new post in our diary



من كام يوم كده كنت قاعده انا وماما ساعه فضا بنتفرج على الصور

فى النص لقيت صوره لماما وواحده صاحبتها لابسين نفس اللبس

لفين الطرحه نفس اللفه واقفين نفس الوقفه

لما سالتها مين دى

قالت لى دى انتيمتى ايام الكليه

الدكاتره كانوا مسمينا هناء وشرين

طب هى فين دلوقتى..؟

معرفش...

اسمها ايه طيب...!؟

مش فاكره ....

ماما دى انتيمتك .....!!!!

يحبيبتى احنا منعرفش حاجه عن بعض من 20 سنه


اتضايقت اوووى ساعتها

وجريت على البوم الصور بتاعى انا والعيال الى فى درج التذكارات

كتبت اسم كل واحده ونمره البيت والسنه الى عرفتها فيها على صورتها


لقيت فيه جواب كهرمانه كانت كتبهولى واحنا فى اعدادى

قريته وموت من الضحك

بجد فرحت جداااا بيه


لقيت يجى اكتر من 150 استيكرز كنت مجمعاهم انا وبريك

كنا نروح نشترى من الواحد 2 انا واحد وهى واحد

اتفرجت عليهم واحد واحد ورتبتهم حسب نوعهم


لقيت ورقه ادعيه طوخى ادتهالى فى ثانوى


لقيت اشتغاله من ظوظو وسنفوره ف اعدادى

كانوا سايبن لنا ورقه ليله الامتحان

على المكتب فى الاوضه الى كنا نايمين فيها

كاتبين فيها حطينالكم الورقه جمب التليفزيون

نروح نلاقى ورقه تانيه مكتوب عليها

هاهاهاها ضحكنا عليكم احنا حطينناها عند الكولمن

وفضلوا كده يجى 3 او 4 ورقات

واخر ورقه كتبولنا فيها


"صباح الخير يابريك ..بالراحه اهو لحسن تتخضى

صباح الموز يا دكتوره موزه

وصباح الخير يامولاتى كهرمانه

شهريار ..اقتلها كالبعير


بصوا صحوا مى عشان مذاكرتش

وصحونى انا وهند لما تيجوا تحلوا الشيت

يعنى على 10 كده

والنبى متعملوش دوشه عشان احنا نمنا الساعه 5 ونص"


ولفيت شويه فى البلوج قريت معظم مواضيعه

بردودها

البلوج بالنسبه لى مكنش حاجه فتحتها اصلح بيها الكون

ولا احل بيها ازمه العيش

قد ما بعتبره diary لاحلى ايام ممكن نعيشها

حتى الردود مبعتبرهاش مقياس لنجاح البلوج

قد ما بعتبرها حد بيكتب لنا فى الاتوجراف


لقيت حاجات بالهبل

فرحت جدااا لما شوفتها


بجد بحبكم اووووى

بحب كل واحده فيكم بعيوبها ومميزاتها


بجد هتوحشونى الفتره دى

هيوحشنى تهيسنا

وتريقتنا على بعض

وتقليدنا لحركاتنا

حتى خناقاتنا الهبله

الى بنخلصها بضحك على بعض


بت يا كهرمانه خلى بالك من العيال

مش عارفه انا ايه الى جاب امينه رزق فى البلوج


انا مين ؟ انا فين ؟ انا ازاى ؟



قمة مراحل التوهان انكتبقى مش عارف انت مين

او بمعنى اصح انت ايه ؟

تقابل الطيب فلازم تبقى طيب و حنين و تقابل الخبيث فلازم تبقى اخبث منه و تقابل الصادق فلازم تبقى صادق و تقابل الكداب فلازم تحرس


يمكن ده كان تصورى عن الاسلوب الملائم للتعامل مع الجميع ان الواحد لازم يشكل نفسه و يغير من اسلوبه للتكيف مع جميع الاوضاع

و لكن ده فى النهاية خلانى انا فى اغلب الاحوال مش عارفة انا انهى شخصية فى دول


و لما فكرت فى فترة من الفترات انى اتعامل مع كل الناس باسلوبى انا بس و اللى عاجبه عاجبه و اللى مش عاجبه هو حر لقيت ان ده عمل مشاكل كتير و فى نفس الوقت خلانى اتخدع فى ناس كتير


عمل مشاكل لان المواقف اللى بكون قاسية اوى فيها بابقى كده مهما كانت الشخصية اللى قدامى تستحمل او لا

و خدعنى لانى كنت بافترض حسن النية فى حاجات كتير اوى ثم تتوالى المفاجأت و ضربتين على الراس توجع فما بالكم بعدة مطارق


مش عارفة ابقى ؟

او اكون مين؟


اكون انا اللى انا بحبها يمين يبقى يمين مع كل الناس و شمال يبقى شمال مع كل الناس

و للا اتشكل على شاكلة اللى قدامى ما دام مفيهاش تعارض مع مبادئى حتى لو كان ده هيلخبطنى فى نفسى لان لو الشخصيات اللى قدامى مختلفة يبقى كل يوم هتألقلم مع حد مختلف و لو الشخصيات متناقضة يبقى لازم اكون طيبة و خبيثة و ذكية و فى نفس الوقت اعرف اتعامل مع اى مستوى عقلى اخر اعلى او اقل و قاسية و حنونة و .................................


و فى النهاية عند تقييم نفسى اجدنى اصبحت قطعة من شخصية الجميع و لا استطيع ان اجيب على السؤال الذى قد يجيب عليه طفل صغير


من انا ؟؟؟


يعنى مثلا لما اتعامل بريك لازم اراعى كلامى اوى لانها حساسة و رقيقة جدا

و لنا اتعامل مع لوزا لازم ابقة مركزة جدااا و واخدة بالى من كل كلمة تقولها لانها بتنسى كتييييييييير و ده بيعصبنى

و سنفورة لازم ابقى قاسية و مسيطرة الى حد ما لانها شقية جدا بتخيلنىىىىى

و سخسوختى لازم اتماااالك اعصابى لانها عصبية و حط النار جنب البنزين و شوف اللى هيحصل بس يمكن تكون اكتر واحدة باعرف مدخلها و اتفاهم معاها لانها واااضحة

و نورا بحب اناغشها جدا و احيانا باكون عندية معاها رغم انها كتير بتاخدنى على اد عقلى
ادينى كده بقيت خمسة فى واحد و لما كل واحد من الخمسة دول ييجى يقول رأيه بقة تلاقى اللى يقول عصبية و ساعتها معرفش ارد او بتقفلى على الكلمة معرفش برده او بقيتى هادية و مبتزعئيش حتىفى المواقف اللى تستاهل (تطنشى يعنى )


يووووووووه

انا مين فى دول


انا كهرمانة بس مش عارفة اوصلى(على وزن انا باكينام و نا ماسكة فى نفسى )


تفتكروا الحل انى ابقى انا مهما كانت النتااائج ؟؟؟؟؟؟؟؟


فى حين ان ده هيتطلب منى مجهود بعد عصر التشكلااات لكى اصل الى (من انا ؟؟)


-----------------------------------------------------------------------------------------


عذرا لغيااااااااابى الطويل الفترة السابقة لان الكمبيوتر بتاعنا كان يتقال عليه يارحمن يارحيم لان اخويا الصغير كان اداله بالبوكس لما دخل فيه جون و بعد ما اتصلح الروترجالتله انفلونزا شديييييدة خلته سخن مولللللع و لسة جايبين واحد


و لكن نعدكم بالتواصل بدون فواصل
كهرمانة

انا اسفه


اسفه جدااا انى اعتبرتك انا

اسفه انى عيشتك فى ايامى

اسفه انى كنت بفكر معاكى بصوت عالى

اسفه لو اعتبرت كل اخطاءك سوء ظن منى

اسفه انى مع كل مره بزعل فيها منك

برجع لك زى الاول

والمره الى بعدها تثبتى لى

قد ايه انا عبيطه

وانك متغيرتيش

اسفه لو كنت شغلت جزء من اهتماماتك

حتى لو كنت اخر حاجه بتفكرى فيها

مع انك اول حاجه بفكر فيها

اسفه انى حبيتك اكتر منى




الاعتذارات دى كلها مش ليكى

انا بعتذر ليا


واوعدك انى مش هستناكى تتغيرى


انا الى هتغير


البوست لحد مش من البلوج

بس احيانا بتفتكرنى

وتفتحه غلطه


loza