كبرنا


احنا بدأنا البلوج ده من مايو 2007 يعنى من تلات سنين كده (عديتهم على صوابعى)..التلات سنين دول غيرووونا كتييير اوى..حسه ان احنا عجزنا فيهم..زمان كنا ننزل الكلية اول كل سنة و احنا مقررين نحضر محاضرة على الاقل من كل مادة و نشوف ليها لزمة ولا لأ..و بعدين نرسى على محاضرة واحدة و بقية الوقت نقضيه تحت الكوبرى فى الكليه..نهيس..نرغى..نلعب سبن ذا بوتل..نعلق على لبس اى حد معدّى"الشوذة دى مش لايقة..الطقم ده جامد..الطرحة دى مش مكانها..الشنطة دى بوّظت الطقم" ممكن نقضى ساعتين كده..و اللّى وراه فينا سكشن يطلع و الباقى مستنيه تحت فى مكانه..نروح سينما كل ما فيلم ينزل..نقعد فى الكشك بتاع الكلية نشغل فيروز لحد ما ننسى احنا فين و امتى..نرغى كتييييير و نتجادل اكتر..نعلى صوتنا فى العربيات و مش واخدين فى بالنا لحد ما حد يقولنا صلوا عالنبى..مانساش يوم ما سواق طماع ركبنا خمسات فى الكنبة..و حبينا نبوخ عليه فكل واحدة فينا سدت ودنها و بدأت تغنى بصوت عااالى اغنيه غير التانيه..كل مافتكر الموقف ده بحسنا مستفزين جدا جدا جدا..كنا هبل اوى و صغيرين اوى..كنا نعمل اللى شايفينه صح حتى لو كل الناس قالولنا غلط..عرفنا ناس..اعجبنا بناس..وكرهنا ناس..واتلسعنا من ناس و ناس وناس..غلطنا كتييير غلطات نفسى الزمن يرجع عشان مانعديش بيها تانى..وفجأة لقيتنا كبرنا..حسة بحالة من الخرس فى حياتنا..بقينا كل واحدة مشغولة بدنيا..لسه اصحاب و اخوات..بس عاقليييين..انا فاكرة مرة زمان كنا راجعين شبين و الجو كان جميل و هوا شباك العربيه مخدر وشوشنا..وقررنا نرجع فى نفس العربية طنطا عشان نفضل فى المود ده شوية كمان..آخر مرة عملنا حركة مجنونة او ملهاش معنى زى دى مافتكرهاش..حتى فى خناقتنا بقينا نكبّر .. انا نفسى حسه انى عجزت من جوا..كل حركة بعملها الف حساب...عارفين زمان لما كنت انزل دريم بارك ماكنش فيه لعبة الا لما اركبها..مع الوقت بأيت اجبن..كل مرة اخاف ادخل لعبة جديدة لحد ما بطلت اروحها..حاسه انى يائسه..كل اللى نفسى فيه بيبعد يوم عن اللى قبله لحد ما بقالوش طعم..حسه بجبل تلج بيشل قلبى بيمنعه من جنونه بيوقف نبضاته بيسد نفسه يوم بعد يوم..احنا امتى كبرنا كده..و ليه كبرنا كده؟

هناك ٩ تعليقات:

Oss يقول...

Bgad wa7shenny moooooooooooooooooot wallahy

rack-yourminds يقول...

ازيكم ياسته يا بتوع صييدله اخباركم ايه اتمني تكونوا بخير

-----------

انتوا بقي اللي كبرتوا امال انا اعمل ايه,,,, حرام عليكم ,لازم يعني تعكننوني علي الصبح كده هههههه
------
تحياتي

غير معرف يقول...

انا ليا تعليق بعد اذن حضراتكوا
انا كنت شايف جروبات كتير اتفشكلت او عقلوا او مبقوش زى الاول
ربنا يحميكوا ومتوصلوش لمرحلة الفشكلة
كل دا بيكون بسبب ان واحدة من الجروب تبعد
التغيير مش بيكون فى الكل بيكون فى واحدة فبتشجع الباقيين
لما واحدة بتبعد عن الباقيين بيبقى سهل جدا اللى بعدها تبعد واللى بعدها تبعد ودا اكتر سبب بيأثر
حتى لو رجعت بعد كدة بتكون سابت فراغ مكانها وهيا بعيدة
ولما واحدة بس تعقل بيبقى سهل اللى بعدها واللى بعدها
ولما واحدة تبطل تحضر محاضرات زى مانتى بتقولى بتجر الباقى
انتوا كنتوا مشتركين فى ان كلكوا قريبين من بعض مهمها حصل كلكوا طاقين كلكوا مجانين
بس من الواضح ان البداية كانت من واحدة ايا كانت هيا مين
مش سهل ترجعوا بس ممكن
طول مانتوا لسة متمسكين ببعض

HaNoDa يقول...

تصوري انا حاسة نفس الاحساس

بس مش عارفة اغيره او ابعده

ويمكن هيزيد أكتر لما نتخرج ونبعد اكتر واكتر

ساعتها ممكن يجي عليكي يوم وتنسي اصلا انك كنتي مجنونة في يوم من الايام

Unknown يقول...

امممممممممممم انا من زمان قوووي قووي مجتش هنا

وسعات كنت اقرا وامشي

بس موضوع اللعب ده مقدرتش اني معلقش عليه

لانه كان اول تعليق علقتوا بيه عندي

وشكلكوا بيبقي عامل ازي وانتم راكبين لعب دريم
هههههههههههه

غير معرف يقول...

oss
wnta kman begad..3mlt eh felderasa we 2a5er 2aradek fen?? yarab tkon b5er
*******************
rack
7aga w7sha awe lma myb2ash elkobr da felsenn..lma yb2a elkobr da felro7 we fel2alb..l2n sa3etha byb2a shalal...shalal 3n el temo7 we 3n el2ml we 3n el7yah..w b3d3en enta lsa shbab :D
*******************
the unknown
mmkn ykon klamak sleim..mmkn kman 2kon ana elwa7da de le zerof ma we bedon asd..3aref lma btb2a btgre wra 7elm fa mt5odsh balak enk fe gryk da elmsafat btb3d..'3aleban da elle 7sl..w f3ln ana lma rg3t..rg3t awe..btaleb kol 7d eno yfdl zy elawl aw yrg3 "awe" zye..we zy m2olt enta l2et eltanya weltalta welrab3a b3dt..yarab nb2a mtmsken zy mnta bn2ol 3shan nrg3
************************
hanoda
7ettet ene nset elgnon fda 7sl blfe3l..d5lt el 2afas
************************
nsreen
mnwra elblog swa2 2rete w mshete wla rdete
we blash 2e7rag b2a :D

اقصوصه يقول...

رمضان كريم :)

غير معرف يقول...

مصر فى مهب الريح

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 – العدالة الاجتماعية .. وأطفال الشوارع والذين يملكون كل شىء .
5 – ضرورة الاتحاد مع السودان لتوفير الغذاء وحماية الأمن القومى المصرى.
6 – رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

لمزيد من التفاصيل أذهب إلى مقالات ثقافة الهزيمة بالرابط التالى
www.ouregypt.us

admelmasry يقول...

بصي هو فيه خبر حلو وخبر وحش
.
.
الخبر الحلو
مبروك انضمامك للنادي العواجيز الكول
الخبر الوحش
للاسف .. انت لسه ماشوفتيش حاجة