول فعلا و طلب يسمع المطالب من حد..و نلاقى خمسين حد قام..طب واحد واحد..كل واحد يعيد كلام اللى قبله..كان حوار مستفز ضيع الوقت و خلاص معاد الكورس بتاع العيال قرّب و مش هنلحق نخرج..و كالعادة بما ان واحدة حضرت الحصة الباقى يبصلها فجأة..و بالتالى اعرف انه مافيش حضور و انى هشرحهالهم بعدين..و تعظيم سلام على الالتزام..طيب نروح فين؟؟..محل السمك اللى اخو نونو (او أبيه زى ما نونو بتقوله) اكلهم فيه..و تاكسى و هوب على المحل..و الصراحة كانت غدوة حلوة..و خلاص الوقت اتأخر فيلا بينا نروح شبين نكمل الخروجة هناك..و طلعنا الموقف وروحنا فى عربية حقيرة سقفها طابق على نفسك بس نحمده..نزلنا سفارى كالمعتاد..شاى بأه و قهوى و ميلك شيك وضبطنا..نزلنا انا و نونو نجيب حاجة فى دقيقتين و طلعنالهم تانى لقيت بريك بصالنا بتحفز ..عرفت اللى فيها..دلوقتى هتقولنا على فكرة حاجة نعملها يا اما محتاجة فلوس يا اما مجهود يا اما الاتنين.."ادّينى فى الوريد يا سمر".."احنا قررنا نعمل حوار الحفلة اللى كنا بنفكر فيه بقالنا سنتين" و مطلعة ورقة و قلمة يعنى فيها خطوات و مهام ومسئوليات ..ادّيينى...و طبعا بدأنا نفكر عاوزين نعمل ايه بالضبط فى الحفلة و نضبطه ازاى و كل ده..(مش هقول الحفلة عن ايه .. هسيبها مفاجأة و كده كده هحكى عنها لما تتعمل ان شاء الله).. و بما انى مفلسة اليومين دول فأى كلام على فلوس تدفع بيجيبلى ارتكاريا..المهم خلصنا المشاريب و قمنا عشان نروح..و بعد ما ركبنا بريك و لوزة تاكسى قررنا انا و نونو نتمشى (شوية)..و طبعا (شوية) دى فضلت تمط .. لفينا شبين مشى _جبت نضارة نظر صحييييح و طبعا قرفت الراجل صاحب المحل و هو يا عينى فاهم انى مش عاجبانى الحاجة اللى فى المحل و مش فاهم انى اصلا بكره البس نضارة نظر ايا كان شكلها_و اتفرجنا على هدوم لانى نفسى اشتر طقم بناتى اليومين دول..لحد ما وصلنا بيتى اللى فى اخر شبين و ركبت نونو تاكسى عشان تروح بيتها بأه..كان يوم تغيير الصراحة بس من نتايجه السيئة انى لقيت بالونة فى كل قدم..ادى اخرة الجزمة البوت و سلملى على الشياكة...هه دنيا..ايه ده؟؟هو مين اللى كان فك المركب؟؟ انا فى نص الميه مش شايفة عمااار حواليا..يخرب بيت الرغى..شكلى هقضّى نص الليل بجدّف لحد ما ارجع..فكرونى اجيب موتور للمركب ده و نقلبه لانش اسهل من التعب ده..تصبحوا على خير انتوا و ادعولى عشان انا مبعرفش اعوم اصلا :'(

هناك ٩ تعليقات:

ghoneem يقول...

sa'7so'7te

بعد التحية ..
جميل أوي اني بلاقيكم مع بعض دايما كدة
الموضوع ده بيبسطني أوي أوي الحمد لله

ربنا يديم عليكم الحب والود والعلاقة الجميلة دي ..هتحسو بالموضوع ده لما ربنا يوفقكم ان شاء الله وتخلصو السنة دي ..

يوم لذيذ وطريقة عرض كوووووول وحسيت أني رايح جاي معاكو من طريقتكم الجميلة في السرد

موضوع الالتزام في آخر شهر ف الخمس سنين مش عارف تفسيره بصراحة ..يمكن ناويين يرتبو ولا حاجة :)

موضوع الاعتصام والتهريج وانه مفيش نظام ,,هية بقت فوضي والثورة وما بعدها رخمت أوي بصراحة ..كل واحد عايز يشيل حد بيعمله مظاهرة ..انت عارفة ..حتي ف شغلنا ..انا النهاردة relative لحالة رفع علية سكينة عشان أخته تعبانة ..انا كان ممكن أجيبله أقل حاجة 5 سنين ..بس والله صعب علية ..الناس مش واعية ايه اللي بتعمله عشان مفيش نظام ..وده بيثبت اننا قدامنا كتييييير عشان نمارس ديمقراطية سليمة ..ويؤكد احنا ليه قولنا لأ للتعديلات ..هية بردو كانت نتيجة واحدة ..الفوضي ..لأننا لسة مدخلناش حتي كي جي 1

موضوع محل السمك ..ياريت يعني لو جامد أوي أعرف مكانه لأني تقريبا مش بخلي محل سمك الا ولازم أمسي عليه ..بس يبقي جااااااااااااامد آخر حاجة

" نعملها يا اما محتاجة فلوس يا اما مجهود يا اما الاتنين.."ادّينى فى الوريد يا سمر".." :)))))))))

الحفلة ..انا سمعت كلمة حفلة ..يعني تورتة وحركات وممكن تجيبو كمان الأستاذ عمرو دياب وأتصور معاه ..دي هتبقي حاجة لوز العنب ...بس هية الحفلة عن ايه صحيح :d

قولتي "مفلسة اليومين دول "يعني من الصبح فطار ف غدا سمك ف ميلك شيك ف قهوة ف ميكروباص خمس نجوم ف نظارة ف لبس ..كل ده ومفلسة ..روحي يا شيخي منك لله انا حسيت اني مش لاقي آكل
........))))))))))))

هية دي المراكب ولا بلاش ..بصراحة يعني فسحة ب 100 جنيه انا هستني المركب تتفك كل يوم ..ويعمر بيت الرغي ..وسلملي علي جوزك يا اسماعيل بيه ..المركب طبعا احسن من اللانش بكتييييير لأنه من غير موتور ..يعني من غير دوشة ..هدووووووووء
تصبحي علي خير

ربنا يحفظك ويرزقك من فضله

تحياتي

بالتوفيق...........................

sa'7so'7te يقول...

ghoneem
بعد التحية برضه

هى فعلا رخمت اوى الصراحة بس لو حد قال كده حاليا بيطلع عنه انه حزب وطنى :)
و الله احنا حتى ما حصلنا كى جى وان..لما عمر سليمان قالها كلنا اتنرفزنا و اتضايقنا و ازاى يقول كده بس بعدها اكتشفت ان احنا فعلا كده

اما عن محل السمك الصراحة احنا مش غاويين سمك اوى يادوبك كنا بناكله فى اسكندرية عند دنجل فمش عارفة اذا كان المحل اللى كنا فيه جاااامد اخر حاجة و لا لأ بس عموما اسمه الجميل و فى اول شارع حسن رضوان..

الحفلة مفاجثة قلنا و هيجى وقتها ان شاء الله بس انا عموما مش بحب اوى عمر دياب..ممكن منير

اما عن الافلاس فانا باخد اصلا مصرفى بالاسبوع و كل اول اسبوع اخرج مع العيال خروجة زى دى ارجع منها معايش غير 10 جنيه و غالبا اقرر انى مش هنزل الكليه باقى الاسبوع اوفر :)

اما عن الدوشة ..ايوة ما انت مش غرمان حاجة انا اللى ايدى وقفت امبارح من كتر التجديف ...بس على رأيك هو اصلا البحر مالوش معنى غير لو معاه حبة هدوء

اسعدنى ردك فعلا..الا صحيييح مش عاوزين تدربوا شوية صيادلة عندكم فى المستشفى بس على الحالات مش جوا الصيدلية؟؟؟؟

ربنا يخليك على الدعاوى و امين يارب

سلملى على العيال ماتنساش

تحياتى

Oss يقول...

بغض النظر عن اليوم الجميل الطويل ده

عودٌ أحمد وحسين وعلى وكريم
:S
كويس إنك افتكرتى البلوج
ويا رب تكونى فاكرانى أشاساً

sa'7so'7te يقول...

oss
هههههههههه..سبحان الله كنت لسه قريا رد من ردودك و قلت عيا ترى عامل ايه..دخلت بلوجك لقيت اخر بوست قى 2009..عملت ايه فى الثانوية العامة..انا عارفة انك زمانك فى كلية بس اخر عهدى بيك كنت بتذاكر فى الثانوية..و الله نورت المركب

Oss يقول...

لأ أنا زعلان منك يا سخسوختى
:S
قوام نسيتى قرينك يا زواوى ؟؟؟

:D
حامةً أنا لسه فى تالتة
:))

تانية جبت فيها 98.8%
وحالياً غرقان فى بحور الفيزيا ورياضة اتنين

دعواتك أنت وبقية الستة

وبالنسبة للبلوج فحصلت هجرة جماعية للفايس بوك
:D
ومحتفظ بيها على سبيل الأرشيف وعشان للناس اللى لسة متمسكة بالبلوج

يلا ماتقطعوش تانى
ربنا يخليكم لبعض

sa'7so'7te يقول...

oss
هههههه..فاكر لما كنت بقولك انك اكتر واحد بتفكرنى بيا :))
مبروووووووووك على تانية..انت طلعت حريقة اهو..عقبال يارب تالتة كماان..اما عن الفيس بوك فهو سرقنا كلنا من بلوجاتنا بس انا ساعات بحن و اجى هنا..انت قفشتنى هنا ازاى صحيح؟

Oss يقول...

زيك
:D
باحن ، بس باجى أطمن واقرا بس وقلما ما باشارك بكومنت

:))

loza يقول...

عارفه يا ظوظو الى مخوفنى اكتر انى حاسه اننا لو عجزنا السنه الى فاتت 10 سنين بعد ما نتخرج هنعجز 20 :s
ده احنا دلوقتى واحنا لسه ف الكليه عشان نتجمع احنا ال5 بنبقى محتاجين معاد قبلها بشهر ..!!

احلى حاجه عملتيها انك فتحتى البلوج وان شاء الله هرجع اكتب معاكى لمجرد اننا نفضل متجمعين حتى لو ف بلوج..

sa'7so'7te يقول...

memaa
و الله منورة المركب..اما عن العجيز فانتى ما شاء الله عليكى مفيش ولا تجعيدة :D
لكن انا فعلا حسة انى عجزت من جوا اوى و فى نفس الوقت لما بقول لأ كفايه كده و احاول اعمل معاكم حاجة طقة ببقى عاملة زى الراجل العجوز اللى قرر يطلع للدور العشرين على السلم و من الدور التانى مش قادر ياخد نفسه و اتخنق
ايه التشبيه المتعب ده!! سيبك انتى..المهم مستنياكى تدوّرى المركب انتى الطلعة الجاية