حدووووتة



بداية الحدوتة كانت مضحكة..اول سنة لينا فى الكلية و انا و بريك قاعدين على الارض ايام ماكنا مش بنلاقى كنبة فى الكلية نقعد عليها..فجأة لقينا ولد اسمر و حليوة جاى مع صاحبه بيكلمنا"انا اسلام الامين..طالب معاكم و فى الاتحاد..كنا حابين نبلغ حضرتك ان فيه رحلة لدريم مطلعنها من شبين مخصوص و ياريت تشتركوا فيها"..طبعا هو قال حضرتك و انا ابتسمت..و طبعا انا ابتسمت و هو اتحرج و ودانه احمرت..و قلناله"اكيد بس هنقول لبقية اصحابنا"..و عدى الموقف..و ماكنش هينفع نطلع فيها مش فاكرة ليه..و اللى اكتشفته بعدها ان لا فيه رحلة ولا يحزنون و انه كان مش عارف يفتح كلام فاخترع الحجة دى بعد تفكير اسبوعين..و انه فضل اليوم ده ماشى ورانا انا وبريك ساعتين مستنى الفرصة المناسبة..و مرة فى مرة و كلمة فى كلمة .. و كل كلمة تبين اد ايه هو محترم و اد ايه هو بيتحرج بسهولة.. و طبعا بدأت العصابة السوسة تاخد بالها.."ظوظو ده مش بيشيل عينه من عليكى..ظوظو ده حتى و انتى مش بصة بيفضل متابعك" و ظوظو اللى هى انا بتقولهم"لا عادى..بطلوا نقورة على الناس..هو بس عشان انا اكتر واحدة فيكم ليها كلام معاه..لا ده محترم و بيتحرج" و الغريب انى كنت بموت فى احراجه ده..و فى مرة كان هو محتاج ورق مادة معينة و كنا فى الامتحانات و كان هيجيلى متأخر و هو فضل يحاول فى الكلام انه يوصلنى انى ما اداميش حل غير انى اديله نمرة تليفونى..قمت انا اتناصحت و قلتله طب هات نمرتك و انا لما يجيلى الورق هسيبهولك فى المكتبة الفلانيه و اعرفك :) ..و بكده بقى معايا نمرته.. وفى تانى سنة جيه عيد ميلادى ..و قررنا نعمله فى الكلية..و عملنا التورت و قلنا هنعزم مين..كنا عازمين ناس كتيير منهم كان اسلام و واحد صاحبه و اتنين تانيين كنا نعرفهم كلنا..و قصدت ماقلش لحد عشان محدش يجيب هدايا..و هو قلتله قبلها بيوم عشان اضمن انه جاى و نبهت عليه محدش هيجيب هدايا..و طبعا كان هو الوحيد اللى فاجئنى بهدية..كانت عروسة جمييلة اوى..سمتها حبيبة لان كان الاسم ده ساعتها عاجبنى اوى و مقررة اسمى بنتى على الاسم ده..لحد دلوقتى بتنام فى حضنى..احلى حاجة انه اول ما جيه الولدين التانيين عيد ميلادى خدت بالى انه اتنرفز..و ضحكت فى سرى..بعدها بكام شهر كان جيه الفالنتين و قررنا انا و بريك و سنفورة نلبس اى حاجة فيها لون اورانج و قررنا ان ده لون اللى مش مرتبطين :)..و لقيته بيتصل بيا انا عاوزك ضرورى انتى فى سكشن ولا فاضية..اد ايه كان صوته متوتر.. نزلت شفته فين فى الكليه و لقيته بيطلعلى هدية..طبعا انا اتحرجت..كنت طالعة من ظروف مخليانى مقررة انى الغى الحب من حياتى..و انى مستناش حاجة من الدنيا..اد ما كنت معجبة بيه اد ما رفضت الهدية و انا مش باخد هدايا و هو يقولى انا بس برد جمايلك فى اقرب مناسبة جت و انا اقوله خليها فى عيد ميلادى و كلمة هنا كلمة هنا انتهى اكتر موقف محرج بالنسبالى..و مشيت منه و انا مش عارفة سر اصرارى على الرفض ده..و انا حسة بالغباء من اللى عملته..قعدنا فترة بعدها يتجنب انى اشوفه و قعدت انا فترة احاول انى اشوفه.. كانت ايام بايخة..بعدها بفترة كنت قاعدة على ايميل البلوج..و لقيته اونلاين..اكلمه و لا لأ..بعدها عرفت انه كان قاعد قبلها بساعة يسأل نفس السؤال..كلمته من غير ما يعرف انا مين فى الستة..و اصر انه يعرف فعرفته..يومها سبحان الله قعدنا نتكلم كتييييييييير اوى..كان يوم جميل..و تانى يوم اتقابلنا فى الكليه و قعدنا نتكلم كتيييير برضه اوى..اكتشفت اد ايه هو حد جمييل .. طيب و محترم و حنين.. بعدها ورانى حاجة كان هو كاتبها..حاجة عن واحدة كان بيحبها.. طبعا كان الكلام عليا..مش عالافة جاتلى الجرأة ازاى اسأله اذا كان لسه بيحبها.. انا مش فاكرة ازاى سألت السؤال بس سألته بطريقة تلخبط فهو اتلخبط و قالى لأ..انا اتكبست طبعا و وشى جاب الوان..فجأة هو عاد السؤال فى دماغه و لقيته فجأة بصوت عالى يقولى "لأ أأأأأأه اكيد لسه" انا ساعتها ضحكت اوى..احساس غرييب بالراحة..و مشينا.. كتبت موضوع هنا على البلوج..انى خايفه لانى فرحانة..و انى كل ما بفرح بتيجى بعدها حاجة تانيه وحشة..و كتبلى رد كان بالفطرة..و خاف ماكنش قريته فطبعهولى و اداهونى فى الكليه..قلى اسمعى نصيحة مجرب و صلى استخارة..بعدها عرفت انه كان صلى استخارة قبل ما اكلمه على الايميل بليلة واحدة(لحد دلوقتى شايلة الورقة اللى طبعلى فيها الرد ده)..صليت استخارة..و سألنى اذا كنت جربت نصيحته..بعدها قلتله انه لازم الموضوع يجيى رسمى..طلب منى بس انى استناه و و انه اللى مانعه ظرف معين لو اتحل مش هيتأخر و احترمت الظرف ده جدا و احترمته هو اكتر..و كملنا مع بعض.. معرفة البيت عندى و هو معرف البيت عنده..و استحملنا كتييير اوى..انا بطبعى بعمل اللى مقتنعة بيه حتى لو مش عاجب الناس..اد ايه هو كان سندى فى الدنيا..اد ايه فضل هو فرحتى .. اد ايه فى اسوأ الظروف وقف جنبى استحملنى..اد ايه فى اكتر الايام اللى كنت بكتئب فيها كان هو الوحيد اللى بيعرف يسرق منى ضحكة وسط عياطى..اد ايه وجوده اصبح لازم فى حياتى..مبعرفش اصحى من النوم غير لما بسمع صوته..و مبعرفش انام غير برضه لما اسمع صوته..عمرى فى حياتى ما كنت بعتمد على حد..الا بعد ماعرفته..مابقتش اعرف اعمل حاجة غير بمساعدته.. على اد علاقتى بيه على اد ما كان اخ لباقى الستة..حتى باقى العيال وقفوا معايا فى قرارى و كانوا سند ليا فيه..و هو فجأة بأه له هدف فى الكلية بأه يذاكر عشان يجيب تقدير و الغريب ان الناس فهمت انى انا اللى كنت بشجعه..و ما يعرفوش ان وجوده هو اللى كان بيشجعنى..هو اللى بيعملنا جدول مذاكرة..و هو اللى بيزعقلى لما بقصر فيه..هو اللى بيراجع معايا على التليفون..و انا اول واحدة يطمن عليها بعد الامتحانات.. بجد هو صاحبى و والدى و اخويا و سندى و حبيبى.. و ابنى كمان..ساعات بجد بحس انه ابنى..كل ما بكتشف نقطة ضعف ليه كل ما حبى بيزيد ليه مش عارفة ازاى..و هو كمان بأة بيقلد بصوته طفل صغير و بأينا نتخيله ابننا..ياربىىىىىىىى اد ايه مستنيه يجى اليوم اللى اشوف فيه ابنى و يطلع بيتكلم بنفس الطعامة دى.. اد ايه كنت فى عز حزنى لو سمعت الصوت ده كنت بطلع من الحزن ده..و اعمل حوار طجويل معاه و انسى و اتخيل انه ابنى فعلا

و فجأة ربنا من كرمه و حنيته فك الظرف اللى كنا مستنينه ده..يااااه..فجأة لقيت تليفونا بيرن..تانى يوم لقيته عندنا فى البيت..و فى نفس اليوم قرينا الفاتحة و قرروا ان هنلبس الدبل اخر الاسبوع و نأجل الشبكة لبعد الامتحانات..انا مكنتش مصدقة..ايه ده اد كده ما ضاقت الا لما فرجت..قررت اعملها مفاجئة للعيال و عرفت نونو عشان تساعدنى فى المفاجأة .. وقبل الدبل بيومين حصلت حالة وفاة ..جد لوزة ربنا يتقبله فى جناته ان شاء الله..و لوزة سافرت.. طبعا ماكنش ينفع احتفل من غير لوزة ..لازم الستة يكونوا معايا..و ماكنش ينفع أأجل الميعاد بعد ما ارتبطنا بيه .. و فضلت ليلة الخميس مش جايلى نوم للفجر..و فجأة بعت مسج للوزة قلتلها الخبر..طبعا طارت من الفرحة و قالتلى ماتحمليش هم انا هجيلك يومها ان شاء الله.. اكلم ياسمين "ياسمين انتى فاضية بكره؟" الاقيها بتقولى بكره ما ينفعش خالص جايلنا ناس مهمين" ييييادىىىى النيله..بصى يا ياسمين انا من الاخر هلبس الدبل بكره انا و اسلام و يخرب بيت اللى يفكر يعملكم مفاجأة" طبعا برضه طاارت من الفرحة و قالت لأ هجيلك ان شاء الله ساعة و امشى على معاد الناس مش معقول هتلبسيها من غيرى..و الحمد لله عرفت افرح احلى و اكبر فرحة فى حياتى فى وجود اهم ناس فى حياتى..انا بجد مبسووووطة جدأ جدا جدا..و الى حد ما مش مصدقة.. ومقدرش اقول غير الحمد لله يارب و ربنا يخليكوا ليا يا عيال..و بحبك يا اسلام :)

هناك ٩ تعليقات:

غير معرف يقول...

wana kma bmoooooooot feke ya zozo ..wrbna may7rmne menk wala mn d7ketk wala mn 7opek lya abdn yarab...wrbna ytamem lena 3ala 5er isa .. b7bek awe( 7pibek smsm )

rack-yourminds يقول...

زي مكنت بقول زمان:تسجيل حضور ولي عوده اخري

rack-yourminds يقول...

الف مليوووووون مبروك ,ربنا يتمم بخير ,ويارب دايما في سعاده وحب

loza يقول...

انتى عارفه يا ظوظو انا اول مره افتح الكمبيوتر النهارده ..
و كنت داخله النهارده اكتبلك بوست عن خطوبتك ..
واغير لوك البلوج واعمله قلوب نازله وحركات ..
واشيرلك اغنيه صدقنى خلاص ..

خليكى احرقى ف المفاجات كده لما اشوف اخرتها معاكى ..

مبرووووووووووووووووووووووك يا ظوظو انتى واسلام والله خطوبتكم دى احلى حاجه حصلت لى السنه دى هى وفرح يارا الصراحه يعنى

sa'7so'7te يقول...

smsm
e7m e7m..enta hna :D..tb 7eth kda b2a f ana bmoooooot feeek

******************************

rack
الله يبارك فييييييييييييييك..اميين ياااارب

*********************************
ميدان التحرير: حاضر
*********************************

lozteee
هههههههههههههههههه..معلش تعبتك معايا يا حبيب قلبى..الله يبارك فيكى يا ميمااا..و الله الاحلى انك عرفتى تحضرى ربنا يكرمك و الله..حبك يا ميماااا

بيتنا القديم يقول...

الف مليون مبروك وربنا يتم فرحتكم على خير..
(:

safa7_karmooz يقول...

الف مبروووووووووووووووووووووووك

معلش متأخرة حبتين تلاتة بس مكنتش اعرف انكم رجعتوا تكتبوا تانى :)

غير معرف يقول...

سارة ....

مبرووووووووووووووووووووووك
بصراحة يعني حدوووووتة تحفة استمتعت جدااااا وانا بقراها "حاسسها " بجد ربنا يوفقكم انت طبعا تستاهلي الخير كله وكمان هوة باين عليه بجد شخص محترم وهينط من عينه الاتنين انه " بيحبك "

اسف طبعا عن الانقطاع والتأخير في التهنئة بس المهم اني لقيتك تمام وفرحت لفرحك أوي
مبرووووووووووووووك يا دكتورة وتحياتي للعريس كتير وقوليله "غنيم فرحان أوي وبيوصيك تاخد بالك من سارة "
تحياتي

بالتوفيق .......ومبروك

خواطر من القلب يقول...

مشاعرك جميله بجد والف مبرووووووووووووووك