"بيدى لا بيد عمرو"


عارفه لما تبقى عايزه حاجه اووى وتلاقيها ف غمضه عين راحت منك ..
وتبدأى تظبطى نفسك على الوضع الجديد وبعد ما خلاص تأقلمتى تلاقيها حصلت الى قبلها ..
بعد ما تشحنى نفسك ده انا هعمل واسوى ..تلاقى انك كنتى بتعومى ضد التيار ..
تحسى انك اصغر من انك تختارى حياتك..
قطر وماشى ف سكه حديد ..لا عارف هو رايح فين ولا حتى كان جاى منين..!!
جايز ساعتها مبيبقاش قدامك غير انك متعلقيش نفسك بحاجه ..
تبعدى عن الحاجات الى بتحبيها ..مع انك لسه بتحبيها ..
جايز عشان عارفه انك هتزعلى اكتر لوصحيتى لقتيها راحت منك..
بتقررى انتى بنفسك تسبيها جايز بيبقى احساسها صعب ..
بس مش اصعب من انها تضيع منك فجأه..
والغريب انك لما بتبعيها تلاقيها جتلك ..
والاغرب انها لما بتجيلك مبتحسيش الفرحه الى كنتى متخيلاها ..
لانها ببساطه ف عقلك الباطن ..مبقتش تفرق معاكى ..
جايز السنه الى فاتت كنت همووووووووووت واطلع نضيف
ولما عرفت انى شايله ..كنت شبه مقرره جوايا انى ادبلر الترم التانى بمزاجى ..
لا ذاكرت شيت ..ولا حرقت دمى ف عملى ..
والفانيل استهبلت عادى زى كل ترم ..وجبت جيد..!!
بس اكتشفت انى مفرحتش بالنتجه.. من جوايا كان عادى مش فارقه..
مع ان تقريبا كل الى حوليا كانوا مش مصدقين ..
حتى الدكتور الى بتجيبهالى كل ترم كانت طايره م الفرح..
جايز يكون الترم ده الامل الى ناوى يحرق دمى تانى كالمعتاد بعد ما كنت بعت القضيه..
وجايز يكون الامل الى يخلي عندى استعداد اذاكر بقى الترم ده..

هناك ١٦ تعليقًا:

الفراشة الصغيرة يقول...

بخ

اول تعليق

ل

رودى

الفراشة الصغيرة يقول...

والله يا بنتى انتوا اكيد بتحسوا بيا

كنت لسه بقل لضى القمر

هتسيبينا ليه مش كفايه السته بتوع صيدله

اللى معرفش عنهم حاجة

الفراشة الصغيرة يقول...

عموما بما انى مدخلتش هنا من زمان

اعيش حياتى براحتى

الفراشة الصغيرة يقول...

طيب طيب
خلاص

هروح اقرا

بس احجز مكانى قبل ما اروح

الفراشة الصغيرة يقول...

ليه ليه ليه كل ده

يا حبيبتى انتى على فكرة بتعيشى اجمل ايام حياتك

الكليه دى مش هتلاقى زيها

مضيقيش نفسك فيها خالص

واعمل اللى عليكى دايما وانتى طالما مقتنعه بده فهتبقى عارفه ان كل شىء نصيب بعد كده

حتى لو مكتوبلك بعد الشر انك تسقطى

اخويا كان فى هندسه وعلى اخر سنه سقط على ماده ودخل الملحق وبرضه قعد بيها سنه

تعرفى انه لو كان نجح السنه دى كان دخل الجيش

علشان مواليده كانت مطلوبه لكن لما قعد للسنه اللى بعدها اخد تأجيل الحمد لله

تفألى اكثر من ذلك
لعله خير
ان شاء الله

OmNiA MeShMeShA يقول...

فعلا
انتي عندك حق
:(
والترم والدراسه وكل حق
صراحه تضايق
:D
جامد البلوج
والموضوع
ولو انها متأخره :d

Khaled يقول...

حاسس بيكي بجد ,,
بعيد عن الكلية ,,

انتي كده وصلتي لاصل المشكلة , انك تحولي الموضوع ده من كونه شيء بتتعاملي معاه كواقع لـ حلم .. صعب التحقيق !

البلوج جامد (متابعه من فترة فـ الخباثة )
ربنا معاكو

loza يقول...

رودى
خدى راحتك البلوج بلوجك..
عارفه ..لو كنا نعرف انك هتسالى علينا كده مكناش سيبنا البلوج D:

بالنسبه لموضوع البوست
انا عارفه ان ممكن يكون فيه خير ليا
حتى لو مكانتش ماديه ممكن تكون غيرت حاجه ف شخصيتى مكانتش هتتغير غير بكده
سيبك انتى المهم انى هاخد اعفا من الجيش P:
....................

امنيه
ربنا يخليكى ..
الحمد لله انه عجبك ..
لا متأخره ولا حاجه ملحوقه ف سنتين D:
نورتى مصر..
..............

د.خالد
احنا عارفين البلوج ترب ومحدش فينا بقى يفكر يفتحه
بس الحمد لله انه عجب حضرتك..
نورت البلوج

sa'7so'7te يقول...

مش عارفة ليه اول الموضوع كنت فاكراكى بتتكلمى على حاجة تانية كنا لسه بنتكلم فيها بس انتى ضحكتى عليا وطلعتى بتكلمى عن الكلية

فعموما هتواضع و أديكى رأيى و أهو تبقى صدقة

بصى..دورى على ايه لازمتك فى الدنياززاو عاوزة تبقى ايهززيعنى عاوزة تتجوزى و تخلفى و تربى عيالك و كدة...و ده مش عيب..و لا عاوزة تتخرجى و تشتغلى احسن شغلانة مش اى شغلانة والسلامززولا عاوزة تعملى حاجة كبيرة اوى لربنا و تلتزمى بيها ولا عاوزة حاجة جديدة..لو عاوزة الاولى يبقى من الاخر عدى السنة فى سنتها و انتى عارفة العرسان بالكوم :)ززلو عاوزة التانية يبقى حبى اللى بتذاكريه و بعد كده شوفى الدكتور عاوز ايه من المادة حتى لو حاجة هبلة و احفظيهاززتبقى عملتى ليكى و ليهززلو عاوزة التالتة يبقى لازم تذاكرى لأن دى عبادة و بعد كده دورى على طريقة تعملى اللى عاوزاهززجمعيه او مجهود شخصى..و كده يعنى

طولت بس اصل البيت نايم ما صدقت ارغى مع حد

ميمو صحيح..انا بحبك اوى على فكرة

loza يقول...

النظريه يا ساره ان مفيش حد طبيعى ف الدنيا مش عايز ال3 :D
بس الفكره ف الاراده الى تقدر تحقق حاجه فيهم
جايز الفتره الى فاتت كنت واخده الحياه باستهتار ..
بس انا حاسه ان السنه الى فاتت فرقت معايا ف التفكير بصوره كبيره
ربنا يسهل بقى السنه دى ان شاء الله

وانا كمان بجد بحبك جدااا يا ساره ^_^

myegy يقول...

انتي خلاص خلصتي كل الكلام يا سارة .ززانتي كل اللي ما كنش لساني قادر يقوله
مقاله رائعة..انتظر المزيد..ارجو ان تزروني في مدونتي
www.myegytube.com

Eman Henaish يقول...

Just remember .. Every thing 4 a reason :)

Wish I were a Butterfly ... يقول...

حسيت كلامك أوي أوي أوي
يمكن مش في موضوع الكلية، لكن في حاجة تانية حسيت نفس اللي حسيتيه فعلا

عموما إحنا كل يوم بنلاقي نفسنا عرفنا الدنيا أكتر واتعلمناها أكتر

فمش تزعلي على حاجة خالص و افتكري دايما إن كل اللي بيجيبه ربنا هو الخير فعلا لينا

مش مجرد كلمة بنقولها بس حسيها جواكي أوي
يارب السنين الجاية كلها تكون أحسن ليكي في كل حاجة يا لوزة :)

على فكرة أنا أول مرة أقرألك حاجة. دايما
Break
sa7'so7'te
ياريت تبقي تكتبي انت كمان :)
ربنا يقدرلك الخير دايما

break يقول...

ايه ده
قفشتكوا
بقى انا سايبكوا هناك و اجى الاقيكوا بتحبوا فى بعض هنا
يا كلااااااااااااااااب
من غيرى

اانا بحبكوا اوى على فكرة :D

break يقول...

اه
احم البوست
ان شاء الله يا ميمو السنة دى هتطلعى بتقدير امتياز
يعنى انتى ابتديتى اهو تاخدى خطوات زى ايام زمان فاكرة؟!
بتفكرى تحضرى محاضرة و يجيلك انفلونزا
وبتفكرى تاخدى كورسات معانا عادى من غير ما تكسلى
و الترم الاول طلع 6 مواد مش 7 والدنيا جميلة
تخيلى مثلا لو كان 7 زى ما كانوا بيقولوا
كان هيبقى معانا اناوانتى كام مادة فى الترم ده
الدنيا ربيع والجو بديع
قفلى على كل المواضيع
قفل قفل قفل
بالمناسبة صحيح
هو مين عمرو ده

غير معرف يقول...

الله عليكي لحد قبل ماتقولي موضوع الترم والمواد دا انتي قولتي اللي جوايا بالظبط في كل حاجة في الحياة عرفت تقولي اللي نفسي اقوله وبقيت مابقدرش لان البوح مش بيفيد كتير
برافو عليك احسنت ربنا يوفقك
نصيحتي ليكي بقي وزعي مجهودك يعني لا تحرقي دمك اوى ولا تبيعي القضية خليك في الوسط يابمبم