عادى..فجأة قعدت اقرا البلوج بتاعنا اللى بكل غباء هجرناه بقالنا اكتر من سنة..فجأة مبقتش فاهمة احنا ليه سبناه..يمكن عشان مشاغل الدنيا..بس هى طول عمرها مليانة مشاغل..انا رأيى ان احنا سبناه عشان الروتين..عشان كنا وصلنا لمرحلة كان فيها الكتابة فى البلوج واجب بعد ما كان للمتعة..عموما ايا كان السبب فهو متخلف..عموما بما انى بفضفض هنا لوحدى و متأكدة ان ماحدش بيقرا فانا هقول اخر اخبارنا دلوقتى..همممممم..بالنسبة لمصر فكل الناس عارفة اللى بيحصل فيها دلوقتى بعد الثورة و عارفة محاولات الخروج من ازمات كتير و ربنا يستر بس انا تعبت من السياسة فمش هتكلم فيها..
هممممم ... نبتدى ب(بريك) بريك عقبال عندكم خلاص فاضلها كام شهر و تروح لبيت العدل"مش عارفة يعنى ايه العدل الصراحة" و اليومين دول مشغولة بتخليص باقى حاجات الشقة و السيراميك و ما الى ذلك..و احنا اصلا مش متخيلين انها كام شهر و تبقى عروسة..دى لسة عيلة

اما عن (لوزة) فلوزة بقالها فترة يا عينى واقعة فى مشاوير العرايس بين اختها شوشو و صاحبتها يارا..و مقررة تستمتع بالترم ده بما انه
اخر ترم فى الكلية فبتنزل كل الايام و على المحاضرات..و تتمشى مع اى حد لو احنا مش موجودين..و كمان بتتصور معاهم مع انها لسة متعرفة عليهم
نيجى ل(كهرمانة).. و هى كالعادة على طول مشغولة..فى ايه بالضبط..انا معرفش..لكن ما بين الجمعية و حوارات تانية كتيرة..بس ربنا
يسهل و نسمع عنها خبر حلو قريب..(هشششش..ماحدش يقولها انى سيحت عشان ما تاكلنيش)
اما عن (نونو)..فالانسة خلاص بأت خريجة مش طالبة زى حالتنا و كعادتها بتستمع بحياتها و الاوقات القليلة اللى بتبقى فيها فى شبين بتعرف تخلينا كلنا نستمتع معاها..بتاخد كورس انجليزى و بتدور على شغل تستحمله اكتر من اسبوع

بس خلاص دى كانت اخر اخبارنا..ايه؟؟..اخبارى فين؟؟..لا جديد تحت الشمس..

بس يمكن الخبر انى قررت ارجع اكتب و انا فى مركبنا العزيز..بس فى السكرتة

هناك 4 تعليقات:

ghoneem يقول...

sa'7so'7te

انا كان نفسي ترجعو تكتبو تاني ..بس مش بالسرعة دي يعني :)))
أنا ف الجنة ولا ايه ..أحمدك يارب

حمدا لله ع السلامة ..منورة المركب بتاعك ..قصدي بتاعنا كنت حاسس اني غرقان من غيره والله
بس الحمد لله رجعتو وان شاء الله مش هنسيب المركب تاني :)

أما بعد ,,
بتقولي " احنا سبناه عشان الروتين.."
بس انا عمري ما حسيت كدة من كتاباتكم ..ولو كان ع فكرةروتين وعشان لازم تنشرو بوست وكدة يعني كان هيبقي بلوج رخم ودمه تقيل كمان ..بس هوة عشان ده حقكم ولازم أقوله انتو فعلا أكبر ميزة ف البلوج بتاعكم انه مش فيه أي روتين ..ولا تقييد بأي حاجة ..بلوج خفيف وهواه تحفة

بتقولي "هنا لوحدى و متأكدة ان ماحدش بيقرا " آآآآآآآآسف..كان نفسي أحققلك رغبتك ..

بتقولي " بريك عقبال عندكم خلاص " ...أيوة ..هوة فعلا كدة ..بريك خلاص خلاص خلاص ربنا يتولاها برحمته ياااااااااااااااااااااااااااارب
كانت طيبة والله

بتقولي "فلوزة بقالها فترة يا عينى واقعة" ..وسايبنها واقعة ليه ..أما انتو منايفة صيحيح ..ع العموم أهي بتاخد خبرة بردو وكله سلف ودين وهنيالك يا فاعل الخير والثواب وحسنة قليلة تمنع بلاوي كتيرة .. :)

"كمان بتتصور معاهم مع انها لسة متعرفة عليهم" همووووووووت من الضحك

بتقولي "كهرمانة).. و هى كالعادة على طول مشغولة"..بس ده مش يمنع اني هسيح وأقول اني عرفت الخبر الحلو ..بهدي النفوس بس

بتقولي (نونو)..فالانسة خلاص بأت خريجة..وبتدور ع شغل تستحمله ..تستحمله ..هية اللي تستحمله ..لا ابقي سلميلي عليها كتير ونشوفها ع خير ان شاء الله ..هوة فيه أكتر من الصيادلة ..هية تصلي وتدعي ربنا وان شاء الله تبقي تقابلني
ع فكرة أنا ممكن أشغلها عندي ف المستشفي بس أحنا مش عايزين نتقل عليها بس لو تستحملنا اسبوعين يبقي كويس خااااااااالص

بتقولي " اخبارى فين؟؟" ...أيوة صحيح فين ..امال أنا قاعد بقرا كل ده من ساعتها وفرحان انكو رجعتو البلوج عشان تقوليلي لا جديد تحت المش عارف ايه ..

طبعا خبر انك رجعتي تكتبي يستحق الخبر الأروع
أما بقي .."بس فى السكرتة"
ما أوعدكيش ..ان شاء الله مصر كلها هتعرف ..

نورتي المركب
حياة موفقة هادئة
تيرم أخير ناجح ان شاء الله
أشكرك لأنك بجد أسعدتيني أنا فاتح بقي من الناحيتين ازاي مش عارف :))))

تحياتي

بالتوفيق..........................

sa'7so'7te يقول...

غنيم
او ابو العيال زى زمان :D
اولا انا رجعت من ورا العيال ما تتفائلش اوى يعنى
بس المركب منور بيك طبعا
هو مش روتين فى كتابة المواضيع..هو زى ما تقدر تقول كنا ما بنحبش نسيب المركب فترة طويلة مهجور و ساعات بنبقى ماعندناش كلام يتقال فكل واحدة تستنى ان التانية الى تدخل تكتب و ترتب و تنفض المركب

اما عن هنا لوحدى فانا ماحقتش استمتع بالسكرتة خالص قفشتنى وانا يادوبك واخدة المركب و لسه على الشط

اما عن بريك فبلاش اخليها هى اللى تيجى ترد عليك..طيبة ايه بس انت مش عارف

لوزة واقعة فى مشاوير لكن عمرها ماتقع فى فلوس دى اول واحدة فينا كانت بتحوش مصروفها

اما عن كهرمانة فلو قلتلتها حاجة انا معرفكش و هامسح الجملة دى و سلملى على جوزك يا اسماعيل بيه

نونو بأه مش صيدلة اصلا هى اقتصاد و علوم سياسية بس معانا من زمااااان فبنفكر نخليها برضه تشتغل فى صيدلة معانا مش عارفة ازاى

اما عن مصر كلها هتعرف فاشك لانك عارف انتقام الستة بتوع صيدلة..خلينى كده فى السكرتة
بالنسبة لشكل المركب فانا قلت بأه المعه كده و اجدده مش معقول اسيبه بترابه بعد الغيبة دى

اسعدنى جدا ردك او ردودك بمعنى اصح :)
و كنت حاسة انك اول واحد هتقفشنى هنا

safa7_karmooz يقول...

ويلكم باااك

انا لحد وقت معين وبالتحديد قبل الثورة كنت بدخل واقلب فى القديم واقرا

بعدين بقيت فى حالى وبطلت ادخل عند اى حد ..:)

iman يقول...

اتمنى انك تكوني لسه فاكراني يا مرمر لاني فاكراك وبفتكرك على طول لانك غالية عليا وانتي اخر واحدة فضلت اتواصل معاها قبل ما اتقاعد و اسيب النت خالص و اتجوز

الف الف مبروك وعقبال ما تبقي ماما زيي٨٨